1 Ikorinton 5 - AKITUTUKET NAKITETET (NEPEPEKA ISABULIN KA AWARAGASIA)

Iponosio lukarokok ko okelesia

¹ Kipokona inerai ebe ejii adoteu nama kus na epolo noi na mam kejaikina atekerio ace. Kosodi alimokin eong' ebe eperete etwan ka toto keng' naci!

² Ikote konye osi ipogasi ai? Tia osi akituur, ka alemar kokiding' kus lokisomae ibore bala ng'ini.

³ Atikere kaluana eong' kama kus ka akwan, aring'a eong' ajaasi ka osi ko omoyo; bala ajii eong' ng'ina ka osi.

⁴ Adau eong' kokiror ka Lokapolon wok Yesu atubokin etwan lokisomaye ibore eni nika ronon. Naitukokinototor osi nenipe, atukokinosi eong' ka osi komoyo, ka apedori ka Lokapolon wok Yesu lo ejaasi ka oni.

⁵ Ejii osi ainakin Asatanit komunau akwana keng' tetere etau keng' eyuuno kaparan ka Lokapolon Yesu.

⁶ Epogi kus mam kejokuna. Mama osi kijenete ebe isipa idis itubuyenenete akiria kere?

⁷ Kilotasi asipa nu mojong'a tetere osi iraunete akiria nukitetyak kwape ering'a osi kitubuna. Naarai Kristo imerekek wok nika Epaska adaun alemun erait isubanit.

⁸ Kinyekisi konye kenumunumata epucit, mere kasipa kanu mojong', asipa nuka rokok, konye kemugati kalo iitubuite ka alaus ka abeite.

⁹ Egirakiti eong' osi kobaruait kang' mam aupa ka itung'a kaluka iponosio lukarokok;

¹⁰ mere cut lukarokok ka akwap kana, kere luka emwane ka lukademak, kere lukejaanakinak akujun, ageun apak ng'ini ibusakina osi alomar kakwap kana.

¹¹ Konye bere egirakin eong' osi mam aupa kitwan kipede ni ejaasi kekiror kaloka onac kisomaye iponosio lukarokok kere emwane, kere ijaanakini ajokin, ekameran kere de ekademan. Mam atikere akinyam ka itung'a bala ng'ulu.

¹² Anyeka ejaasi ka eong' atubonokin itung'a luko king'a? Mam kerait ng'ulu lu ejaasi okanisa ibusakit osia tubokin?

¹³ Etubonokini Akuju ng'ulu lu ejaasi king'a. “Ireng'iyari itwan nika ronon kokiding' kus.”