1 Ikorinton 8 - AKITUTUKET NAKITETET (NEPEPEKA ISABULIN KA AWARAGASIA)

Aking'isitait kuju ka Inyamen lu edusite Aputon

¹ Ikamuti inyamen lu edusite aputon: Ajenete siong' “Oni kere ajatatar ka akijene.” Einakini “Akijene” itwan epogi, konye amina eduki.

² Kejii itwan irujae ebe ejeni nesi ibore, mam bere nesi kejeni kwape ekotore nesi ajenun.

³ Konye kemina itwan Akuju, ejenuna itwan ng'ini kama keng'.

⁴ Kanuka ng'unu konye, atupa ka inyamen lu edusite ajokin, kijenete siong' ebe ajokit mam kejatatar ka ajaus naka abeite, kijenete oni ejii Akuju ape bon.

⁵ Atikere kejaasi lu enyarite akujun kokuju kere kokwap, atikere kipuu “akujun” kiton “lukapolok.”

⁶ Konye oni ajaasi ka Akuju ape, Papa, nama keng' nesi ejaasi iboro kere kiton kanu keng' ijatatar oni, ka Lokapolon wok Yesu Kristo kotoma keng' nesi ejatatar iboro kere.

⁷ Kong'in de mere kere ejatatar ka akijen kana. Konye ice, kotoma anaikina cut ka aputon, enyemete inyamen bala lu edusit teni aputon; Naarai enonok adama kes, epupete kesi emunauto inyamen kesi.

⁸ Mam inyamen kitojokonte oni koking'are ka Akuju. Mam oni kirokarosi cut king'eroto oni akinyama kere ajokari kinyamata oni.

⁹ Kocoikinasi mam ajalakin alakakino kus einakin ng'ulu lu enonok akiyuun ibirokinosi aronus.

¹⁰ Abo kanyu itwan ijo, ni ijaasi ka akijen, inyemi ko otogo ka aputon, mam nu kebeikinete ainakin nesi de etau loka akote akinyama inyamen lu edusite aputon?

¹¹ Kosodi itwan ni enonok, onaci kon lo abu Kristo kotwana kanu keng', atwanare kanuka “akijen” kon!

¹² Kosodi kokipone kalo isomanakinete osi Kristo arokusio ka akisomanakin ikanacan ka akanacan lu kristayon kiton akikang'asa adama kes nu enonok.

¹³ Kanuka ng'unu kerait inyamen einakinete onac kang' ka kinaci kang' akisoma aronus, mam eong' kanyemi akiring' bobo, tetere emam kainakini onac kere kinaci kang' akibirokin aronus.