1 Timoti 3 - AKITUTUKET NAKITETET (NEPEPEKA ISABULIN KA AWARAGASIA)

Lukayaitok kotoma Okanisa

¹ Erait na alimor naka abeite: Kekote itwan araun loka anyanaran, ekote nesi asoma nu ejooka.

² Komam loka anyanaran kejaasi ka akiro nukarokok. Koraite ekiliokit loka aberu kape, lo emam kemerana, lo etikokina, lo iyapepera, lo idiaunene ipejok, lo ebeikini akisisianakin,

³ lo mam kemerana, lo mam kededeng', lo epatana kojaasi ka aipuc, lo mam kemina ikabel.

⁴ Ejii nesi ayaite ekale keng' kotenan, ka akitodikin idwe keng' ayong'it nesi.

⁵ Naarai, kemam etwan kebeikini ayaite ekale keng' kotenan, ikoni nesi ebuni ayaite ekanisa ka Akuju ai?

⁶ Komam nesi kerait itwan ni kiyuuni Kristo pacu, tetere nesi mam kejaikinosi kepogi, kotubokinete nesi kosodi Asatanit akikamun nesi.

⁷ Tar koyong'itete itung'a luko king'a ka ekanisa nesi, tetere emam kitisilikino nesi ka akibirokin aloketait ka Asatanit.

Lu ing'arakiito kotoma Okanisa

⁸ Ejii lu ing'arakiito kotoma okanisa ajaus ka iponesio lukajokak bobo kinerasi abeite. Mam kitemokina kesi akimata ebino lo epolo noi kere ajaus ka aminanari naka adumun abara kopone kalo mam kideere.

⁹ Ejii kesi aricakiite abeite naka akiyuun kana etoduun ka adama kanu elaete.

¹⁰ Ejii akimoo kesi bere, kedumun ebe emam kesi akirot, kojalakine kijaanakisi eraito lu ing'arakiito.

¹¹ Ejii aberu kes ajaus ka iponesio lukajokak, komam keraito nuka esomit, kotikokina, komunokina koboro kere.

¹² Lo ing'arakiit ko okanisa komanyite aberu ape bon, kobeikiite akidara idwe keng' kiton itung'a luko ore keng' kotenan.

¹³ Ng'ulu lu isomaete kojokan asoma nuka aking'arakiite, edumunete iroria lukajokak, bobo ebeikinete kesi ejori kuju ka akiyuun kes kotoma Yesu Kristo emam akurianu.

Akirot nakapolon na imunonite

¹⁴ Egirakiit eong' ijo ebaruait lo, konye abuuti eong' anyuni ijo kapaarasia kadis kanu ejaasi king'aren.

¹⁵ Konye ketumor eong', kitodikini ebaruait lo ijo ekipone lo itemokinare itung'a ayaite kojokan awate kes ko otogo ka Akuju, ekanisa ka Akuju kalo ejari, epiri bobo apetatait naka abeite.

¹⁶ Emam itwan ebeikini ang'erokin ekipone lo epolokototore nu eng'opito ko odini wok: Kotakanuuni nesi kaputo ketung'anan, kitodiari Emoyo Lokalaunan ebe edolit nesi, koanyunete imalaikan nesi, apon kisiarisiari kakwapin kuju keng', apon komunokine nesi kakwap kijokin, koyaarete nesi kuju.