1 Petero 4 - AKITUTUKET NAKITETET (NEPEPEKA ISABULIN KA AWARAGASIA)

Akijar ka itung'a kalu ibelokina

¹ Kwape kicanakinere Kristo ka akwana, ejii osi de ikulopek kopone kalope kang'olo loka akiitunun lokejaasi ka nesi; naarai ng'ini kere ni enyemi icanakin luka akwana mam bobo kisomae aronus.

² Ageun apak na akitolosit, ejii osi akijar kus naka akwap eyaito nu ekote Akuju bobo mere nu ekote etung'anan.

³ Idautu osi akitosoma apak na ilesikina isomaete nu isomaete itung'a lu mam kejenete Akuju. Ijarete osi akijar naka akitalakarite akwana, amera, ang'olopa, adoteu, ipucini luka emwane, ka akimaa aputon.

⁴ Bobo kipokona eumokito luka akwap mam osi kimorikikinosi ka kesi ka akijar kanakaronon, kanuka ng'unu kirasete kesi osi.

⁵ Konye ejii kesi alemun akiro kes ka ikulopek ainakin Akuju, lo elokokina atubokin lu ejarete kalukatwaka.

⁶ Na nesi atenikina esiarisiarere Akiro Nukajoka namaka ka lukatwak de, namaka ng'ulu luketubokite kotoma awate kes kwape etubokinere ng'in itwan; esiarasiarakite kesi tetere kotoma akijar kes naka emoyo ejarete kesi kwape ejaria Akuju.

Imanejai lukajokak ka idutan ka Akuju

⁷ Apu esial kiboro kere. Kanuka ng'unu ejii osi ajaus ikulopek ayaitoi kojokan bobo ka alokokina, ibeikinete akilip.

⁸ Kuju kang'unu kere, kominasi ka abeite, naarai erapiari amina arokusio nu ipu.

⁹ Kidiaunenete luce emam aking'urung'ura.

¹⁰ Ng'in itwan, bala emaneja lokajkan loka idutan ka Akuju lu egelegla, ejii akitosoma kanuka ajokus kaluce edutat lo edumut nesi kamaka Akuju.

¹¹ Ng'ini kere ni elimonori ejii alimor akiro ka Akuju; ng'in kere ni ijanakini ejii akijaanakin ka agogong' kana einakini Akuju, tetere kotoma oboro kere akitur einakino Akuju kotoma Yesu Kristo, lo erait akibusesu kere na keng' nepepe ka agogong' ikaru kere. Ikote nepeneni.

Akicana kanuka araus Ekristayot

¹² Luminan, mam ariang'un kamaka ocani lu epipil lu ebunete nama kus akitama osi, bala ibore ice ni mam kejenaka isoma kama kus.

¹³ Konye kolakara ebe imorete osi ka Kristo icani keng', tetere ibunete osi de alakari ka ailele na epukorere akibusesu keng'.

¹⁴ Irereng' osi kirasite osi kanu itupitotor osi Kristo; erait apolou keng' ebe emoyo loka akibusesu nepepe ka Emoyo ka Akuju ejii kuju kus.

¹⁵ Konye mam ipede kama kus akicanakin bala nikaaran, kere de ikokolan, kere itwan nikaronon, itwan ni ekutukana.

¹⁶ Konye kicanakin itwan naarai erait nesi Ekristayot, mam nesi asilikin, konye kitur nesi Akuju, atenikina ebe itwan ng'in enyarite kokiror ka Kristo.

¹⁷ Adolu akolong' na egeuna atubonokin, bobo itung'a ka Akuju nesi lu sodit atubokino. Kegeuni kama wok, ikoni eng'etakini ai kamaka ng'ulu lu mam kiyuuto Akiro Nukajokak alomuni kamaka Akuju?

¹⁸ Kwape ebalatatar agirasia nukalaunak ebe: “Ekekes itung'a lu ejoka alakuno; inyena, konye, isomakin kamaka kalukarokusio lu mam akuju?”

¹⁹ Kanuka ng'unu, ng'ulu lu icanasi atupa ka amina ka Akuju, ejii kesi atupa ka asomisio kes nukajokak amunokin kesi ikulopek cut lokakasuban kes, loericakiit akisumunikinete keng'.