1 Timoti 5 - AKITUTUKET NAKITETET (NEPEPEKA ISABULIN KA AWARAGASIA)

Nu itemokina akisomanakin lu iyuuto

¹ Mam akiretakin itwan ni emojong'it kama kon, konye kimaima nesi bala papa kon. Koyaite lu edisiaka kama kon bala ikanacana kon,

² aberu nu emojong'ito bala kes ka toto kon, aberu nupesuru bala akinacana kon, kalausu kere.

³ Koyong'ite apuseru nu emam kejaasi ka itwan ni ing'arakini kesi.

⁴ Konye kejaasi apuserut kidwe, kere itatai, ejii kesi akisisiaun nu ekote edini kesi akisomakin luka ekale kes. Kokipone kalo atacata kesi ikauriak kes nepepe ka taapa kes, naarai ng'unu kes nu italakarito Akuju.

⁵ Apuserut naka abeite, kemam itwan ni ing'arakiit nesi, ipiakini amuno keng' namaka Akuju, bobo itolosit akilip ka aking'isite nesi aking'arasit akware ka apaaran.

⁶ Konye apuserut na isomae adoteu adau atwanare, atikere kejari.

⁷ Koinak kesi acorasia nu, tetere emam itwan ipede edumuni aronus kama kes.

⁸ Konye kemam itwan ipede kidari ipajanitin keng', kacut luka ekale keng', adau nesi aking'ere akiyuun, bobo erono nesi cut akilanya ni emam kejaasi ka akiyuun.

⁹ Mam akimarakin apuserut apede toma asirit naka apuseru kemam nesi kedeparit ikaru akaisakanykape. Bobo, emenyekina nesi katipe bon,

¹⁰ bobo kojaasi ka ekirori lokajokan kanuka asoma nukajokak, koraite aberu na etopolou idwe keng' kojokan, na idiaunene ilong'au ko ore keng', kisomakiite Ikristayon asoma nuka akiyapepera, king'arakiite itung'a lu icanasi, bobo kolemuna asoma nu ejooka.

¹¹ Mam akimarakin apuseru nu ering'a edisiaka kokaru toma asiriit naka apuseru, naarai kejaikinosi kesi ka akote amanyakin, elomarete kamaka Kristo,

¹² kosodete atubokin kesi ebe abilata asumunet kes nasodit.

¹³ Bobo isisiaunete kesi amunaute akolong' kes irimete kotogoi. Konye ibore nikaronon cut ebe isisiaunete kesi araus nuka esomit ka elodo inerasi nu mam kitemokina kesi ejori.

¹⁴ Kanuka ng'unu, anyuuti eong' ebe ejokuna apuseru nucik amanyakin, kidooto idwe, kidarata ireria kes, tetere emam epading'a wok kedumuni agogong' naka ejori nukarokok kuju wok.

¹⁵ Naarai apuseru ace adautu abong'or akitup Asatanit.

¹⁶ Konye kejaasi aberu kijokin na iyuut Akuju ka ipajanitin lu erait teni apuseru, king'araki nesi kesi. Mam akitadaka ekanisa alang'iru ng'ini tetere ing'arakini ekanisa apuseru nuka abeite.

¹⁷ Imojong' lu isomaete nukajokak kotoma ayaite luce, ejokuna akirop kesi irwana kaare, kacut ng'ulu lu isiarisiarete akirot ka Akuju kiton akisisianakin.

¹⁸ Naarai ebalasi agirasia nukalaunak ebe, “Mam akirapa emong'o akituku keng' itolosit nesi akipuda ikinyomo,” Bobo, “Ejii ainakin lukesomak eropit kes.”

¹⁹ Mam acamun ewosan kijokin kuju ka itwan kani mojong' adepar kejaasi lukajenak iare kere iuni.

²⁰ Kiretakisi ng'ulu kere lu isomaete arokusio koking'aren kitung'a, tetere ekuriakarosi luce.

²¹ Koking'aren ka Akuju nepepe ka Yesu Kristo kiton imalaikan lukalaunak, kemaimait eong' ijo akiyong' acorasia nu emam akitodiar epogi epede kere de emam amina luce ka akigwakiite luce awai ko obore kijokin kani isomae ijo.

²² Mam akiburuburu akidokokin itwan kijokin akanin kanuka atiakar nesi awai kisoma asoma ka Akuju. Mam akilomo toma aronus ka nice itwan. Kojii ilae.

²³ Mam akimata akipi bon, konye komasi ebino ediosi kanuka aking'arakin akook kon, bobo kanu idekananare ijo irwana ipu.

²⁴ Arokusio ka itung'a kice etakanete, bobo egeete arokusio kes kama kes atubokino, konye arokusio ka itung'a kice etakanunos kokau bon.

²⁵ Kokipone kalope kang'oli etakanete asomision nukajokak, atikere ng'unu de nu mam ketakanete cut mam keong'opete.