Zake 3 - Tege Kiwoyeti (teg) NT Portions

Lempele

¹ Adumu a mi, le biza kaka kuna ma kayiziga , kabila be leyayi ni bizi ba le yiziga, bizi ba apama ŋa nkeri ye osizi.

² Bizi a be aso leva nca amigi kuna. Aka mbuuru kini va ma ewobi ŋi, nde yiele, nde abuna ka mfumu a njuru a nde-ankulu eso.

³ Aka bizi le elege oce nkozo omon nca enyua ba akabela ma kasa bo kanyima bizi, bizi a be lebuna bira anjuru a bo aso.

⁴ Le cimiŋa avaari ba anini. Se bo avuli onini, ŋa ni apyebi ankeri ma ciniŋa bo levuzu, ba bira bo bila ka kapanja ka ekyege ŋa bo ba aje kacu ka jii wo abira vaari.

⁵ Ŋa se mva bwa, lempele kabari ka ekyege kamon ka njuru, ŋaa nde abuna kajogo ma biibi beenini. Lemono mva mbaa mon ye ekyege ye buna kabuzuga swaga woonini!

⁶ Lempele se mbaa mon. Ŋa omfumu boobi ba bo ka nca njuru a bizi a be ŋa nde acala obi nca omwon ba ociina o bizi a be. Kanasa ma mbaa ye yeebiza kaduma, nde kabuzuga omwon o bizi a be aso.

⁷ Baari amwon ba abuna kasa kanyima ankaaga aso ba anyama a swaga, anyoyi, ba baakonoŋo bila ancu, ŋa ma bwa bo asi bo kanyima.

⁸ Ŋaa mbuuru eli abuna kasa kanyima lempele le nde kali. Lempele kalogo keebi lo le kaka pi ŋi. Nde ma alwula ma okemi wo ampa leku.

⁹ Bila lempele, bizi le yuma alwumu a Mfumu, Taara bizi a be. Bila nde se, bizi lecuna amaami andoki ŋa abalaga eli Njyami maasa ma kalii ka nde.

¹⁰ Ŋaa mbari ya le yuma alwumu a Njyami ŋa mbari eli le logo baari ye cwuga ma onyua nde-ankulu wua. Adumu a mi, ave lo lebiza kaka bwa.

¹¹ Anja maave bila anja ma nkali ma abuna cwuga ma nculu yo ankulu yia?

¹² Adumu a mi, ofingye omon akabuna kampa olivye omon sikali vinye omon mpi ofingye? Kali! Ŋa nculu mon yeeli ŋa ongba ki buna sa kacuzuga anja maave ŋi.

Ncimi ya yeewa yulu

¹³ Mbuuru kanca mpanaŋa be ka cimiŋa ndi nde ŋa ncimi bila oyeri? Ndi nde kamvyere ma ka ku ka nde keeve, ma esima ba asa nde bila otuma omon woove ŋa bila ncimi.

¹⁴ Ŋaa aka nca etuma e be ŋa mfunuŋa mwon e nkeri ŋa kapundu kamon ka yala, be le mbizi kajogo ma ncimi ŋa be le mbizi kalyele mbari yeeli ka asisyele ŋi.

¹⁵ Ncimi yia ye kawa yulu ŋi. Yo ye okiri wu, yo e baari ba akami Njyami, yo ye ya ma epundu beebi.

¹⁶ Kabila kaŋaa biri ye ka mfunuŋa mwon e nkeri ŋa kapundu ka yala, ye ka se maami ma oca ŋa ankaaga ba esima beebi.

¹⁷ Ŋaa ncimi e yulu ebani cece, amana, nde aya ŋa kadusu bila ove, nde kasaga kavunuŋa, nde ma alwula ma ove, ŋa nde ampa esima beeve. Nde aka baya baari ŋi, ŋa nde ompyele kali.

¹⁸ Baari ba asala nca kadusu kakuna kadusu, ŋa bo kabaga opami.