1 Timoti 6 - AKITUTUKET NAKITETET (NEPEPEKA ISABULIN KA AWARAGASIA)

¹ Ng'ulu lu eraito ibulesun ejii ayong'ite lukapolok kes, tetere emam itwan ni erasi ekiror ka Akuju kiton akisisianakino wok.

² Ibulesun lu eraito luka lukapolok kalu eraito Ikristayon mam kitemokina anwang'ite kesi, naarai eraito kesi ikanacan ka akanacan kes. Itemokina kesi akijaanakin kesi kojokan, naarai lu edumunete ameda naka asoma kes erait lukeyuunak lu eminasi kesi. Ejii osi akisisianakin ka akisiarasiara kuju ka iboro kalu.

Lukesisianakinak luka aliokonu kiton Abara naka abeite

³ Ng'ini kere ni isisianakini nu egelakina, bobo komam kecamara kakiro nuka abeite nuka Lokapolon wok Yesu Kristo nepepe ka akisisianakino naka edini wok,

⁴ ileleba epogi, bobo mam kejeni ibore ipede. Ejaasi nesi ka aminanari nakaronon ka ang'olopa ikamuut akiro nu eyaunete eding', araton, awomowomosia nukarokok,

⁵ kiton ang'olopa ng'in paki alomun kamaka itung'a kalu mam adama kes kisomaete, bobo komam kejaatatar ka abeite. Itunenete kesi ebe edini erait eroto loka adumuni abara.

⁶ Teni, ejii adumunete na epolo noi toma ayong'ite Akuju, ka akilesikina kiboro kalu ejaasi kitwaan.

⁷ Inyena kabuutu siong' kayauto akwap? Emam ibore ipede! Inyena ibeikinete siong' ayari ka akwap? Emam ibore ipede!

⁸ Kanuka ng'unu, kijaasi siong' ka inyamen kiton inapen, ilesikina ng'ulu kama kosi.

⁹ Konye ng'ulu lu eminanarosi ka adumun abara edacakinosi toma atamisio kosodete kesi akikamun kotoma oregi loka aminanar kiboro luka abang'aanut kiton lu ikang'asiete itwan, lu emudiarete itwan.

¹⁰ Naarai amina ikabel nes ageunet kiboro kere kalukarokok. Ajaikinosi itung'a ice ka aminanar ka abara akitodol nama enyekinata akiyuun, ka abilibili itawon kes kicani kalu ipu.

Icori Paulo Timoti

¹¹ Konye ijo, etwan ka Akuju, kinyekinosi ka iboro kalu kere. Kotamaki akote adolite, acoite Akuju, akiyuun, amina, atitinyu, kiton akiyamara.

¹² Kojii ejie lokajokan loka akiyuun, kirum akijar na emam kejaasi ka esial nakinyarakino ijo apaki na iyamoo ijo arokusio kon kojokan koking'aren kaluketodiarak kalu ipu.

¹³ Koking'aren ka Akuju, lo einanakini iboro kere akijar, bobo koking'aren ka Yesu Kristo, lo abu kolimo akiyuun keng' koking'aren ka Pontio Pilato, kecorakini eong' ijo

¹⁴ akiyong'o acorasia kon kiton aricakiite amuno kon adolore Apaaran na ebong'una Lokapolon wok Yesu Kristo.

¹⁵ Eyauni Akuju atakanuun keng' kakolong' kana itemokina, lo ejaasi ka asulwany, bobo koraite Lokepugan epe bon, Ejakait loka ijakaa, Lokapolon ka lukapolok.

¹⁶ Nesi bon lo mam ketwani. Iboe nesi kotoma acaus na mam itwan ipede ni ebeikini adolokin. Emam itwan ipede ni anyuuti nesi apelem. Emam itwan ipede ni ebeikini anyun nesi. Akibusesu ka apolou naka ikaru kere kojaasi ka nesi! Ikote nepeneni.

¹⁷ Kicoraki ng'ulu lu ebarito kotoma iboro luka akwap kana ebe mam kesi epogi. Konye kipiakisi kesi amuno kes namaka Akuju, kalo einanakini oni ng'ini ibore kanuka alakara wok. Mere kesi akipiakin amuno kes oboro lu emam kejenaka nukes nukimoi, bala abara.

¹⁸ Kicoro kesi kisomata ajokun, kobaritete kesi kasoma nukajokak, kosianaka kesi, bobo kolokokina kesi akimor kaluce.

¹⁹ Kokipone kalo igwaete kesi kanu kes kikulopek abara na erauni apetatait na icasit kapaarasia kanu ebuuto. Kosodete kesi adumun akijar na erait akijar naka abeite.

²⁰ Timoti, kidara kojokan nu epiakin akanin kon. Kinyekinosi ka ejori kalo mam kitopolorit Akuju, kinyekinosi ka apega kana enyarito itung'a ice kawolite, “Ajenus.”

²¹ Naarai epogakinosi ice ebe ejaasi kesi ka ajenus kang'ini. Kopone kang'olo adautu kesi akinyekin akiyuun. Kojaasi asianut ka Akuju ka osi.