1 Ikorinton 10 - AKITUTUKET NAKITETET (NEPEPEKA ISABULIN KA AWARAGASIA)

Akikwenyareta kuju ka Aputon

¹ Ikanacan akote eong' osi ajenun ebe kes ka papa wok ajaasi kere kwapa kedou, kosodete kes kere atubor kang'ololo.

² Kesi kere kepon kibatisai araun ibore ipe ka Musa kotoma odou kiton ang'ololo.

³ Kosodete kesi kere akinyama inyamen alomun kokuju

⁴ ka akimata imatan luko kuju. Naarai abutu kesi komatata kataba kanako kuju na abu kotup kesi, ataba kerait Kristo.

⁵ Atikere kong'in de, lu epuak mam akitalakar Akuju, naarai apon kilanyai kesi komoding'.

⁶ Kipokona iboro lu eraito aikwenyareta kama wok, mam akote nukarokok kwape kes.

⁷ Mam araus itung'a lu iboete along'u kwape igiritere, “Kepotu itung'a kiboikinosi akinyama ka amata kosodete anyouni akileje.”

⁸ Mam oni akilomo cut oponsio lukarokok kwape kepotu ice kama kes kisomata, kosodi alukumin akaisi aare ka iuni akibiror atwanare ka apaaran kape.

⁹ Mam oni akitama Lokapolon kwape kisomata ice kama kesi kosodete imunuo akiara kesi;

¹⁰ kere apodo kwape kepotu kice kama kes kisomata kosodi lokamunaunan amunar kesi.

¹¹ Kepotu iboro lu kisomakinosi kama kes bala akikwenyar, konye kepon kigirai kesi bala akicorasia, naarai kijari oni kapak kana aputere esial adolun.

¹² Kanuka ng'unu kinyek ng'in itwan ni iitunene ebe eguoi tena kocoikina mam akibiror.

¹³ Emam atamisio nu idumutu osi nu mam keraito nuka etung'anan kere. Erait Akuju lo emunokina, bobo mam nesi kinyekini kotamai osi akilanya apedor kusi, konye nepepe ka atamisio einakini nesi osi apedor naka atitinyu ka erot loka akilanya.

¹⁴ Kanuka ng'un lu minata, Kinyekisi aluronokin aputon.

¹⁵ Enerasi eong' ka osi bala itung'a lu ejenete; kotyakutu osi ikulopek kamaka nu atema eong'.

¹⁶ Ekikopot loka asuluany lo isuluanyikini nesi, mam kerait akimoro aokot ka Kristo? Emugati lo kibili nesi mam kerait akimor akwana ka Kristo?

¹⁷ Naarai ejii emugatit epe, oni lu ipuaka iraito akwana ape, naarai oni kere kimori emugatit epe.

¹⁸ Kitete itung'a luko Israel; mam ng'ulu lu enyemete isuban keraito ikamorak ka altari?

¹⁹ Inyena konye akote eong' atemar? Ebe inyamen lu edusite aputon eraito ibore ipede kere ebe aputo erait ibore?

²⁰ Mam, abala eong' ebe nu edusete ikapirin edusite ipara mere Akuju. Mam eong' kakote osi akimoro ka ipara.

²¹ Mam osi kimasete ekikopot ka Lokapolon kiton lokipara.

²² Ikotosi oni ainakin Lokapolon alilit? Icasito oni akilanya nesi?

²³ Ebalasi kesi, “Kijalakiite oni asoma ng'in ibore.” Ng'in erait abeite konye mere ng'in iboro ejokuna. Ecamakiite oni asoma ng'in ibore konye mere ng'in ibore ejaasi ka adumunete

²⁴ Mam akinyekin ng'in itwan kokote na keng' bon ajokun, konye ajokun ka opaduko keng'.

²⁵ Ilakakina ijo akinyama ng'in ibore ni itegwelio kosokoni kaloka akiring' mam king'isit aking'iseta apede kanuka etau kon.

²⁶ Naarai “Akwapa erait naka Lokapolon kiboro kere kotoma keng'.”

²⁷ Kenyarau epe lo mam kejaasi ka akiyuun ijo akinyama kolokokina ijo alosit, konye lu einakino ijo mam eking'isite ibore ipede atupa ka etau.

²⁸ Konye kelimoki itwan ijo, “Inyamen lu elemuute eraito isuban,” mam akinyama inyamen ng'ulu, kanuka ng'olo lokelimokin ijo kiton kanuka etau

²⁹ mere etau kon konye etau ka itwan ka nice. Kanu kinyo itiditeutere alakakina kang' kanuka etau kitwan kice?

³⁰ Keyalamik eong' Akuju kanuka inyamen kang' inyo itoronaara itwan ice eong' kanuka inyamen kalu eyalama eong'?

³¹ Kanuka ng'unu, ng'un kere nu isomae ijo, atikere kerait akinyama kere akimata, kisoma kere kanuka akibusesu ka Akuju.

³² Kiboete kokipone kalo mam keyauni icani namaka Iyaudin kere namaka Ilong'au kere okanisa ka Akuju.

³³ Kisomata kwape esoma eong'; atamakit eong' akitalakar ng'in itwan, mam keitunene ajokun kang' konye ajokun ka itung'a kere tetere kesi eyuuno.