1 Ikorinton 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Paulo lo anyarauno atupa ka akote ka Akuju araun ekiyakia ka Kristo Yesu, ka alomun kamaka onac wok Sostene.

² Nama ka ekanisa ka Akuju lo ejii Korinto, namaka ng'ulu kere lu enyaraute araun itung'a lukalaunak, lu eraito lukeng' imorikikina nenipe ka Kristo Yesu, nenipe ka itung'a kere luka ng'olo wai lu eluronokinete Lokapolon wok Yesu Kristo, Lokapolon kes kalo wok.

³ Koinak osi Akuju papa wok kiton Lokapolon Yesu Kristo asianut ka aipuc.

Asulwany kotoma Kristo

⁴ Ainakiiti eong' Akuju akiyalama ng'in paaran kanu kus naarai asianut ka Akuju na apon koinakine osi kotoma Kristo Yesu,

⁵ kepon kitajakanai osi korotin kere kotoma keng' kejori kere kiton acoa kere.

⁶ Akiro kuju ka Kristo adautu akicata kama kus

⁷ ebe mam osi kisalito adumun asulwany, idarito osi kopukokine osi Lokapolon wok Yesu Kristo.

⁸ Bobo ebuni nesi ainakin osi akicasite akitodolo osial, tetere emam osi aronus apaaran ka Lokapolon wok Yesu Kristo.

⁹ Akuju emunokina, lokenyaraunere osi toma akimorikikina ka Okoku keng', Yesu Kristo Lokapolon wok.

Atiakatiaka ko Okanisa

¹⁰ Kemaimait eong' osi ikanacan ka akinacan kokiror ka Lokapolon wok Yesu Kristo ebe osi kere akiirar komam ang'olopa kokiding' kus. Konye kimorikikina kotoma awomisit kiton atubokino ape.

¹¹ Naarai adautu itung'a ka Kloe alimokin eong' ebe ejii ang'olopa kiding' kus ikanacan ka akinacan kang'.

¹² Nu apeleikiit eong' erait ebe ng'in itwan kama kus ebala, “Arait eong' nika Paulo,” kere “Arait eong' nika Apollo,” kere “Arait eong' nika Kefas,” kere “Arait eong' nika Kristo.”

¹³ Etiakaka Kristo? Kepon kibubukine Paulo kanu kus? Kere kepon kibatisai osi kokiror ka Paulo?

¹⁴ Eyalamikiit eong' Akuju ebe mam eong' kebatisat itwan ipede kama kus adepar Krispo ka Gayo;

¹⁵ Mam itwan atemar kibatisauno nesi kokiror kang'.

¹⁶ (Ebatisat eong' bobo etogo ka Stefanas. Kuju kaneni mam eong' kajeni kebatisat eong' itwan ipede).

¹⁷ Naarai mam Kristo abu kijukia eong' akibatisa konye alimonor Akiro Nukajokak, mere ka apedor kanaka acoa, tetere emam kelemaro agogong' kemusalaba ka Kristo.

Kristo nes Agogong'u ka Acoa ka Akuju

¹⁸ Naarai akirot naka emusalaba erait abang'anut kamaka lu etwakiyarete, konye kama wok kalu iyuuno erait agogong'u ka Akuju.

¹⁹ Naarai igirite, “Amunauni eong' acoa kaluka acoa, kiton apirianut kalu epiriaka. Acakari eong' nama eluana.”

²⁰ Ali etwan lo eco? Ai ejii lokegirigiran? Ai ejii loka pegan lokaturi kana? Mam etusubu Akuju acoa naka akwap kana abang'anut?

²¹ Naarai ageun sek, kotoma acoa ka Akuju, amam akwap ajeni Akuju atupa ka acoa. Abu kominak Akuju kotoma abang'anut kana ilimonorete oni alakun ng'ulu lu iyuuto.

²² Iyaudin ekotosi akitodiareta, Igirikin ekotosi acoa,

²³ konye siong' kilimonorete kuju ka Kristo lo ibubukiite, ibore ni iguinikini kamaka Iyaudin kiton ni erait abang'aanut kamaka itung'a kaluka Akwap,

²⁴ konye kamaka ng'ulu kalu enyaraute Iyaudin kiton Igirikin, Kristo agogong'u ka Akuju kiton acoa ka Akuju.

²⁵ Naarai abang'anut ka Akuju ejaasi ka acoa akilanya itung'a, anonoku ka Akuju ejaasi ka agogong'u akilanya itung'a.

²⁶ Naarai kiteoto anyarauno kus ikanacan ka akinacan. Amam lu epuaka kama kus ajaasi ka acoa atupa ka ekipone lo itoo akwap. Amam lu epu kama kus ajaasi ka agogong'u kere kidoute koreria kalukeyong'ite.

²⁷ Konye aseu Akuju lu ebang'aaka ka akwap akitisilikin luka acoa. Koseuni Akuju lu enonok kakwap akitisilikin luka agogong'u.

²⁸ Koseuni Akuju iboro lu emam adumunete kalu enwang'ite kakwap, atikere iboro lu mam kejaasi akitamamun iboro lu ejaasi,

²⁹ tetere emam itung'anan ebeikini ipede ejaikinosi kepogi koking'aren ka Akuju.

³⁰ Nama keng' nes elomuuter akijar wok kotoma Kristo Yesu lo abu Akuju kitarau acoa wok, akitodolikina wok, akitalauno wok ka alakuno wok.

³¹ Kanuka ng'unu kwape igiritere, “Kinyek ng'ini ni ipoga, kipoga kanuka Lokapolon.”