1 Ikorinton 14 - AKITUTUKET NAKITETET (NEPEPEKA ISABULIN KA AWARAGASIA)

¹ Kitarau amina ibore ni ikote ijo, bobo koko ketau kon kere idutan luka emoyo, kacut tetere ibeikini ijo akidwara.

² Naarai ng'olo lo inera ka ang'ajepe mam kinerasi ka itung'a konye ka Akuju; naarai emam itwan ni ejeni nu inera nesi, konye edwari nesi kotau keng' nu mam kejenakaka.

³ Kakan kanace ng'olo lo edwari inerasi ka itung'a kanuka akiduku kesi, akitogogong' kesi ka akisiyeng'un kesi.

⁴ Ng'ulu lu inerasi kang'ajepa kanu egelegela edukosi ikulopek, konye ng'olo lo edwari eduki ekanisa.

⁵ Akote eong' osi kinerata kang'ajepa kanu egelegela konye cut akidwara.

⁶ Kipokona ikanacana kabu eong' nama kus enera kang'ajepa, inyena adumuni eong' mam eong' kainuti osi apukoret kere akijene kere adwarunete kere de akisisianakino?

⁷ Atikere iboro lumam akijar bala auleru kere adeudeu kemam keruosi egelakina, ikoni konye itwan ipede ejenuni inyena eramakite ai?

⁸ Kemam lo eboliaye arupepe kitoruoikiti kojokan, ng'ai elokokin ejie?

⁹ Kokipone kalope kang'olo, ikoni itwan ipede ejenuni nu inerasi osi kang'ajepa kanu egelegela kemam akiro kejenuna ai? Ewoliete akiro kus kouria.

¹⁰ Ipu ang'ajepa ka akwap, emam na emam kejaasi ka apolou.

¹¹ Konye kemam eong' kajeni ang'jepe na inerai, lu itosomaete eraito imo kama kang' ka rauni eong' de emoit kama kes.

¹² Kanu ilokinatatar osi adumun idutan Kemoyo, kotamakisi adumun iboro lu ing'arakinete akiduk ekanisa.

¹³ Itwaan eni inera ka ang'ajepa kanu egelegela, ejii akilipi edutat lo ka apedor naka alimor atenikina kanu alimor.

¹⁴ Naarai kelipi eong' kokipone kalo, teni ilipi emoyo kang', konye adama kang' mam kejaasi neni.

¹⁵ Inyena konye ekotokina eong' akisoma? Elipi eong' kemoyo kang', konye elipi eong' ka adama kang' de; alosi eong' ekiruke kemoyo kang', konye alosi eong' ekiruke ka adama kang' de.

¹⁶ Kiinakini ijo Akuju akiyalama kotau kon bon, Ikokinete itung'a luce lu ejaasi atuket etamarete “Ikote nepeneni” akilipe kon naka akiyalama ai? Emam kesi ekipone loka ajenun nu itemanari ijo.

¹⁷ Atikere kejokuna akilipe kon naka akiyalamikin Akuju, itung'a luce mam king'arakite atikere.

¹⁸ Eyalamikit eong' Akuju kanu abeikina eong' ejori kang'ajepa kanu egelegela tena akilanya osi kere.

¹⁹ Konye akolong' na ilipere ko okanisa ejokuna eong' akitosoma akiro akanyi nu ejenuna kanuka akisisianakin luce akilanya ejori aritai ka akiro ka ang'ajepa kanu egelegela.

²⁰ Mam asite idwe kawomowom kus, ikamuti arokusio, kositete bala idwe konye kopoloutete kakiitunun kus.

²¹ Kokisil igrite “Ebala Lokapolon, koroto kaloka itung'a kalu inerasi ang'ajepa nu egelegela alosi eong' ejori ka itung'a kang'. Alosi eong' ejori etosomae iponosio kimo, konye atikere kong'in de mam itung'a kang' apupun eong'.”

²² Kanuka ng'unu edutat lokejori kang'ajepa kanu egelegela erait akitodiaret kakonyen kalu mam kiyuuto, mere lu iyuuto, erait edutat loka alimonor akiro ka Akuju akitodiaret kamaka lukeyuunak mere kalu mam kiyuuto.

²³ Kerait konye ebe etukokin ekanisa nenipe kogeuni ng'in itwan ejori kang'ajepa kanu egelegela, kerait itung'a luce along'u kere lu mam kiyuuto ebunete okanisa mam kesi ketemarete ebe emerarito osi kere ibileri?

²⁴ Konye kedwarete kere, kosodi ng'in ni emam akiyuun nepepe ka ilong'ait kere akilom, ebunete akiro nu kere akibelokin nesi; kere akimaima nesi akibelokin adama keng',

²⁵ akitodolo nama elimoro nesi nu iguaiti kotau keng' kosodi akibirokin kakonyen keng' kwap, kogeuni aluronokin Akuju kiton alimor koking'aren ebe teni Akuju ejii kiding' kus.

Akicorakinet kotoma Okanisa

²⁶ Inyena konye ikanacan? Ibunete osi nenipe, ng'in itwan ka ekiruke, akisisianakino, apukokino, ang'ajepe kere alocokino. Kinyekisi iboro kere kisomai kanuka akiduk ekanisa.

²⁷ Kejaasi itung'a lu ejatatar kidutan lu kejori ka ang'ajepa kanu egelegela, kinyek kojaasi iare kere iuni, kojalanakinosi apak; kojii konye lokelocon epe.

²⁸ Konye kemam itwan ebeikin akilocokin ejokuna ataun tii ko okanisa kinere ng'in itwan bon kiton Akuju.

²⁹ Kinyek lukadwaraka iare kere iuni kinerata, kinyekisi konye luce kipimata nu inerasi kesi.

³⁰ Kepukokin itwan ice ni iboye kaneni, ejokuna itwan ni sodit akililing'.

³¹ Naarai ibeikinete osi kere akidwara ipe kedau nice, tetere luce kere elakarosi;

³² kosodi edutat loka akidwara ajaus akanin ka lukadwarak.

³³ Naarai Akuju mam kerait Akuju naka akigurokina konye naka aipuc.

³⁴ Ejii aberu aliling'ite ko okanisa. Naarai mam kesi kecamakiite ejori, kwape ebalare ekisil loka Iyaudin ebe mam kesi ajaus ocolon'go luka apolou.

³⁵ Kejii ibore ekotosi kesi ajenun, kinyek kesi king'itata ikilioko kes kore. Naarai erait asilutu kamaka aberu ejori ko okanisa.

³⁶ Inyena! Kegeuni akirot ka Akuju kama kus kere osi bon kedoloki akirot ka Akuju?

³⁷ Kejii itwan ipede iitunene ebe nesi ekiyakia ka Akuju kere ejatatare nesi kedutat loka Emoyo, kojeni ebe nu egirakiti eong' osi erait ekisil ka Lokapolon.

³⁸ Konye itwan ni mam kanyuni nu, mam itwan ipede apodo itwan ng'ini.

³⁹ Kanuka ng'un ikanacan ka akanacan ejii osi ajaus ketau loka akote araun lukalimonorak akiro ka Akuju; konye mam akiteng'ere itwan ejori ka agajepa;

⁴⁰ konye iboro kere kisomai kokipone kaloka acoite kiton kokipone kalo elae.