1 Itesalonikan 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Paulo, Silfano, kiton Timoti. Nama ka itung'a luka ekanisa loko Itesalonikan, lu eraito luka Papa Akuju kiton Lokapolon Yesu Kristo. Kojii asianut ka aipuc ka osi.

Akijar kiton akiyuun ka Itesalonikan

² Iyalaminikinete siong' Akuju ng'ini pak kanu kus kere bobo ilimonorete siong' osi ng'ini pak kalipasia kosi.

³ Naarai ituto siong' koking'aren ka Akuju Papa wok ekipone lo itosomata osi akiyuun kus, ekipone lo keinakina amina kus osi asoma kagogong'u kiton ekipone lo icasitere amuno kus kamaka Lokapolon wok Yesu Kristo.

⁴ Ikanacan ka akanacan kosi, ijenete siong' ebe emina Akuju osi bobo aseu nesi osi araun lukeng'.

⁵ Naarai abutu siong' kainutu osi Akiro Nukajokak, mere ka akiro bon, konye kagogong'u kiton Emoyo Lokalaunan, ka amuno kere. Ijenete osi ekipone lo ajariata siong' ajaasi siong' ka osi. Arait kanuka adumunet kus kikulopek.

⁶ Ibutu osi kotupata nu esomaete siong' ka Lokapolon. Ibutu osi kidiautu akirot ijaasi ka ailele na alomuni kamaka Emoyo Lokalaunan atikere kidumuto osi ican lu ipu.

⁷ Kanuka ng'unu ibutu osi korautu anyuneta kamaka lukeyunak kere kotoma Makedonia kiton Akaia.

⁸ Naarai kanuka agogong'u kus nes apupunere akirot ka Lokapolon mere ko Makedonia kiton Akaia bon, konye esiarakin ng'olo wai akiyuun kus kamaka Akuju. Bobo mam siong' kakotosi akiyatakin ejori.

⁹ Inerasi itung'a ng'ulu kere kuju ka akipejokin kosi osi: Ekipone lo kidiaunata osi siong', ekipone lo inyekinata osi aputon ka akibeleun osi namaka Akuju, lo ejari kaloka abeite,

¹⁰ kipokona idarito osi Yesu Okoku keng' kodoku alomun kokuju, lo abu Akuju kitajaru alomun kamaka lukatwaka bobo lo kiyuun oni kamaka anyunyura ka Akuju kana ebut.