Zake 1 - Tege Kiwoyeti (teg) NT Portions

Obigi

¹ Mi, Zake, oyiga a Njyami ŋa wo Mfumu Zezi Kirisite, mi eteende okanda wu ŋa ankaaga ankuumu ŋa bwele ba acamaŋa nca okiri oso. Be lema ajuruga!

Lila ŋa ncimi

² Adumu a mi, be leka nca kase kuna ma antini eli be lebaga ampasi mvyeri aso.

³ Kabila be leyaayi, aka lila le be leka ŋa mpari nca mpasi, yo ye selege vuta be mpari.

⁴ Ave be le bagi mpari tii ncwo, ŋaa be leka taataa ŋa be le kama se kalogo ŋi.

⁵ Aka omon nca be ma akaama ncimi, nde pizi lo ŋa Njyami, ŋa Njyami mpi nde. Kabila Njyami ampa ŋa baari aso bila otuma o nde woove ŋa nde aka banaŋa ŋi.

⁶ Ŋaa nde pizi nde bila lila, eli ekemi kali; kabila wo asa ekemi ma awuana kapugu ka anja kayila lemere eli pyebi lesata ŋa le ciniŋi ma kacu kamon sikali kangulu.

⁷ Wua ka bira kacimiŋa ni nde abaga kalogo ŋa Mfumu.

⁸ Okorogo otuma nde ama kaba, nde kaka ma otele-otele nca anjila a nde aso.

Ofuga bila kabaga

⁹ Ndi dumu wo ofuga kamono kase ma Njyami wo akusa nde.

¹⁰ Ŋa dumu wo ngaa kabaga, nde kaka ŋa kase ma Njyami wo avuta nde lebiza. Okorogo, nde ayira mva fula le eti.

¹¹ Kabila muyi ka temeŋe bila njusi a nde ya ye mbwa, nde akaya oti, fula levi, ŋa ove o nde onywoŋi. Ma lemigi lo ankulu lia, cugu lemon, ngaa kabaga anywoŋo ka akabakari ma amaami a nde.

Njyami akaciniŋa mbuuru ma kasa maami maabi ŋi

¹² Kase ŋa mbuuru wo aka ŋa mpari nca ampasi; kabila ntini ye mana mvyere nde mpari, nde abaga wura le omwon le obu-obu eli Njyami ma ampa ndagi ŋa baali ŋa njala nde.

¹³ Aka ba amiga mbuuru, nde bizi kalyele ndi: « Njyami amiga mi.» Kabila Njyami kiigi buna kasa kamiga ma maabi ŋi ŋa nde aka miga mbuuru ŋi.

¹⁴ Ŋaa mbuuru ŋa mbuuru ba amiga ma njya le nde-ankulu leebi le lejiima ŋa lekura.

¹⁵ Ŋa ntini ye lenyina njya leebi lia ma kasa, nde akula maami maabi. Ŋa ntini ye selege yele maami maabi, nde kuli leku.

¹⁶ Adumu a mi ba jyi mi kuna, lebiza kanyina ndi akura be:

¹⁷ Biibi eso beeve ŋa e taataa kawa yulu, wo Njyami, Taara wo wanga muyi bila anyari. Nde aka kaala ŋi, ŋa nde akalaga ma kanyina be nca lempiibi ŋi.

¹⁸ Nde jii nde-ankulu kampa bizi omwon ma mbari a nde yeeli jaajaa, mini bizi leka mva mburu encomi eso ba e wangi nde.

Leyuga mbari a Njyami ŋa lesa ma dugi nde

¹⁹ Ave be le barigi bu yemiŋi, adumu a mi ba jii mi kuna: ni mbuuru ŋa mbuuru kaselege yuga, ŋaa lebigi ma kalyele ŋa ma kabira nkeri.

²⁰ Kabila mbuuru wooli ŋa nkeri akasa maali tele ka miizi a Njyami ŋi.

²¹ Ŋaa lecuna aso ma maasa kiri, aso mama vuta obi. Lebaga bila kadusu mbari ndi Njyami ma akuna ŋa be, nde abuna vuzuga omwon o be.

²² Lebiza kamono ove ma kayuga lo otu, ŋaa lesa ma alyele nde, sikali, be le kura be mankulu.

²³ Ee, wooli ayuga mbari ŋa akasa mva kalyele nde ŋi, nde ma wuana mbuuru omon wo akese kalii ka nde nca katala. Nde amono mva ka li nde.

²⁴ Ŋa kamana ka kese, yeni ŋa lumiŋi kancinci ŋaa lemigi le ka nde.

²⁵ Ŋaa lemono wooli aselege kese ngiri tele eli ye mpa kavuzuga. Aka nde kaka pa, nde ayuga mbari, ŋa akalumuŋa ŋi ŋa nde asa a nde ma ka lyele. Wua aka ŋa kase ma a nde ma kasa.

²⁶ Aka mbuuru ayalaga kalwono Njila Njyami, ŋaa nde ki ya ka kyele lempele le nde ŋi, ŋaa nde mi tamaŋa otuma nde-ankulu. Eso ba esa nde ma Njyami oca.

²⁷ Ka miizi a Njyami Taara bizi a be, lemono lemigi le taataa le kalwono Njila Njyami, kayamba ancyayi ŋa akuuli nca andogo a bo, ŋa ma kabiza kanyina kiri ma maami ma okiri.