Luke 9 - Tege Kiwoyeti (teg) NT Portions

Zezi atuma alwoni a nde

¹ Zezi kuzigi alwoni a nde ba kwumu ŋa bwele, ŋaa nde mpi bo mpari bila onkani ma kacura epundu beebi eso, ŋa ma kasalaga angaa angaayi.

² Ŋaa nde tumi bo ma kalyele ncia ye omfumu o Njyami, bila kasalaga abieri.

³ Nde ŋa bo ndi: «Kaaje be, be lebizi kalogo kayaga: Se pangi, se mpye, se biila ba kaja, se ampara, nca be mbuuru kibira amfa mwele ŋi.

⁴ Mpini njo ye ba ayamba be, be leki kaŋaa tii kavuraga be.

⁵ Ŋaa mpini biri ye ba bira be kayamba, be lecyegi kaŋaa, ŋaa be le kubugi nceri yeeli ma miili e be, ma kalyele ndi ami yieze bo.»

⁶ Zezi kamana kalyele, alwoni a nde ayeni nca ampugu ŋa ampugu, ma kampa mbari a Njyami, ŋaa bo ba kasalaga angaa angaayi.

Erode asaga mono Zezi

⁷ Ŋaa onkunji wo acwoli ma Erode wo kiigi ma mbara ka Ngalile kayuga maami aso ma ayiri maa. Nde sagi oyeri ba kasa, nde kwoni, kabila baari baamon ba kalyele ndi: «Nde ni Za Batise nyuzuga ka nca baari ba ama akpaa.»

⁸ Ma baamon ndi: «Nde ni Eli ya vuruga.» Abuga akima ndi: «Omon nca antuma Njyami akala mi ya vuruga.»

⁹ Ŋaa Erode ndi: «Nde wua se na okima? Mi ma atuma aworo a mi, ma kacaga Zan ocu. Wo ba alyele amaami maanini ma nde wu, wunu?» Kayila ŋaa Erode asaga kamono Zezi.

Zezi abunuŋa ekwumu ba ankama abaari kwumu (5.000)

¹⁰ Antuma a Zezi awa onjia, bo anaani nde maami masi bo aso. Nde yeni bila bo ma ka tege, ma kacu ka kangundu ka Betezayida.

¹¹ Ŋaa lembuuru le ma ya biri le yeni Zezi, lo le lwono nde. Zezi yambi bo, ŋaa nde wobi bo ma omfumu o Njyami, ŋaa nde saligi baakiigi ŋa kaama ndi asalaga bo.

¹² Cugu yiga le ekolo, ŋaa antuma a nde ba kwumu ŋa bwele ayi mpaana nde, ŋa bo ŋa nde ndi: «Vuta baari aje nca ampugu bila nca empumpugu, beeli mpaana ŋa, eli bo abaga ebiri ba atolo bila elogo ba aja bo. Kabila bizi a be leli nca biri eli elogo kali.»

¹³ Ŋaa Zezi ŋa bo ndi: «Beankulu le mpa bo biila ba kaja.» Ŋaa bo baakaala ndi: «Kayila bizi ŋa ampeembe taani bila ancu bwele. We asaga ni bizi leje swuma biila e baari aso?»

¹⁴ Ŋaa kanca ŋa kiigi ankama ma abalaga kuumu (5.000). Zezi ŋa antuma a nde ndi: «Lelyele bo aka manci ma anjiimi ma ekuumu e baari etaani.»

¹⁵ Bo anyiimi, bo aswuzi baari aso manci.

¹⁶ Ŋaa Zezi yagi ampeembe ye taani bila ancu a bwele, sati miizi ka yulu, mpi Njyami leve ma biila bia, ŋaa nde cebi amana nde mpi antuma a nde ma kakaba baari.

¹⁷ Mbuuru ŋa mbuuru ji, yurigi. Ŋaa bo atolo etini ba ancu bila ampeembe ba esiili, bo alusi angulu kwumu ŋa mwele.

Pyere alyele ndi Zezi ovuzigi wo Njyami

¹⁸ Cugu lemon Zezi kiigi maaje bwono Njyami kanca biri e nde otu. Ŋaa alwoni a nde ayi baga nde, ŋaa nde apiza bo ndi: «Baari ba alyele ndi mi na?»

¹⁹ Alwoni a nde ayaligi ndi: «Ake ndi we Za Batise, ma baamon ndi we Eli ntuma Njyami, akima ndi we ntuma Njyami wo kala wo ma ya vuruga yila ncie.»

