Tite 2 - Tege Kiwoyeti (teg) NT Portions

Eyizigi ba kampa ma akiricye

¹ Ŋaa ma we, lyele maali jaajaa bila eyizigi e cece.

² Lyele ŋa baari baangacuga ma kaka amfumu a bo ankulu, onyimi, ecimiŋi, baali ŋa mpari nca lila, nca jya bila kajila.

³ Lyele se akaazi beekubu ma kabaga omwon wo jii Njyami. Bo ba kabuna lyele maami maabi ŋa abuga ŋi, ma kabiza kaka ayiga amaali. Ŋaa ni bo ayiziga maave.

⁴ Ma bwa bo ayiziga ŋa ejabu ba akaazi ma kajya alumu a bo ŋa baana a bo,

⁵ ecimiŋi e yemiŋi, ŋa ma kaka cece. Ma ka kyele maami ma anjo a bo, ma kaka ŋa ove ŋa onyimi ma alumu a bo, ma bwa mbuuru ki ma sebe mbari a Njyami ŋi.

⁶ Lyele se enkere ba abalaga ma kacimiŋa yemiŋi.

⁷ Ŋaa ma we, sa esima beeve nca amaami bwori, mini bo amono esima bya ma we, ŋa bo asa mva kaasa we. Kaayiziga we ka yemiŋi bila tele.

⁸ Ndi ambari a we aka tele, mabu ndi andaga sa engomgbo. Ma bwa, anyon a bizi a be ki baraga jaa leebi ma kalyele ma bizi a be ŋa bo baamono okuru.

⁹ Ave ndi ayiga anyimi amfumu a bo ma elogo njwori. Ndi bo ave asagi ma kampa bo kase ma kaduma etogo bila bo.

¹⁰ Ndi bo ba kabuna yuba bo kalogo ŋi. Ŋaa ndi bo aselege mvyere mini bo baari baave atari, mabu ndi bo anyima ma bwori eyizigi e Njyami Ovuzigi a bizi a be.

¹¹ Kabila Njyami mvyeri puga le nde ŋa baari bwori ma kanana bo njila ye kavuzuga.

¹² Kabila puga lya le yiziga bizi ma kanyina eki beebi ŋa njya le okiri, ma kabira nca okiri wu omwon o cimi, tele ŋa ove ma Njyami.

¹³ Ŋa ma bwa ndi bizi kiigi le njila cugu leve eli bizi le ma alege tari. Cugu lya, Njyami woonini ŋa Ovuzigi bizi a be, Zezi Kirisite aya vuruga nca lekuma le nde.

¹⁴ Nde mpi omwon o nde ma bizi a be, mabu ndi kavuzuga bizi a be ma maami maabi bwori. Nde jii kasa bizi a be baari a cece, baari eli aka a nde ŋa lagi lagi ma kasa esima beeve.

¹⁵ Mon amaami eli ave we ayizigi ŋa baari, ma kampa bo kawasi ŋa ma kabama bila otori ywori. Ndi mbuuru ki biza we kanyima ŋi!