1 Ikorinton 16 - AKITUTUKET NAKITETET (NEPEPEKA ISABULIN KA AWARAGASIA)

Edutat kanuka aking'arakin Luyuunak Luce

¹ Kipokona, ikamuuti idutan kanuka itung'a ka Akuju: Kisomata kwape alimokitere eong' ikanisan luko Galatia.

² Ng'in nake esabiti ng'in kere kama kus ejii akipiakin awai ikabel ice, atupa ka etyae kanu edumuti nesi, tetere emam kejaikin akituk ikabel apak na abunia eong'.

³ Kadau eong' abunere, ainakin eong' ipapulai luka akitejenun ng'ulu lu idautu osi aseun ka akiyakiari kesi ayar idutan kus Yerusalem.

⁴ Kejokuna eong' de alosite, euparosi kesi ka eong'.

Akitemitemisio ka Paulo

⁵ Abong'uni eong' nama kus kadau eong' aikar akitoro Makedonia — naarai ejii eong' alosite akitoro Makedonia

⁶ kere ejii eong' adaun apak ace ka osi, kere apak naka akiru etaa ci kere, tetere aking'arakinete osi eong' akitolosit ka elotete kang' ng'in alaro na abutu eong' alosite.

⁷ Akote eong' anyun osi noi mere atubi eong' along'u; amuno eong' abuni ajaus ka osi apak na euja, kiyuu Lokapolon.

⁸ Abutu eong' akiboi kane ko Efeso akitodolo apaaran naka Pentekost.

⁹ Ejii teni alaro naka asoma nukapolok kanu elaete, atikere kipuwak lu eng'erito.

¹⁰ Kebu Timoti kidiautu nesi tena kokiding' kus, naarai isomae nesi asoma ka Lokapolon bala eong'.

¹¹ Mam itwan ipede akitere nesi namakaronon, konye ejii osi aking'arakin nesi akitolosit elotete keng' kotoma akipuc, tetere nesi ebong'uni nama kang'; naarai edarit eong' nesi kiton kanacan ka akanacan.

¹² Kanuka onac wok Apollo, abu eong' kemaima nesi cut akipejokin osi nenipe kikinacana luce, konye mam arait amina keng' abunore kipokona. Ebuni kejaikinosi ka apak.

Akiro nuka Esial

¹³ Kidarete, kicasitete kakiyuun kus, kotitiny ka kicasit.

¹⁴ Kisoma asoma kon kere kotoma amina.

¹⁵ Ijenete osi Stefanas kiton ekale keng'; kesi nes Ikiristayon lu sodit ko Akaia, alemunosi kesi akijaanakin itung'a ka Akuju. Kemaimait eong' osi ikanacan ka akanacan,

¹⁶ akitup ayaite kitung'a bala lu, kiton ayaite kang'in kere ni isomaete ka kijaanakin ka kesi.

¹⁷ Alakara eong' noi kanuka abunore ka Stefanas, Portunato kiton Akaiko, naarai elelebata eng'el lo ajii kanuka akisala kus.

¹⁸ Abutu kesi kitalakasi eong', kwape kitalakarata osi. Kanuka ng'unu ejokuna akiitunun itung'a bala lu.

¹⁹ Ijukuto ikanisan luko Asia amalan. Akwila kiton Priska, nenipe ka ekanisa lo etukonokin otogo kes ijukuto amalan nake Kristayone.

²⁰ Lukeyunaka kere kane ijukuto amalan. Kimalakinosi ka nice kanuikin kanakalaunan.

²¹ Eong' Paulo egiri amalan kakan kang' kelope.

²² Ng'in kere nimam kemina Lokapolon, kilamai. Maranata — Lokapolon kosi, Kobuu!

²³ Kojii asianut naka Lokapolon Yesu ka osi.

²⁴ Kojii amina kang' kere nama kus kotoma Kristo Yesu.