²⁰ Zezi vuri pizi bo ndi: «Ŋaa ma be, be bunu le elyele?» Pyere kaali ndi: «We Masiya ntuma Njyami wo kaswolo.»

²¹ Ŋaa Zezi ligi bo ndi: «Be le bizi mbuuru kalyele.»

²² Nde lusi ndi: «Ave mi wo Mwana Mbwuru moni mpasi yeenini. Ŋaa ankani ba kasi, ŋa ankwuru bila ampi ambwoŋi baanini bila ayizigi angiri baabele nde, bo baabuma nde, ŋaa cugu le otari nde anyuziga.»

²³ Zezi ŋa bo aso ndi: «Mbwuru ka jia ndi nde alwono mi, nde nyini osumbu wo baasa nde, nde biri lemaanji le nde-ankulu, ŋaa nde nami mi antini aso.»

²⁴ Ma bwa mbuuru wo akaana ma kakiele osumbu wo baasa nde, akpaa. Ŋaa we abaga leku ma nkuumu a mi, nde abaga omuon.

²⁵ Yo ŋaa aka mbuuru ŋa kabaga kayila ncie eso, ŋaa nde ka kama omuon, nde kamabaga kama?

²⁶ Ŋaa mpini mbuuru wo amono okuru ma mi, ŋaa ma mbari a mi, mi se wo Mwana Mbwuru emono okuru o nde, ntini ye ya mi nca lekuma le mi, ŋa le Taara Njyami bila antuma a nde acece.

²⁷ Ee! Mi elyele be jaajaa, ake nca be, ba aka sa akpaa eli bo akini mono omfumu o Njyami ŋi.

Zezi amvyere lekuma le nde

²⁸ Zezi kamana lyele bwa ecugu mpuomon eyiri. Nde yagi Pyere, Zan, Zake bo ayeni yila kakuru ma kabwono.

²⁹ Ntini ye kiigi bwono Zezi, lemigi le kalii ka nde le kaali, ŋaa mfa nde eseligi fuumi.

³⁰ Parabu, abalaga bwele acwugi, ŋaa bo yiga ba alyele bila nde, kiigi Moyize bila Eli.

³¹ Ŋaa lekuma le Njyami kiigi lema ajeneŋe bo. Bo ba kalyele bila Zezi ma leku le nde la le eya ka Zerizaleme.

³² Ŋaa Pyere bila abuga a nde, kiigi ama yiriga tolo leenini. Bo anyuzuga, bo amoni lekuma le Njyami lema ajeneŋe Zezi bila abalaga bwele.

³³ Ntini eli baari baa kiigi yiga baaje, Pyere ŋaa nde ndi: «Mfumu, aka bwa bizi leka kaŋaa, le ncwa elebe etari, omon wo we, omon wo Moyize ŋa omon wo Eli.» Ŋaa nde kiigi kiyaa jaa yeekiigi lyele nde ŋi.

³⁴ Ŋaa ntini ye kiigi lyele nde bwa, kayiini ka kacuyi kayi wuga bo. Ŋaa Pyere bila abuga a nde abagi kamaaŋi.

³⁵ Ŋaa Njyami wobi kanca kacuyi kia ndi: «Wu Mwana mi wo swolo, leyuga nde.»

³⁶ Njyami kamana lyele, Zezi kiigi nde otu. Alwoni a nde kiigi pi, ŋaa bo aki lyele se mbuuru omon otu ŋi.

Zezi cuti kapundu keebi

³⁷ Vuzu oca, bo awa yila kakuru, lembuuru leenini leyi ka levuzu le Zezi.

³⁸ Ŋaa mono, kanca kari a lembuuru lia, balaga lemon le ti osarigi ndi: «Mfumu, kolokolo we, ma kese mwana mi, ŋa mi mwana nde-ankulu wua.

³⁹ Kapundu kiigi kali kanca nde. Ŋaa kapundu kia ka ruma nde ti osarigi, ŋaa nde terigi tegetege, ŋaa awuru acwugi nde ma onyua. Kapundu kia keempa nde mpasi, ŋaa ko njala kacwuga ŋa asisari kali.

⁴⁰ Mi mpi alwoni a we akolokolo ma kacura kapundu ki, ŋaa bo akibuna ŋi.»

