1 Ikorinton 9 - AKITUTUKET NAKITETET (NEPEPEKA ISABULIN KA AWARAGASIA)

Akitodolikineta Kiton Asomisio ka Ekiyakia

¹ Mam eong' karait etwan lo alakakina? Mam eong' karait ekiyakia? Mam eong' kanyut Yesu Lokapolon wok? Mam osi kiraito nu etakanete kasoma kang' nu esomakiit eong' Lokapolon?

² Atikere keng'eroto luce de akidiaun eong' bala ekiyakia, teni osi idiauto! Naarai kanuka akijar kus na imorikikina ka Lokapolon osi ikulopek erait ajenunete ebe arait eong' ekiyakia.

³ Kitoronata itung'a eong', ekipone lo nes ayura eong' lo.

⁴ Mam oni kijaasi ka adolite naka adumun inyamen wok kimatan?

⁵ Mam oni kijaasi kadolite naka aupa ka aberu kwape ka ikiyakia luce ka ikanacan ka Lokapolon bobokwape ka Kepas?

⁶ Kere erait eong' bon ka Barnabas lu mam kejasi ka adolite naka apalikin asoma kanuka adumun inyamata?

⁷ Loka ajore ali ejii akitaca etiai kiboro kalu itosomaye nesi ka ajore? Lokakoruon ali mam kenyemi alama komanikor keng' naka emusabibu? Lokejokon ali mam kemasi akile kamerekek keng'?

⁸ Enera eong' nu ka apedori ka etung'anan? Mam ekisil kinera kong'ipekong'ini?

⁹ Naarai igirite kokisil ka Musa, “Mam ayenikin akituk kemong' ikinyomo.” Erait kanukimong'in nesi iyalong'ong'i Akuju?

¹⁰ Mam nesi kinera cut kanu wok? Kigirite kanu wok, naarai lokakoruon ejii akoru ejaasi kamuno kosodi loka pietan akipiete ejaasi ka amuno edumunete atutubet ka iraate.

¹¹ Kadautu sio ayekin nuka jokakak omoyoi kus, eronari kadumutu sio de idis koboro kus?

¹² Ejaasi luce ka adolite naka akote iboro lu kama kus, mam sio atikere kajasi kadolite kana epolo? Kanuka ng'un de mama siong' kitosomato adolite na, konye kikanyi siong' iboro kere akilanya araun ibore ni irebokit akiro nukajokaka ka Kristo.

¹³ Mam osi kijenete ebe ng'ulu lu igirite asoma Otogo ka Akuju edumunete inyamen kes ko Otogo ka Akuju, kosodete ng'ulu lu ijaanakinete ka altari emorete idutan lu edusite?

¹⁴ Kokipone kalope kang'olo abu Lokapolon kicorak ebe ng'ulu lu elimonorete akiro nukajokak ejii adumun lu jaret kaneni.

¹⁵ Konye mam eong' ketosomat apede kama kadolito kang' kanu, kere egiri eong' kipokona kanuka adumun. Ejokuna eong' atwanare bere! Emam itwan ipede elosi akibelokin adolit na epogare eong' akitaraun akiro along'u.

¹⁶ Naarai alimonori eong' akiro nukajokaka, nu mam kainakinete eong' alaro naka epogi. Kong'in de kecorakite eong' asoma nu. Ikokini eronari kama kang' ai kang'ere eong' alimonor akiro nukajokaka!

¹⁷ Kesoma eong' asoma nu naarai aseut eong', kokipone kang'olo kanuka ng'unu edarit eong' adumun aropetait; konye esomae eong' bala asoma nu ekotokina eong' asoma, naarai ainak Akuju eong' asoma nu.

¹⁸ Inyena konye aropetait kang'? Nu bon: Ebe kotoma alimonoreta kang' akiro nukajokak tin alimonori along'u, mam ketosomaye adolite kang' cut kotoma akiro nukajokak.

¹⁹ Atikere kalakina eong' kamaka itung'a kere, etarauni eong' ejolot kamaka itung'a kere tetere elanyi eong' itung'a lu ipu.

²⁰ Kama Kiyaudin abu eong' karau Eyaudit, kanuka akiriun Iyaudin; lu ejaasi okisila abu karau epe lo ejii okisila — atikere kemam eong' elope kajii okisil — tetere abeikini akiriun lu ejaasi okisil.

²¹ Lu ajaasi king'a kekisil abu karau epe lo ajii king'a kekisil — mam kerait ajaus king'a kekisil ka Akuju. Konye kwap kekisil ka Kristo tetere eriun eong' ng'ulu lu ejaasi king'a kekisil.

²² Nama kalu enonok abu kanonokari, tetere eriuni lu enonok Arau eong' iboro kere kotung'a kere, tetere eong' korotin kere eyuuni ice.

²³ Esomaye nu kere kanuka akiro ka nukajokaka, tetere eong' amori asuluanyi keng'.

²⁴ Mam osi kijenete kotoma akeriti lukakerak ilaagakina, konye epe bon nes edumuni idutat? Kanuka ng'unu kokere tetere idumuni ainakinete.

²⁵ Nika keran kere ecoikina koboro kere. Isomayete nu kanuka adumun abokok na edaun konye oni na mam kedaun.

²⁶ Mam eong' kakeri along'u, mam eong' kajiosi keuria;

²⁷ konye eguli eong' akwana kang' ka akilanya nesi tetere eong' mam kinyekino kadau eong' alimonokin luce.