1 Petero 2 - AKITUTUKET NAKITETET (NEPEPEKA ISABULIN KA AWARAGASIA)

Amoru na ejari ka akwap Nakalaunan

¹ Kolemasi arokusio kere, emam bobo aking'ala kere de esoswai kere de alilit kere de ang'ajep nakaronon.

² Koputosi ka idwe lukitetiak lu idouno arit akure naka akimata akile nuka emoyo, kosodi ka akimata ibeikinete osi apoloun ka adumun alakuno.

³ Kwape ebalatatar agirasia nukalaunak ebe, “Ijenutu osi ikulopek ekipone lo esianar Lokapolon.”

⁴ Kobutu namaka Lokapolon, amoru na ejari, na ang'erete itung'a ebe emam adumunet, konye aseut Akuju bala na epolo adumunet.

⁵ Kobutu bala amoru nu ejarete, kocamutu kitosomai osi ikulopek adukia Etogo ka Akuju lokalaunan, nama ijanakinanata osi kwape ka isaseredotin lukalaunan lu elemunenete idutan luka emoyo nepepe ka isuban lu ecamut Akuju kotoma Yesu Kristo.

⁶ Naarai ebalasi agirasia nukalaunak ebe, “Aseu eong' amoru naka adumunet, na epiakini eong' bala amoru nako kona kotoma Sayon; ng'in kere ni eyiuni nesi mam kitisilikino.”

⁷ Amoru na ejaasi ka adumunete na epolo noi kama kus kalu iyuuto; konye kamaka ng'ulu lu mam kiyuuto, “Amoru na abutu lukadukok kong'eroto bala emam adumunete abu korau nakajokan noi akilany nuce kere,”

⁸ Bobo ebalasi agirasia ace be, “Erauni amoru na amoru na iguwanakini itung'a, ataba na einakini kesi akibirori.” Kigukiit kesi naarai mam kesi kiyuuto akirot; arait ng'ini nu akote Akuju kanu kes.

⁹ Konye iraito osi atekere na eseute, isaseredotin ka Ejakait, akwapa nakalaunan, itung'a ka Akuju elope, eseute alimonor asoma ka Akuju nuka aumokin, lo anyarauni osi kotoma amuton ayauni osi acaus keng' naka aumosit.

¹⁰ Kapak kape imam osi iraito itung'a ka Akuju, konye kipokona iraito osi itung'a keng'; apak ape imam osi kijenete akitimio ka Akuju, konye kipokona idumutu osi akitimio keng'.

¹¹ Luminan, kemaimait eong' osi kwape ka ilong'au ka ikerai kakwap kana! Mam acamun asoma nu ekote akwan, nu ng'in pak itijiete emoyo.

¹² Iponosio kus kokiding' kaluka akwap, ekotokina kojoka cut na kiwosata kesi osi ebe iraito osi lukesomak arokusio, ebeikinete kesi anyun asomisio kus nukajokak kosodete akitur Akuju apaaran naka abunore keng'.

¹³ Kanuka Lokapolon, koyong'itete ijakaa kere: Kacut Ejakait lo erait lokapolon cut kapugan,

¹⁴ atikere igavanai lu eseut nesi akitisilari ng'ulu lu isomaete arokusio ka akitama ng'ulu lu isomaete nukajokak.

¹⁵ Naarai ekote Akuju osi akitataunti ejori loka awolit ka itung'a kalu ebang'aka ka iboro kalukajoka lu isomaete osi.

¹⁶ Kiboete bala itung'a lu elakakina, mam kong'in de, akitosoma alakakina kus arapakin aronus apede, konye kojarete bala ibulesun ka Akuju.

¹⁷ Koyong'itete ng'in itwan, komina lukeyunak luce kus, koinakisi Akuju kus akibusesu, koyong'itete ejakait.

¹⁸ Osi lukejaanakinak, kocamutu ijakaa kus bobo koyong'itete kesi kere, mere kamaka kalu esyaka bon konye kamaka lu ededeng'.

¹⁹ Kisirereng'i Akuju osi kanuka nu, king'rikisi osi apipilu na mam kekotokina naarai ijenete osi nu ekote nesi.

²⁰ Anyena adumunete ejii neni, king'rikisi osi akibung'ao na ilesikina osi adumun kanuka arokusio kanu isomato osi? Konye king'irikisi osi kocani atikere kisomato osi nu edolito, kisirereng'i Akuju osi.

²¹ Arait nu nes kenyarakiit Akuju osi, naarai Kristo de elope abu kicanakin kanu kus, kosodi akinyekina osi ekipone lo itupiata osi nesi.

²² Mam nesi kisomat aronus apede; mam aliokonu apede abu kodumuni ka akituk keng'.

²³ Na arasere nesi, mam nesi akinyakun ka aratono; na ecanare nesi, mam nesi akitukuriankin, konye abu nesi kipiak amunokina keng' nama ka Akuju, Lokatubonokinan lo edolit.

²⁴ Kodak Kristo elope arokusio wok kotoma akwan keng' komusalaba

²⁵ Isito osi bala amerekekin nu awolikisi eroto, konye enyakun osi akitupu lokejokon bobo lokedaran ka imoyoi kus.