1 Ikorinton 11 - AKITUTUKET NAKITETET (NEPEPEKA ISABULIN KA AWARAGASIA)

¹ Kisomata kwape esomanana eong', ekipone lo egwapitere eong' nu isomaenene Kristo.

Aburite akou kotoma alipasia

² Ketamae eong' osi naarai iitunenete osi eong' ng'in pak bobo itupata osi akisisianakino na ainaki eong' osi.

³ Konye akote eong' osi ajenun ebe epolo Kristo kama kitwan kere, ekilokit epolokit aberu keng', kosodi Akuju epolo kamaka Kristo.

⁴ Kanuka ng'unu etwan lowilipi kere elimori akirot ka Akuju koking'aren erapakiti akou keng' itakadikini Kristo.

⁵ Aberu kere na ilipi kere de na elimonori akirot ka Akuju koking'aren emam ibore ipede kakou keng' itakadikini okilen keng'; emam agelakinet kama keng' kiton aberu na ebarenite akou keng'.

⁶ Kemam aberu kerapakini akou keng' ejokuna nesi abaren itima keng'. Naarai erait asilutu aberu abaren akou keng' kere akitubu itima keng', ejokuna nesi arapakin akou keng'.

⁷ Mam etwan kekotokina arapakin akou keng', naarai itoduti nesi aputo nepepe ka akibusesu ka Akuju. Konye aberu itoduti akibusesu ka etwan;

⁸ Naarai mam etwan asubuno kanuka aberu, konye aberu kama ketwan.

⁹ Mam etwan asubuno kanuka aberu konye aberu asubuno kanuka etwan.

¹⁰ Kanuka imalaikan ejii aberu ajaus kani erapakit akou keng' akitodikin ebe ejii nesi kwap ka apedor kokilen keng'.

¹¹ Kang'aleu wok kotoma ka Lokapolon mam aberu ayaara bon emam etwan, kere mam etwan ayaara bon emam aberu.

¹² Naarai aberu asubuno kama ke etwan, kokipone kalope kang'olo etwan idouti aberu; erait Akuju eyauni iboro kere ajaus.

¹³ Kotiakutu osi ikulopek kejokuna aberu akilipi Akuju koking'aren ka itung'a mam ibore kakou keng'.

¹⁴ Inyo, kisisianakini oni ejautone elope ebe itima lukaujaka kakou ketwan erait asilutu,

¹⁵ konye kakou ka aberu erait ibore nika alaus. Itima keng' lu einakite nesi akitosoma bala irapitono.

¹⁶ Konye kekote itwan ipede apega kanu, ng'unu nu abeikini eong' atemar ebe mere oni kere ekanisa ka Akuju ejaatatar ka ikisila ice luka akimaa.

Inyamen ka Lokapolon Luka ebong'

¹⁷ Ka akisisianakino kana etupakini, mam eong' ketamaye osi, naarai atukonokin kus akilip emunari noi akilanya ajokun.

¹⁸ Nasodit adaun alimokin eong' itiakaka osi kakiriameta kus; eyuut eong' nu erait abeite.

¹⁹ (Tar kojaasi awomowomosia nu egelegela nama kus, tetere ng'ulu lu ejaasi abeite aanyuno kojokan).

²⁰ Na riamakinototor osi, mam kerait inyamen ka Lokapolon luka ebong' inyemete osi.

²¹ Ekipone lo inyamata osi ng'in itwan eikarete kalu keng' inyamen, akitodolo nama ideunototor ice aarit eteng'e ice emerasi.

²² Mam osi kidumuto lukus bon ireria lu inyamata osi kamata? Kere itamamuto osi ekanisa ka Akuju ka ainakin asilut itung'a lu icanasi? Inyena ikotosi osi eong' katema? Keturu eong' osi? Teni mam!

²³ Naarai ediau eong' kamaka Lokapolon akisisianakin na abu eong' kainak osi: Ebe Kristo, akware nake gwelarere nesi, kolem atutubet kemugatit,

²⁴ kiyalamik Akuju, kobil, kosodi atemar, “Na nesi akwana kang', na ejii kanu kus. Kisomata nu akiitunana eong'.”

²⁵ Kokipone kalope kang'olo, kedaun akinyama lukebong'o kolem ekikopot kosodi atemar, “Ekikopot lo erait akitutuket ka Akuju nakitetet, enueskite ka aokot kang'. Na imasiata osi kisomayete kong'in akiitunana eong'.”

²⁶ Naarai na inyamata osi emugatit lo ka akimata ekikopot lo, ilimorete osi atwanare ka Lokapolon akitodolo na ebunia.

²⁷ Ng'in kere ni enyemi kere akimata ekikopot ka Lokapolon kokipone kalo mam kelae esoma aronus kamaka kwana ka Lokapolon kiton aokot keng'.

²⁸ Kinyek etwan king'itakin elope, kosodi akinyama emugati kiton akimata ko kikopot.

²⁹ Naarai kemam itung'a kejenete apolou ka akwan ka Lokapolon na enyamata emugati kiton akimata ko kikopot, eyaunete kesi atubokino nama kes kikulopek enyemete ka akimata.

³⁰ Kanuka nu nesi inonok osi ka adeka, adautu lu ipuwaka atwanare.

³¹ Keng'itakinosi oni ikulopek, mam oni kitubokino.

³² Konye kitubonokini oni Lokapolon ka akisican oni, tetere emam oni kitubokino nenipe ka akwap.

³³ Kanuka ng'un ikanacan ilosete osi akinyama, kidaraunonosi.

³⁴ Kejii ni aariti eteng'e kinyekisi ng'in konyama kore, tetere Akuju mam kitubokini osi nairiamakinototor osi nenipe. Akiro nuce adauni eong' kabu eong'.