Zake 4 - Tege Kiwoyeti (teg) NT Portions

Ondigi ma okiri

¹ Lebila bila anguru kunu maawa kanca mpanaŋa be? Bo kaya ma ekani e be beebi ba ba selege kajuana nca be, ki bwa ŋi?

² Be le jii kalogo ŋaa be le ki baga ŋi. Ŋaa be pa ma kabuma. Be ŋa njala kalogo, ŋa be le ka buna baga ko ŋi. Ŋaa be lecuna nca anguru ŋa lebila. Be le ka baga ba jii be ŋi ma bwa be le kapiza lo ŋa Njyami ŋi!

³ Be le piza ŋa le ka baga ŋi? Ŋa ni be le piza oco oca! Be le piza ma ekani e be ankulu beebi.

⁴ Be leeli mva akaazi ba amaasa ncuuma! Be le ki ya ni lejya okiri, ŋa kabele le Njyami ŋi? Wo saga ka ndigi okiri yiga mi kiriga onyuo Njyami.

⁵ Be le cimiŋa ni kalakali ni eteendi ba elyele ndi: «Njyami ŋa yala ma oduduma wo kalegi ma bizi a be?»

⁶ Ŋaa puga le Njyami le ka vura mpa bizi a be leenini. Okorogo, bo ba alyele se ndi: «Njyami ajuana ŋa angaa nkamba. Ŋaa nde ampa puga ma baali ŋa etuma e samisami.»

⁷ Ŋaa lenyima Njyami. Lejuana ŋa jabiri, ŋa nde kaduma laa ma be.

⁸ Leya ciina mpana Njyami, ŋa nde ka ya ciina ka li be. Lecuka njyala e be, be ba leeli ŋa maami maabi! Lesa ni etuma e be eka cece, be ba leeli etuma ama kaba!

⁹ Lemono obi, le ka ma ankwono, le lila! Lekaala lesebi le be ma ankwono. Ŋa lekaala kase ka be ma ndogo.

¹⁰ Lekaala etuma e be eka samisami ka miizi a Mfumu, ŋa nde kasata be.

Biza kampama dumu omon

¹¹ Adumu, lebira kalyele maami maabi ma abuga. Wo alyele maami maabi ma dumu a nde sikali wo pama, alyele maabi ma ngiri a Njyami ŋa apama lo. Ŋa aka we apama ngiri, we akama nyima ngiri ŋi, we opami lo.

¹² Ŋi, Njyami otu o mpa ngiri ŋa wooli opami; nde otu abuna kavuzuga ŋa kasa kabuma. Ŋaa we, we na ma kampama buga lengulu?

Eyiezi ma kajogo

¹³ Ŋa leyuga mi lesa oyeri, be ba lelyele ndi: «Lubu sikali mbari, bizi leje nca kangundu ki, bizi le ka kakwa kasibi kamon. Bizi lesa omungu, bizi le baga ampara.»

¹⁴ Be ba lelyele mva bwa, be le kiya lemigi le omwon o be mbari ŋi! Okorogo, be mva lebwuyi le lecwuga ntini mon amana le nyuoŋi.

¹⁵ Asoke be lebuna kalyele yemiŋi ni: «Aka Mfumu jii, bizi leje kaka ŋa bizi leje kasa bu sikali bwa.»

¹⁶ Ŋaa yiga, be lejogo ma ajaa ma sagi sa be nca nkamba le be. Nkamba leso le mva bwa lebi.

¹⁷ Ŋaa aka mbuuru yayi leve kasa ŋa ki sa ŋi, nde asa maami maabi.