1 Ikorinton 3 - AKITUTUKET NAKITETET (NEPEPEKA ISABULIN KA AWARAGASIA)

Lukejaanakinak ka Akuju

¹ Konye eong' ikanacan ka akanacan, mam kabeikini ejori ka osi bala itung'a luka emoyo, konye bala itung'a luka akwana, bala idwe kotoma Kristo.

² Abu eong' ketana osi kakile mere kinyamen kalu ketaasi ba; naarai amam osi kilokokina atikere kipokona de mam osi kilokokina.

³ Naarai ering'a osi ijarete bala itung'a luka akwap kana. Naarai ering'a alilit kiton ang'olopa ejii kiding' kus, mam osi kiraito itung'a lu eyaito awate, bobo ka ajaus kiponosio bala itung'a luka akwap?

⁴ Naarai ketema itwan ipe kama kus, “Arait eong' loka Paulo,” kosodi ice atemar, “Arait eong' loka Apollo,” Mam osi kiraito itung'a luka akwap?

⁵ Apollo nesi ng'ai? Paulo nesi ng'ai? Iraito siong' lukejaanakinak ka Akuju along'u lu idumunata osi akiyuun akitoro nama kes. Ng'in kere kama kosi isomae asoma nu abu Lokapolon kokoraki nesi.

⁶ Abu eong' keraik, Apollo nesi ecocoe, konye Akuju nesi etopolouni.

⁷ Kanuka ng'un, mam nikirae kere nikicocoe kerait ibore konye Akuju bon lo itopoloe.

⁸ Nesi lo irae ka nesi lo icocoe iriaka. Ng'in itwan ebuni adumun aropetait keng' atupa ka asoma keng'.

⁹ Naarai eraito lu ijaanakinakinete Akuju nenipe, osi nes emanikor ka Akuju kiton etogo keng'.

¹⁰ Atupa ka asianut na abu Akuju koinak eong', bala lokadukon lo epiriana, abu eong' kapesik apetetait kosodi konye etwan ece akiduk. Kinyek ng'in itwan kocoikina ekipone lo edukia nesi.

¹¹ Naarai mam bobo apetetait ace kepesikino adepar ng'in na epesikite, ng'in na erait Yesu Kristo.

¹² Kipokona keduk itwan apetetait kesawabu, epuesa, amoru nu elaete, akito, inya kakituk, akalias.

¹³ Asoma kang'in itwan itodunosi naarai itoduni apaaran ng'ini. Naarai itoduno kakim. Kosodi akimi akitetemor asoma nu esoma ng'in itwan.

¹⁴ Kekuata asoma ka etwan kepede kalo edukit apetetait akicweo, edumuni nesi aropetait.

¹⁵ Konye kesisioto asoma nuka etwan kepede, edumuni nesi atuaniar, konye nesi elope eyuuno akitoro toma akimi.

¹⁶ Mam osi kijenete ebe iraito osi Etogo ka Akuju, bobo Emoyo ka Akuju iboe kama kus?

¹⁷ Kemunau itwan Etogo ka Akuju, emunauni Akuju nesi. Naarai Etogo ka Akuju erait lokalaunan. Bobo osi ikulopek nes Etogo ka Akuju.

¹⁸ Mam itwan ipede aliokonor ilope. Kejii itwan ipede kama kus iitunene ebe eco nesi kokaru kalu, kinyek korau nesi ibang'ai tetere ebuni nesi acoyari.

¹⁹ Naarai acoa naka akwap kana erait abang'anut kamaka Akuju. Naarai igirite, “Ikamuni nesi luka acoa kotoma akijene kes,”

²⁰ agirasia ace nukalaunak ebalasi, “Ejeni Lokapolon ebe awomisio kaluka acoa emam adumunete.”

²¹ Kanuka ng'unu mam epogi kanuka itung'a. Naarai iboro kere eraito lukus,

²² kere kerait Paulo kere Apollo kere Kefas kere akwap, kere akijar kere atwanare kere kipokona kere nu ebuuto, nu kere eraito nu kus;

²³ bobo iraito osi luka Kristo; bobo Kristo erait loka Akuju.