⁴¹ Zezi dugi ŋaa alwoni a nde ndi: «Tii ntini maa ye ka mi bila be? Be baari ba leca li, be tari kali, be ŋa perepere. Zezi ŋa ataara mwana ndi, ya bila mwana we kunu.»

⁴² Ŋa e nciini e mwana mpaana Zezi, kapundu keebi kanyizigi mwana bila mpari. Ŋaa Zezi cuti kapundu keebi, nde saligi mwana wua, ŋaa nde vuti nde ŋa taara.

⁴³ Ekoli bo aso, ŋaa baari aso amoni onini o Njyami. Baari aso kiigi kini baakese ampiri ma kiigi sa Zezi, ŋaa nde dugi ŋa alwoni a nde ndi:

Zezi alyele ma leku le nde

⁴⁴ «Lekyele jaa le elyele mi be li taataa. Baari yiga tuga ma katege mi wo Mwana Mbwuru nca jiala e baari.»

⁴⁵ Ŋaa alwoni akiyuga mbari yia ŋi. Ma bo mbari yia kiigi ŋa mpasi ma kayuga, yia biri ye bizi yuga bo yo. Ŋaa bo amoni bwogo, bo akuni ma kapiza Zezi yo.

Wo vuli abuga na?

⁴⁶ Alwoni a Zezi atogi kampaniŋi a bo ma kayaa wo vuli abuga.

⁴⁷ Nde kamono ecimiŋi ba etuma bo, yagi mwana wo kiege, legi nde mpaana nde.

⁴⁸ Ŋaa nde ndi: «Mpini mbuuru wo ayamba mwana wu ma nkuumu a mi, nde miankulu ka yambi. Ŋaa mpini mbuuru wo ayamba mi, nde ayamba mbuuru we otumi mi se. Okorogo mbuuru wo avuruga mbiza kanca be, mbuuru wo vuli abuga.»

Mbwuru wo okaami bele be, li bila be

⁴⁹ Ŋaa Zan yagi mbari ŋa Zezi ndi: «Mfumu, bizi lemoni mbuuru wo acura epundu beebi ma nkuumu a we, ŋaa bizi le sagi liga nde, kabila nde kiigi ka olwoni we ŋi.»

⁵⁰ Zezi kaali ŋa Zan ndi: «Lebiza nde ka liga, kabila mbuuru eli kini ka mbele be ŋi oli bila be.»

Baari a Samari acuti Zezi

⁵¹ Ntini ye cyege Zezi yila ncie ma kaje yulu eciina. Ŋaa nde kuri ojugu ma kaje Zerizaleme.

⁵² Nde tumi antuma acuami levuzu le nde. Ŋaa bo anyuniŋi nca mpugu mon e Samari, ma kaje selege eyi e Zezi.

⁵³ Ŋaa baari a mpugu yia akiyamba nde ŋi, ma bo baakiigi je Zerizaleme.

⁵⁴ Alwoni a nde abwele, Zake bila Zan amono bwa, bo ŋa nde ndi: «Mfumu we njala ni bizi lelaa mbaa ewa yulu esuruga ŋaa yo ebuzuga bo?»

⁵⁵ Zezi fali bila bo.

⁵⁶ Bo aso ayeni nca mpugu nkima.

Lemigi le baalwono Zezi

⁵⁷ Ntini ye kiigi bo ma njila, mbuuru omon ŋaa Zezi ndi: «Mi elwono we ma ebiri eso beeje we.»

⁵⁸ Ŋaa Zezi kaali ŋa nde ndi: «Ebagi ŋa eywu, ŋaa anyoŋi a yulu ŋa anjo. Ŋaa Mwana Mbwuru biri le kaca tolo kali.»

⁵⁹ Ŋaa Zezi dugi ma mbuuru okima ndi: «Lwono mi!» Ŋaa mbuuru wua okaali ndi: «Mfumu, baana nyina mi eje jiiga taara mi.»

⁶⁰ Ŋaa Zezi ŋa nde ndi: «Nyina ebiima be ejiiga ebiima! Ŋaa we, je mpa ncia ye omfumu o Njyami.»

⁶¹ Okima ndi: «Mfumu, mi elwono we, ŋaa baana nyina mi eje yieze baari a njo mi.»

⁶² Zezi akaala ŋa nde ndi: «Mbwuru wo alege kwogo kayila temi, ŋaa nde kavura kese mbiza, nde kibuna kanyunuŋa nca omfumu o Njyami ŋi.»