1 Timoti 4 - AKITUTUKET NAKITETET (NEPEPEKA ISABULIN KA AWARAGASIA)

Lukesisianakinak luka Aliokonu

¹ Inera Emoyo kotoma acaus ebe inyekinete itung'a ice akiyuun apakio nuka esial. Ebunete itung'a ayong'ite imoyoi lu ing'alaete ka akigwapite akisisianakino naka ipara.

² Iliokoikis kes eyeete akisisianakino bala ng'ini, luketwakata awomomoosia kes, bala kicueik ecumata lo emwana.

³ Itung'a bala ng'ulu iteng'erito luce emanyit ka akiteng'erite lu iyuuto akinyama inyamen mutan lu esubit Akuju konyamai kakiyalama.

⁴ Ng'in ibore ni esubit Akuju elae. Emam ibore ipede ni itemokina aking'er kidiaun kalipasia kanuka akiyalama.

⁵ Naarai akirot ka Akuju kiton alipasia einakinete ecamuno ibore ng'ini koking'aren ka Akuju.

Lokejaanakinan ka Yesu Kristo lo ejokuna

⁶ Kiinaki ijo lukeyunak akisisianakino na, irauni ijo nikejaanakinan nikajokan nika Yesu Kristo, nikenyama akiro nuka akiyuun kiton nuka akisisianakino kanaka abeite kana ibu ijo kotupu.

⁷ Kikunyarite kamaka akapolok kijokin kanu mam kitiminaarito Akuju. Kitolosite akisisia ng'unu nu itiminaarito Akuju.

⁸ Ejaasi abolia kajokun mutan, konye asoma ng'unu nuka emoyo ejaasi ka ajokun na egelegela, naarai itumunikiito oni akijar nakipokona kiton na ebuuti.

⁹ Erait alimoret naka abeite, bobo na itemokina acamun.

¹⁰ Iutasi oni ka asoma ka agogong', naarai ipiakisi oni akiyuun wok namaka Akuju kalo ejari, kalo erait Ekeyuunan itung'a kere, kacut ng'ulu lu iyuuto.

¹¹ Koinaki kesi acorasia nu kiton akisisianakino na.

¹² Mam ajalakin itwan ipede konwang' ijo kanu iditare ijo, konye koraite ni igwapit lukeyuunak kojori kon, koponesio kon, kamina kon, kakiyuun kon kiton alaus kon.

¹³ Akitodol na abunia eong', kisoma agirasia nukalaunak koking'aren kitung'a, kisiarasiara, bobo kisisianakini itung'a akirot ka Akuju.

¹⁴ Mam akinyekin idutat ni ejaasi ka ijo, ni apon koinakine ijo kopone kalokadwarun na edokokinata imojong' akanin kes kuju kon.

¹⁵ Kisoma iboro lu, bobo kolemun ijo ilope asoma nu, tetere anyunete itung'a kere akitolosite kon nakajokan.

¹⁶ Kocoikiite akiro kon kilope ka akisisianakino kon. Kitolosite asoma iboro lu, naarai kisoma ijo nu, iyuuni ijo akwana kon kilopet nepepe ka ng'ulu lu epupiete ijo.