Zake 2 - Tege Kiwoyeti (teg) NT Portions

Le mbiza ka kese baari ma lemigi lekima

¹ Adumu a mi, be ba le maalege lila le be ma lekuma le Mfumu Zezi Kirisite wo bizi a be, lebiza ka kese baari ma lemigi lekima.

² Ye buna ka balaga lemon leeli ŋa kabaga, ma laaza angoyi ma awali bila nkwere ye nore anyunuŋa nca biri ye ba avunuŋa, ŋa ofuga wo ma laaza angoyi ma amabaga nyunuŋi se.

³ Aka be le mvyere kanyima ŋa balaga le laaza angoyi ma awali ŋa be le lyele nde ndi: «Be, leka manci ka kunu, ka biri yeemve yi!» Ŋa ofuga, be le dugi ndi: «We, ka ma otele kaŋaa!» sikali: «We ka manci ma ncie, ka miili e mi!»

⁴ Ntini ye asa be bwa, be le kasa obayi mpanaŋa be ŋi? Be le kampama bila otuma woobi ŋi?

⁵ Adumu a mi ba jyi mi kuna, leyuga! Njyami ki swolo baali afuga ka miizi ma okiri ŋi mini bo a ka ŋa kabaga ma lila? Nde ki swolo bo ndi bo abaga omfumu o nde ka mpi ndagi ma baali ŋa njala nde?

⁶ Ŋaa ma be, be le tuga afuga! Ŋa ka angaa kabaga ba mpa be mpasi ŋi? Ŋa ka bo ba abira be ka levuzu le ankani ŋi?

⁷ Ŋa ka bo ba atuga yeemve ye ampi be yi ŋi?

⁸ Be leyaayi ngiri ye omfumu mva kama ateende nca mbari a Njyami ndi: «We jii buga lembuuru mva kajia we njuru a we,» aka be le kyele ngiri yia syele, be yemiŋi lesa.

⁹ Ŋaa aka be lekese baari ma lemigi lekima, be lesa maami maabi ŋa Ngiri ye pama be ma be ba lebiza nyima yo.

¹⁰ Okorogo, aka mbuuru anyima angiri aso a Njyami, ŋaa nde kava se ma Ngiri mon tu, nde mpyeme ka miizi a Njyami ma ma aso kali.

¹¹ Okorogo, Njyami wo dugi ndi: «We ndaga kasa ncuuma», dugi se: «We ndaga kabuma mbuuru.» Aka we kini sa ncuuma ŋi, ŋaa we abuma mbuuru, ma kasa bwa, we akanyima Ngiri ŋi.

¹² Lelyele ŋa lesa mva baari ba baapama ma Ngiri mon ya ye mpa kavuzuga.

¹³ Kabila Njyami aje kampama eli nya kali ŋa wooli ki mvyere nya ŋa abuga ŋi. Ŋaa aka we ŋa nya abuga, Njyami apama we bila nya.

Lila bila esima

¹⁴ Adumu a mi, aka mbuuru alyele ndi nde ŋa lila, ŋaa ndi nde esima kali, lo ŋa ka ma yamba nde ŋa buni? Ŋa lila lia le buna vuzuga nde?

¹⁵ Ye buna ka dumu sikali nkeri kiigi ma kaama amfa ma ka laaza ŋa biila ba kaja ma cugu ŋa cugu.

¹⁶ Kanca mpanaŋa be, mbuuru dugi bo ndi: «Leje ŋa kadusu! Leje laaza amfa, ŋa ove ba kaja!» Ŋaa mbari yia ma kalyele ndi ema, aka be le kampa bo biibi ma kaka omwon ŋi?

¹⁷ Ma lila, ŋa lemigi lo ankulu lia. Aka lila leka le otu eli le kasa esima ŋi, lo le ma akpa.

¹⁸ Ŋaa mbuuru kalyele ndi: «We ŋa lila, mi ŋa esima!» Mvyere mi lila le we eli esima kali, ŋa mi mvyere we lila le mi bila ŋa esima.

¹⁹ We ayalaga ndi Njyami omon otu? Ŋa yemiŋi. Ŋaa epundu se ba e yalaga ŋa bo ba aterege ma bwogo.

²⁰ We ŋa ojiri! We jii ndi mi mvyere we lila le kama esima ni kalogo ka oca?

²¹ Abarayame, nkaaga bizi a be, Njyami bunu ka yayi ni nde tele? Ma esima e nde, ntini e nde ye kampi mwana nde Izake yila Ncaga, ki bwa ŋi?

²² We amono ni lila le nde le kiigi sa bila esima, ŋa ma esima avuti lila jaajaa.

²³ Ŋaa jaa ye amaateende yia nca mbari a Njyami yiga jaajaa : «Abarayame yaligi Njyami. Ma bwa, Njyami yayi nde mva tele,» ŋa cwoli nde ma ndigi a Njyami.

²⁴ Be lemono, Njyami yayi mbuuru mva tele ma esima e nde, ŋa ki ma lila otu ŋi.

²⁵ Ma Rayabe, ndumba, ŋa kalogo ko mankulu kia. Njyami kiigi yayi nde mva tele ma esima e nde. Okorogo, nde bagi mpila nde esizigi e baari a Ezerayele ŋa nde yambi bo ma kaje ma njila mon kima.

²⁶ Okorogo, aso mva njuru eli owuru kali e ma akpa, mva yo ankulu lila eli esima kali le ma akpa.