Tite 1 - Tege Kiwoyeti (teg) NT Portions

Obigi

¹ Kamaka mi, Poole, oyiga Njyami ŋa ntuma Zezi Kirisite, wo teendi okanda wua. Njyami ma tuma mi ma kabira ba aswoli ma lila ŋa ma kaya asisyele mama bira ma kakwara Njyami.

² Ŋa ndi bo abagi tari ma omwon ba obu-obu. Njyami wooli alaa kali, kiigi ma mpa bizi a be ndagi yo omwon wu osu ba antini bwori.

³ Ŋa ntini ye ampi eto, Njyami Ovuzigi bizi a be si ndi mbari a nde aya. Nde ma tuma mi ma kampa mbari yia.

⁴ Mi abiga we, Tite, mwana mi wo jaajaa ma lila le bizi a be le mvuga: Ndi Njyami wa Taara ŋa Zezi Kirisite wo Ovuzigi bizi a be kampa we puga bila kadusu.

Osala o Tite ka Kerete

⁵ Mi ndagi we nca kajwa ka Kerete mini we selege amaami eli akini mana kaselege ŋi. Nca kangundu ŋa kangundu, ave we mpi omfumu ŋa anga baari, mva kalyeli mi we.

⁶ Ave nga mbuuru eku beebi kali, olumi tele ma okaari. Ave se baana a nde ayiga ayaligi, ŋa ki banaŋa bo ma eki beebi sikali ma enyimi ŋi.

⁷ Okorogo, ma nde wooli nga mbuuru, mfumu wo Okuga wo akipa maami a Njyami, nde eku beebi kali, nde ki ka nga kamba ŋi, se nga nkala ŋi, se oyiga maali ŋi, se njala amvuru ŋi, nde se ki saga kabaga ampara ma lemigi leebi ŋi.

⁸ Kayamba le baari yemiŋi, ŋa jii beeli taataa. Ave nde cimiŋi taataa, tele, cece ŋa mfumu nde-ankulu.

⁹ Ave nde ki pa ma mbari a Njyami yeeli ba abuna kayalaga, yeeli tele ma kayiziga. Nde abuna kampa abuga kawasi kanca eyizigi e cece. Nde abuna mvyere bo maami a bo maabi ma baali ŋa ekemi ma eyizigi e nde.

¹⁰ Ee, ŋa bege le baari ba baabiza kanyima mbuuru, vulivuli kanca mpanaŋa aZife ba ami nyunuŋa nca njila e Kirisite. Bo ba amfura baari ma mbari e bo yeeli yeka lyele kiila ŋi.

¹¹ Ave le kangi bo enyua, kabila bo ba acala ankwono ma aciina. Bo ba ayiziga ma baabiza kayiziga, ma kabaga ampara ma lemigi leebi.

¹² Omon kanca bo, kiigi nga ncimi e bo, lyeli ndi: «Asi Kerete kamaka anga alaa, baari baabi mva anyama ankala, abolo ecimiŋi e bo kaja.»

¹³ Otemi wua syele. Mvyere bo taataa esima e bo beebi, mini bo abaga lila le jaajaa.

¹⁴ Ave bo andaga kasa oyeri ma amaami ma aZife ma alaa. Bo andaga kanyima angiri a baari ma baba ampa engwo ma asisyele.

¹⁵ Ma baari baali cece, maami bwori ali cece. Ŋaa ma baari baali kiri ŋa eli ba abiza kayalaga, bo se kalogo ka cece kali. Okorogo, ecimiŋi e bo ŋa etuma e bo ŋa kiri.

¹⁶ Bo ba alyele ndi bo ayayi Njyami, ŋaa bo ba abiza nde ma esima e bo ba baasa. Bo ŋa mbele, bo se ba kanyima mbuuru ŋi ŋa bo se ba ka buna kasa kalogo keeve ŋi.