1 Ikorinton 6 - AKITUTUKET NAKITETET (NEPEPEKA ISABULIN KA AWARAGASIA)

Akiwosanakin Ikiristayon Ikulepek

¹ Ejii ipe kama kus ka amonyesait nama ka onac keng', elosi nesi king'aren kalu mam kedolito kere nama ka italauna?

² Mam osi kijenete ebe ebunete italauna atubkin akwap? Kilosete osi atubokin akwap, mam osi kibeikinete atubokin akiro nu edisiaka nu?

³ Mam osi kijenete ilosete osi atubokin imalaikan? Ikote konye ipuakarosi ayi, ikamuti akiro nuka ka akijar kana!

⁴ Kijaasi osi ka akiro bala ng'unu, inyo konye ipiakinata osi kesi king'aren kang'ulu kalu mam keraito luka ekanisa?

⁵ Alimuni eong' nu kanuka akitisilikin osi. Ebeikinosi ebe kama kus emam etwan lo eco nama ilesikina adaun agolopa kamaka ikanacana.

⁶ Konye elosi onac akiwosa onac, koking'aren kalu emam akiyuun?

⁷ Ajaus ka ekipone loka ewosane itodikit mam osi kiboyete bala Ikiristayon. Ejokunari kama kon ajalakin itung'a luce akikosakin ijo. Ejokunari kama kon ajalakin itung'a luce ayar kama kon lu eraito lukon.

⁸ Konye osi ikulopek itakadikinete ka akideme atikere ikanacana kus.

⁹ Mam osi kijenete ebe lumam kedolito mam kedumunete Ajakanut ka Akuju? Kojenete nu, lu eroko iponosio, lu ijaanakinete ajokin, lu edotee, ikiliok lu etiliosi ikiliok luce aberu,

¹⁰ ikokolaka, luka emwane, lukamerak, atikere lukademak mam kirumiete Ajakanut ka Akuju.

¹¹ Ice kama kus ekote neni. Konye adaun akilong' osi, akitalaun osi, etaraun osi lu idolito kokiror ka Lokapolon Yesu Kristo kiton kotoma Emoyo ka Akuju wok.

¹² Abeikini eong' atemar “Kacamakiite eong' asoma iboro kere, konye mam ng'ini ibore kejokuna kama kon. Abeikini eong' atemar ebe kacamakiite eong' asoma iboro kere konye mam kacamakini ibore ipede kitarau eong' ebulesut.”

¹³ “Inyamen eraito luka akook kosodi akook araun nakinyamen.” Kosodi Akuju amunaun kere. Akwana mam kesubite kanuka iponosio kalukarokok, konye kanuka Lokapolon, kosodi Lokapolon amunar akwana.

¹⁴ Kitonyou Akuju Lokapolon kosodi abunore akitonyouni oni de ka agogong'u keng'.

¹⁵ Mam osi kijenete ebe eraito awate kus atutubesia ka Kristo? Kanuka ng'unu abeikin eong' alemar atutubesia ka Kristo kasodi akitaraun kesi atutubesia amalayata? Mam cut!

¹⁶ Mam osi kijenete ng'olo lo imorikikinosi nesi ka amalayata eraunete akwana ape ka nesi? Naarai igirite, “Iyare ng'ulu eraunete akwana ape.”

¹⁷ Konye ng'olo lo imorikikinosi nesi ka Lokapolon eraunete kesi komoyo ibore ipe ka nesi.

¹⁸ Kinyekisi iponosio lukarokok. Arokusio kere nu isomaye etwan erait king'a ka akwan; konye etwan lo isomaye iponosio lukarokok isomakini akwana keng' nukarokok.

¹⁹ Mam ijo kijeni ebe akwana kon erait etogo ka Emoyo ka Lokalaunan kotoma kon, lo ainakini Akuju ijo? Mam ijo kijii bon;

²⁰ kiguelite ijo ka ikabele kalu ipu. Kanuka ng'unu kitur Akuju kotoma akwana kon.