1 Petero 5 - AKITUTUKET NAKITETET (NEPEPEKA ISABULIN KA AWARAGASIA)

Esipan ka Akuju

¹ Kanuka ng'unu emaimait eong' imojong' kokiding' kus, bala emojong'it loce nepepe ka lo abu kanyu kakonyen icani ka Kristo, bobo lo amori akibusesu na ebunio apukor.

² Kijokoto esipan ka Akuju, esipan lo ejii akanin, emam kikurakiite osi konye kamina, mere kadumunete kanaka asilutu konye ka akote ka etau kon,

³ Mam akipuga ka amaraga lu ejaasi kwapa kus konye karaitete lu ebeikinete luce akitup.

⁴ Apak na etakanunere Lokejokon Lokapolon, idumunete osi eropit loka akibusesu lo ecae mam kewolie.

⁵ Kokipone kalope kang'olo osi luciki koyong'itete imojong' kus. Konapata osi kere akiyapepera, kanuka akijaanakin luce, naarai ebalasi agirasia nukalaunak ebe, “eng'erit Akuju lukepogi, konye emina lu iyapeperasi.”

⁶ Korautu itung'a lu iyapeperasi kakanin ka Akuju nuka agogong', tetere nesi kitopolori osi kapak kana ekotore nesi.

⁷ Kinyekisi nu iyalolong'oete osi kere ka nesi, naarai idari nesi osi.

⁸ Kokwenyete, kolokokinasi! Lokasurup kus, Asatanit iladi kwape ka eng'atuny kalo eruo, ekote itwan ni ilikori.

⁹ Kicasitete ka akiyuun kus bobo kitelekasi nesi, naarai ijenete osi ebe lukeyunak kus luce ka akwapin kere ejaasi ka icani bala lupe lu.

¹⁰ Konye na idaunata osi akicanakin kapak kana edite, Akuju loka asianut kere, lo kinyarit osi akimor akibusesu keng' na mam kedaun kotoma akimorikikina nepepe ka Kristo, kitodolikini nesi elope osi ka ainakin osi agogong' ka akisicata osi.

¹¹ Kojii apedor nama keng' ikaru kere! Ikote nepeneni.

Amalan nakesial

¹² Egirakini eong' osi ebaruati lo euriana ka aking'arasit ka Silas onaci lo emunokina lo emorete ka eong' ekristayone kotoma Kristo. Egirit kaurianut nama kus ainakin osi itau ka alimor ebe erait na asianut ka Akuju naka abeite; kogwata icasito kotoma keng'.

¹³ Ekanisa loka ipoupatin kus lo eseut Akuju nenipe ka osi, lo ejii Babilon kimalate osi. Okoku kang' Marko de kimalate osi.

¹⁴ Kimalananasi kopone kaloka anuikin kanaka amina kanaka ekristayone. Kojii aipuc ka osi kere lu ijaasi toma ka Kristo.