1 Petero 3 - AKITUTUKET NAKITETET (NEPEPEKA ISABULIN KA AWARAGASIA)

Aberu ka ikiliok

¹ Kokipone kalope kang'oli osi aberu, koyong'itete ikiliok kus, tetere kere kemam ice kama kes kiyuuto akirot ka Akuju, eyaunete iponosio kus kesi akiyuun. Mam kekotokina osi alimun akirot,

² na anyunata kesi iponosio kus lu eyong'ara bobo kolaete.

³ Mam akitosoma iboro luko king'a kanuka atemelele kus ka ikulopek, bala ekipone lo iteniata osi itima kus, kere aejoi nu inapenenete osi, kere inagai lu inapito osi.

⁴ Kinyeke alaus kus koraite naka abeite nakotoma kotau ka itwan, temelele na mam kedaun naka emoyo kalo iyapepera bobo kotatii, na kakonyen ka Akuju epolo adumunete.

⁵ Naarai aberu nu amunokina nuka sek nu epiakito amuno kes nama ka Akuju, anaikito akiten awate kes kitemelel kayong'ite ikiliok kes.

⁶ Ekoni Sara neni. Ayong'it nesi Aburaam ka anyarite nesi ejakait keng'. Iraito osi apesuru keng' kisomata osi nu idereete komam ibore ni itukuriani osi.

⁷ Kokipone kalope kang'olo osi ikiliok, kiboete ka aberu kus, ijenete osi ebe erait aberu ibore ni enonok. Koyaitete kesi kayong'ara, naarai kesi de idiaunete nepepe ka osi edutat ka Akuju loka akijar. Kisomata ekipone lo tetere emam alipasia kus kedumunete ibore ni irebokini.

Ican kanuka asoma nu iderete

⁸ Ang'etakini eong' abala ebe: Ekotokina osi ajaus kakimorikikina kotoma omoyo epe, kominasi luce bala ikinacana ka akanacana, bobo kosiakasi ka akiyapepera kaluce.

⁹ Mam akitaca aronus ka aronus kere ilami ka ilami, konye kotaca ka asuluwany, naarai asulwany nesi itumunikiit Akuju osi naka enyarauna nesi osi.

¹⁰ Kwape ebalatatar agirasia ebe, Naarai “Ng'ini ni ekote akijar naka ailele bobo kokote anyun apaarasia nukajokak, kinyek ejor nukarokok bobo kopalik ejori aliokonu.

¹¹ Ejii kesi akinyekin arokusio ka akisoma nukajokak; kotamakisi cut akote aipuc ka itauon kes kere.

¹² Naarai akonyen ka Lokapolon iteete lu edolito bobo akii keng' ipupete alipasia kes; Konye ereit Lokapolon ng'ulu lu isomaete aronus.”

¹³ Ng'ai kikang'isi osi isomaete osi nu iderete?

¹⁴ Konye atikere kidumut osi ican kanuka asoma nu edolito, ikote osi irereng' ai! Mam itwan ipede akurianu,

¹⁵ konye kocoitete Lokapolon Kristo kotauon kus. Kolokokina akolong' kere abong'okin itwan kere ni king'isit osi kuju ka amuno na ejii toma kus,

¹⁶ konye kisomata ka akiyapepera. Kidarata adama kus kolaete, tetere irasio osi, ng'ulu lu inerasi nukarokok kuju ka iponosio kus lukajokak bala lukatupitok ka Kristo esilikinete kanu inerasi kesi.

¹⁷ Naarai ejokuna akicanakini kanuka asoma nu kajokak, kerait nes ekote Akuju, akilanya asoma nukarokok.

¹⁸ Naarai abu Kristo kotwana katipe kanuka arokusio ka itung'a kere, etwan lo ejokuna kanuka lukarokusio, kanuka ayar osi namaka Akuju. Apon kwarai nesi kotoma akwana konye kitajarunete nesi kotoma omoyo;

¹⁹ bobo ka akijar keng' kanaka emoyo abu nesi koloto alimonokini imoyoi lu ajaasi aenis,

²⁰ ng'ulu nesi lu abutu kong'eroto akipupu Akuju idarit nesi kesi ka apaarasia ka Noa, eduki ataker ng'in. Toma ataker ajaasi itung'a idis lu adolito ikanykauni lu abutu kokuata akipi,

²¹ na arait akitupusete naka akibatisauno na itukuyi osi kipokona. Mam batisim kelemari akirionus naka akwan, konye bala akimaima Akuju ainakin adama nu elaete. Kilakuni osi kotoma ajarun ka Yesu Kristo,

²² lo adau aikar kuju bobo ejii akan nakoteten naka Akuju, ipugae imalaikan kere nepepe ka luka apedor kokuju kiton luka agogong' kere.