Zake 5 - Tege Kiwoyeti (teg) NT Portions

Eyiezi ba angaa kabaga

¹ Ŋa yiga leyuga mi, be angaa kabaga! Lelila bila osarigi ma andogo ma maava kayila be!

² Kabaga ka be kama mbolo, ŋa ancyeri a ma ja amfa a be.

³ Nore le be ŋa ampara a be amafuga ma mwanga. Mwanga yia ye je kamvyere otemi ma be. Nde aje kaja akabi anjuru a be mva mbaa. Kabila be lema kuzuga kabaga nca ecugu embiza.

⁴ Leyuga! Wura le be le mbizi kampa ajanji ba ajanji nca angwunu a be leta osarigi yila ecu e be. Esarigi ba anjanji etoyi tii acu a Mfumu wooli ŋa mpari ya ye vula maami aso.

⁵ Yila ncie, be le ki ka kabakari ba kabaga, be lesi ba ejii be. Be le vi maari, mva anyama ma cugu le ba acaga akii.

⁶ Be le ma apama, ŋa lema buma baali tele, eli bo ba aka juana bila be ŋi.

Kajila ŋa kabwono

⁷ Adumu, lesa ajila tii ka ya Mfumu. Lekese okuni. Nde li ma kajila ndi ncie empa mburu yeemve. Nde ajila kasibi ka mvula ka ncomi tii kasibi ka mvula ka mbiza.

⁸ Be se lesa ajila, leka ŋa kawasi, kabila eyi e Mfumu yiga tuga.

⁹ Le mbiza kaŋiina ka mpanaŋa be, adumu, mi ni Njyami ka mbiza kampama be. Lemono opami, nde li ka kadubugu ka be!

¹⁰ Adumu, antuma Njyami ba awobi ma ye Mfumu, amoni mpasi bila kajila. Le ka mva bo.

¹¹ Bizi le lyele ni kase ŋa baari ba baasa mpana. Be le maayuga ka alyele ma mpana Zobe. Ŋa be le yayi ba mpi Mfumu nde ka emani. Okorogo, Mfumu ŋa bege le njya ŋa nyia.

¹² Ye ncomi adumu a mi, le mbiza kalaba okezi. Le mbiza kalaba ma a yulu, ncye sikali kalogo ka kima! Lelyele otu «ee» Ntini ye ee, ŋa «kali» Ntini ye kali, mi ni Njyami aka ma pama be ŋi.

¹³ Mbuuru kanca mpanaŋa be li nca mpasi? Ndi nde bwoni. Mbuuru kanca mpanaŋa be li nca kase? Ndi nde kayuma alwumu a Njyami.

¹⁴ Mbuuru kanca mpanaŋa be li ŋa ngayi? Ndi nde kacwolo akuuru ba Okuga, ŋa ndi akuuru abwoni ma nde, ŋa ayiri atagi amaari ake yila nde ma a Mfumu.

¹⁵ Ŋa obwoni wo baasa bila lila, aje kavuzuga wooli ŋa ngayi. Mfumu avuta nde ma otele, ŋa aka nde si maami maabi, nde ba aje kabologo.

¹⁶ Yiga leya amaami maabi a be ka miizi ma abuga, ŋa lebwono ka mpanaŋa be, ma buni be lewuuma. Ebwoni e balaga le tele ba esa bila mpari e kuna.

¹⁷ Eli ntuma Njyami kiigi mbuuru wo ma wuana bizi a be. Nde kaselege bwono ni mvula ka mbiza ka va, ŋa mvula ki va ŋi ma antini ba esibi etari ŋa katini.

¹⁸ Amana bwa, nde vuri bwoni ye nyarigi, ŋaa yulu e mpi mvula, ŋa ncie e mpi mburu a nde.

¹⁹ Adumu a mi, aka mbuuru kanca mpanaŋa be ma anyuoŋo laa ŋa jaajaa, ŋa okima ka ya vuruga bila nde,

²⁰ ndi nde yayi ni mbuuru wo aya vuruga bila ngaa maami maabi ma njila eli nde ma anyuoŋo nde aje kavuzuga nde ma leku ŋa aje kabaga akolokolo ma kuna le amaami maabi.