1 Ikorinton 2 - AKITUTUKET NAKITETET (NEPEPEKA ISABULIN KA AWARAGASIA)

Akiro kuju ka Kristo lo ebubukin Omusalaba

¹ Ikanacan ka akinacan kang', na abunia eong' nama kus alimokin osi abeite na igwait Akuju, mam eong' abu ketosoma akiro nukapolok ka akisisia nakapolon noi.

² Naarai aring'a eong' ajaasi ka osi, abu eong' katiaku akimuruokin iboro kere adepar Yesu Kristo kiton kacut atwanare keng' komusalaba.

³ Na abunia eong' nama kus, anonok eong' bobo eceki eong' kang'olo wai ka akurianu.

⁴ Akisisianakin kang' ka akiro kang' mam apon kolemune ka akiro kanuka apirianut naka acoa ka etung'anan, konye ka agogong' ka Emoyo ka Akuju lo isimonikini.

⁵ Akiyuun kus mam kegwoi ka acoa ka etung'anan konye ka agogong'u ka Akuju.

Acoa ka Akuju

⁶ Kong'in de alimonori eong' akiro nuka acoa namaka ng'ulu lu icasito kotoma akiyuun. Konye mam kerait acoa naka akwap kana kere lukepugak lu ipugaete akwap na kere lukepugak lu itowoliete apugan kes.

⁷ Konye siong' kiinakinete acoa ka Akuju na imunonite kana igwaite, nu abu Akuju kitutubo ering'a ikaru wok luka ainakin oni akibusesu kedolo.

⁸ Emam lukepugak ipede luka ikaru kejenete nu; kere kejenete tin kesi mam kibubukito Lokapolon loka akibusesu omusalaba.

⁹ Konye kwape igiritere: “Nu mam akong'u kaanyuti kere akiti apupun, kere etau ka etwan ajenuni, nu etenaki Akuju ng'ulu lu eminasi nesi.”

¹⁰ Etodik Akuju oni kotoma Emoyo Lokalaunan. Naarai emoe Emoyo Lokalaunan iboro kajokis atikere akiro ka Akuju nuko toma.

¹¹ Ng'ai itwan ejeni awomowomosia ka itwan adepar emoyo ka itwan lo ejii toma keng'? Nes kwang'in de mam itwan ejeni awomowomosia ka Akuju adepar Emoyo ka Akuju.

¹² Kipokona idautu oni adumun mere emoyo loka akwap, konye Emoyo lo elomuuti kamaka Akuju, tetere oni kibunete ajenun idutan lukinakiit oni Akuju.

¹³ Kasodete siong' akisisianakin nu kakiro kanu mam kisisiakite ka acoa kanaka etung'anan konye kanaka Emoyo, itodianarete siong' akiro nuka emoyo nuka abeite kamaka ng'ulu kalu ejaatatare ka Emoyo.

¹⁴ Itwan ni mam kejaatatar ka Emoyo mam kedumuni idutan luka Emoyo ka Akuju, naarai eraito kama keng' abang'anut, bobo mam nesi kebeikini ajenun kesi naarai ejenunosi kesi kemoyo.

¹⁵ Etwan loka emoyo etubokini iboro kere, konye nesi elopet emam itwan etubokini nesi.

¹⁶ “Naarai ng'ai ajenu awomowomosia ka Lokapolon tetere isisianakini nesi?” Konye oni ijaasi ka awomosia ka Kristo.