1 Itesalonikan 3 - AKITUTUKET NAKITETET (NEPEPEKA ISABULIN KA AWARAGASIA)

¹ Kosial mam siong' abeikinete akitolosite akikanya. Kanuka ng'unu katiakunete siong' akideun bon ko Atens.

² Kejukunete siong' Timoti onaci kosi, lo esomaete nepepe ka siong' asoma ka Akuju nuka akisiarasiara Akiro ka Kristo. Apotu siong' kejukutu nesi tetere isicasi nesi osi ka akitililim itawon kus,

³ tetere emam ipede kama kus ni ebong'ori kau kakiyuun keng' kanuka akisicanio. Ijenete osi ikulopek ebe ican bala lu eraito nu ekote Akuju kisomakinosi kama wok.

⁴ Naarai ering'a siong' ijaasi ka osi, apotu siong' kekwenyasi osi ebe ilosio akisicana siong'. Bobo, kwape ijenata osi kojokan, ng'unu kes nu abutu kisomakinosi.

⁵ Ng'ini nes atenikina na ejukuna eong' Timoti. Mam eong' apedor akitolosite akikanya. Kanuka ng'unu kasodi eong' akijukun nesi ajenun kuju ka akiyuun kus. Abeite, amam abeikinosi ebe kebu Asatanit kotama osi bobo ka atwaniar asoma kosi kere!

⁶ Kipokona adau Timoti abong'un nama kosi bobo ainu nesi siong' akiro nu italakarito kuju ka akiyuun kus ka amina kus. Alimoki nesi siong' ebe itunenete osi siong' kajokun ng'ini pak, bobo ikotosi osi anyun siong' kwape ikotototore siong' de anyun osi.

⁷ Kanuka ng'unu, akiro nuka akiyuun kus kainaki siong' etau loka alakara kotoma ocani kiton akisicanio kosi kere,

⁸ naarai ijarete siong' kipokona kigwata osi icasito kamaka Lokapolon.

⁹ Ikote siong' iyalamikinete Akuju ai kanu kus kanuka ailele kere kana ejaasi ka siong' koking'aren ka Akuju kanu kus.

¹⁰ Ilipete siong' nesi akware ka apaaran kitau kosi kere tetere iyanyunosi oni ka ainakin osi nu ekadito kotoma akiyuun kus.

¹¹ Kitenaki Akuju Papa wok elope kiton Lokapolon wok Yesu eroto lo abuniata siong' nama kus!

¹² Kitopolo Lokapolon cut amina kus kamaka nice ka nice kiton kamaka itung'a kere bobo korau nakapolon kwape kiminatatare siong' osi.

¹³ Kokipone kalo isicasi nesi osi, bobo koraunete osi lu idolito ka lukalaunak koking'aren ka Akuju Papa wok na ebunia Lokapolon wok Yesu nepepe ka lukalaunak keng' kere.