1 Petero 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kama kang' Petero, ekiyakia ka Yesu Kristo, egirakin eong' itung'a lu eseut Akuju lu iboyete bala ikerai lu isiarakina akwap nako Ponto, Galatia, Kapadokia, Asia, nepepe ka Bitunia.

² Aseuno osi atupa ka amina ka Papa Akuju akitaraun osi itung'a lukalaunak ka Emoyo keng', akiyong' Yesu Kristo ka akitalauno ka aokot keng'. Kinyek asianut nepepe ka aipuc korautu nu kus ileleba.

Amuno na ejari

³ Keyalamikisi Akuju ka Papa keng' ka Lokapolon wok Yesu Kristo! Kanuka asiaunt keng' na epolo na abu nesi koinak oni akijar nakitetet kotoma akitajarun Yesu Kristo ka atwanare. Nu kilelebete oni ka amuno na ejari,

⁴ kanuka ng'unu ijaasi oni idarito abara naka arereng'usio na iguwaikit Akuju itung'a keng'. Iguwaikit nesi osi kokuju, nama mam kesi kebosiata, amunaun, kere akipasa.

⁵ Eraito kesi lukus, luko toma akiyuun idarite ka agogong' ka Akuju kanuka alakuno na elokokina apukor kosial ka akolong'.

⁶ Kolakara kanu, atikere kejii kipokona osi akadakin kapakio kanuka atamisio nu ipu nu egelagela nu idumutu osi.

⁷ Atenikina kes erait akitodikin ebe akiyuun kus erait naka abeite. Atikere esawabu, lo ebeikino amunar, etamio ka akim; nes akiyuun kus de na ejokuna akilanya esawabu, ejii akitam nesi de, tetere etitinyor. Kosodete osi adumun akiturio ka akibusesu kiton agosibib ka apaaran na epukorere Yesu Kristo.

⁸ Iminasi osi nesi, atikere kimam osi kianyuto nesi, bobo iyuuto osi nesi atikere kimam osi kiteete nesi kipokona. Kanuka ng'unu ilelete osi kotoma akibusesu kalakara na emam kilesikina alimori ka akiro,

⁹ naarai idumunenete osi alakuno naka imoyoi kus, naarai ng'in nes atenikina ka akyiun kus nesi'.

¹⁰ Arait kuju ka alakuno kana nesi abutu ikadwaraka komoata cut ka aking'ic, kodwarunete kesi kuju ka edutat kalo ebuni Akuju ainakin osi.

¹¹ Abutu kesi kotamakisi akouni apak isomakinor kiton ekipone lo elomuna. Na nesi apak na etodiarit Emoyo ka Kristo kotoma kes, kotoma alimor icani lu eng'irikini Kristo ka akibusesu na etupakin.

¹² Abu Akuju kopukok ikadwarak lu ebe asoma kes mam arait kanuka adumunete kes ka ikulopek, konye kanu kus osi mere kesi ikulopek, akitor namaka iboro lu adaut ng'ulu lu isiarisiarete akiro nukajokak alimokin osi akitor namaka Emoyo Lokalaunan alomun kokuju, iboro lu imuito imalaikan ajenun.

Anyarauno toma akijar Nakalaunan

¹³ Kanuka ng'unu, kolokokisi adama kus asoma. Kokwenyete bobo kipiakisi amuno kus kere namaka asianut na ebuuti nama kosi ka apaaran kana epukorere Yesu Kristo.

¹⁴ Koyong'itete Akuju, bobo mam acamun akijar kus koyaite akote naka awate nu ayaito sek ering'a osi ijaasi akirionus.

¹⁵ Konye koraitete lukalaunak kasoma kere nu isomaete osi, kwape eraitere Akuju lokinyarauni osi lokalaunan.

¹⁶ Ebalasi agirasia nukalaunak ebe, “Koraitete lukalaunak naarai arai eong' lokalaunan.”

¹⁷ Inyarito osi nesi Papa, na ilipata osi Akuju, lo etubonokini itung'a kere ka etyae kalo eputo, atupa kanu isomae ng'ini itwan; kanuka ng'unu, kitosomata akijar kus kere ka akwap icoito nesi.

¹⁸ Naarai ijenete osi nu apon kotacai kanuka alakun osi alomun kamaka akijar naka ileci na ayaunete lukasonya kus akwap. Amam arait ibore ni abenen amunar, kwape ka epuesa kere esawabu;

¹⁹ arait asubanit ka Kristo na apolo etyae noi, lo asit bala imerikek ni emam aronus.

²⁰ Kedauti Akuju aseun nesi ering'a kesuba akwap, bobo kopukorete nesi kapaarasia kanuka esial kanu kus.

²¹ Kotoma keng' ibutu osi kiyutu Akuju, lo etajaruni nesi kotoma atwanare, ka ainakin nesi akibusesu; kanuka ng'unu akiyuun nepepe ka amuno kus kojaasi nama ka Akuju.

²² Kwape idaunata osi akiyong' abeite, idautu osi ikulopek akitalauno ka abunore adumun amina naka abeite kamaka lukeyuunak luce, kominasi luce kitauon kus kere.

²³ Akitor akirot ka Akuju na ejari ikaru kere edoun osi bobo bala idwe ka ekaurian lo ejii ikaru kere, mam ketwani.

²⁴ Kwape ebalatatara agirasia nukalaunak: “Itung'a kere eputosi ka anya, akibusesu kes kere eputosi ka aturo nuko kitwi. Erinyete anya, kosodete aturo ararari,

²⁵ konye akirot ka Lokapolon ideuni ikaru kere.” Akirot na nesi akiro nukajokak nu adaun alimonokin osi.