1 Ikorinton 12 - AKITUTUKET NAKITETET (NEPEPEKA ISABULIN KA AWARAGASIA)

Idutan ka Emoyo Lokalaunan

¹ Ikamuti idutan ka Emoyo Lokalaunan, ikanacana ka akinacan mam eong' kakote osi awolite.

² Ijenete osi ebe ering'a osi kilokonyuna, kitoliorite osi aputon nu mam kinerasi.

³ Kanuka ng'unu akote eong' osi ajenun emam itwan inera ka Emoyo ka Akuju ebeikini atemar “Kilamitete Yesu!” Bobo emam ipede ebeikini atemar “Erait Yesu Lokapolon” adepar Emoyo Lokalaunan.

⁴ Idutan ka emoyo egelegela, konye Emoyo jepeje;

⁵ egelegela akijaanakin, konye Lokapolon jepeje;

⁶ egelegela asoma, konye Akuju yapeya nesi einakit kesi kere kang'in itwan.

⁷ Ajaus kemoyo itodun kokipone kece kamaka ng'in itwan kanuka ajokus ka itung'a kere.

⁸ Emoyo einakin etwan ice acoa, ice akijene, kwape ekotore emoyo lope ng'olo. Emoyo

⁹ lope ng'olo einakini itwan ipe akiyuun ice apedor naka akitang'aleun,

¹⁰ nama kice de edutat loka awumosia, ice edutat loka akidwara, ice apedor naka akitiaka imoyoi, ice ang'ajepa nu egelegela, ice akijene ang'ajepa.

¹¹ Nu kere etodia Emoyo lope ng'olo, lo einanakini itwan kwape ekotore.

Akwaana Ape ka Atutubesia nu ipu.

¹² Kwape eraitere akwana ape kojaasi katutupesia nu ipu, ering'a erait akwana ape, ikoni kong'in ka Kristo.

¹³ Kokipone kalope kang'oli, oni kere kerait Iyaudin kere Igirikin, ijoloi kere lu elakakina, apon kibatisai oni kere araun akwana ape kotoma omoyo lopeng'oli, bobo ainakin oni kere emoyo epe ng'oli akimata.

¹⁴ Naarai akwana mam kejatatar ka atutubet ape konye lu ipuaka.

¹⁵ Ketema akeju, naarai mam eong' karait akan, mam eong' karait naka akwana, ng'un mam kitaraunete nesi ibore nikaditan ka akwan.

¹⁶ Abo ketema akiti, “naarai mam eong' karait akong'u, mam eong' kajii namaka akwana,” ng'un mam kitiditeuni araus keng' atutubet ka akwan.

¹⁷ Kere kerait akwana kajokis akong'u, aibo ejaikin akitere? Kere keraut akwana kajokis akit, aibo ejaikin aking'uu?

¹⁸ Konye kwape ejare, abu Akuju kitemeteme iboro ka akwan, ng'in ipe kama kes, kwape ekotore nesi.

¹⁹ Tya emam akwana kere kerait ibore ipe!

²⁰ Kwape ejare, ejaasi iboro lu ipuaka konye akwana ape.

²¹ Mam akong'u kelimokini akan, “mam eong' kakote ijo,” kere bobo akou nama kakejen, “mam eong' kakote ijo.”

²² Kong'in de iboro ka akwan lu esiti bala enonok eraito iboro lumam akwana kebeikina akijar mam ekejatatar.

²³ Kosodete alarosinioi nu etunenete oni emam adumunete cut nesi eraito nu edarete oni kesi noi; koraunete alarosinoi nu etakanete mam kejoka cut, idario cut,

²⁴ mam atutubesia akidario cut kekotose. Akuju alope nes epiaki akwana nenipe kokipone kaloka ainakin akibusesu na epolo alarosnoi nu ekotosi.

²⁵ Kanuka ng'unu emam atyakatyaka kotoma akwana, konye alarosnoi keng' kere imorkikina nenipe.

²⁶ Kiira alaro ape apipilu alarosinoi nuce de iirarete apipilu, kitamai alaro ape alarosinoi nuce de emorete alakara.

²⁷ Kipokona iraito osi akwan ka Kristo. Ng'in itwan erait atutubet kakwan kang'in.

²⁸ Adau Akuju aseun ikiyakia, lukiyareit ikadwarak, lukiuniete lukesisianakinak, kotupakinete lukesomak aumokineta, kotupakin luketang'aleunok, lukejaanakinak, lukepitaka, lukenerak kang'ajepa kanu egelegela.

²⁹ Irait ijo ekiyakia? Irait ijo ekadwaran? Irait ijo lokesisianakinan?, Isomaite kesi kere aumokineta?

³⁰ Ejaasi kesi kere kidutan luka akitang'aleunun? Inerasi kesi kere kang'ajepa kanu egelegela? Eraito kesi kere lukejulak?

³¹ Konye kokotosi idutan lu epoloko. Kasodi eong' akitodikin osi bobo eroto lo elaye cut.