Luke 8 - Tege Kiwoyeti (teg) NT Portions

Jaa le akaazi ba alwoni Zezi

¹ Amana, Zezi kaje engundu ŋa engundu bila nca ampugu ŋa ampugu, ma kampa bila kalyele ncia yeemve ye omfumu o Njyami. Alwoni a kwumu ŋa bwele akiigi bila nde.

² Ŋaa akaazi a nke ba Zezi ba kacyezi epundu beebi bila ba kasaligi angaa ba se alwoni nde. Ankuumu a bo, Mariya wo osi kangundu ka Mangedala, eli Zezi ocyezi epundu beebi ncaami nca nde.

³ Ŋaa Zaane okari a Cuza, onkiele okuru o mfumu wo acwoli ma Erode, ŋa Sizane bila bege le abuga akima. Akaazi baa aso ba kayaga kabaga ka bo, ma kayamaŋa Zezi bila alwoni a nde.

Ngana ye okuni

⁴ Baari ba fi ma engundu ŋa ampugu a kugi, lembuuru le si leenini ka mpaana Zezi. Ŋaa nde wobi ma ngana yi:

⁵ «Onkuna elogo ocwugi ma kaje kuna mburu a nde. Ŋaa nde acala, bugu lemon le mburu levi kayila njila, ajarigi yo ma miili ŋa anyoyi a yulu aji yo

⁶ Bugu lekima levi yila ncie ye akele, yo ebaana kasaraga, yo ekayi, kabila yo kiigi borigi onyaŋa

⁷ Bugu lekima levi kanca a ncyene, a ncyene ma yele, yo se ye yele amana a ncyene ayiniŋi yo.

⁸ Ŋaa bugu lekima levi kanca ncie yeemve, ntini ye yeli yo, yo empi mburu kuna kuna. Ŋaa ncuo mon empi mburu ekwumu kwumu.» Ŋaa Zezi vuri dugi nkeri kala ndi: «Ŋaa angaa acu ayugi!»

Zezi asamaŋa alwoni a nde ngana

⁹ Ŋaa alwoni a Zezi apizi nde ndi: «Ngana yia ma kalyele ndi ema?»

¹⁰ Nde yaligi ndi: Njyami kiigi ma mpa be ma kayaa maami a nde ma o Mfumu o nde. Ŋaa ma baari akima, ye ka ma ngana, ma buni Se bo ba kese bo kimono ŋi, Ŋaa aka se bo ba ayuzuga, bo baaka yuga ŋi.

Zezi asamaŋa ngana

¹¹ «Ŋaa lemono mi esamaŋa be ngana yia. Mburu kamaka mbari a Njyami.

¹² Baari baamon mva mburu yeevi kayila njila. Ba baayuga mbari a Njyami, ŋaa Satan yi ciezi mbari yia ma etuma ebo. Mabu ndi ncanke bo ayaligi, ŋaa bo avwugi.

¹³ Ŋaa baari baamon mva mburu yeevi kayila ncie ye akele. Baa eli ntini ye eyuga bo mbari a Njyami, bo ayaligi ŋa kase. Ŋaa bo ekaŋa kali, kayalaga ka bo keeka biga ŋi. Ŋaa ntini yeemono bo ampasi, bo avi.

¹⁴ Mburu ya yeeva kanca a ncyene, mva baari ba baayuga mbari a Njyami, ŋa ampasi, ŋa kabaga bila kase kayila ncie, eso eyiniŋi bo. Ŋaa bo abagi mburu yeemve.

¹⁵ Mburu ya yeeva kanca ncie yeemve, mva baari ba baayuga mbari a Njyami bila eyaligi e jaa jaa. Bo akieli yo, ŋaa bo abagi mburu yeemve.»

Zezi ndi leyuzuga mbari mi

¹⁶ Zezi vuri dugi bo ndi: «Mbwuru kibuna kalasa munda nde legi yo ncina ngungulu, sikali ncina ntari ŋi. Ŋaa nde kalege munda kayila okami a njo, ma buni baari ba baanyunuŋa amoni kawaa.

¹⁷ Okorogo kalogo ka ba alonoŋo baari baamono. Kabaasa ma ayizigi vuzu oca amoni ko.

¹⁸ Lesa oyeri ma lemigi leeyuzuga be mi. Okorogo Njyami ampa ŋa mbuuru wo ayuzuga bila kayuga mbari a nde. Ŋaa Njyami apiina ŋa mbuuru eli nde kalogo kali, se nceti a nde ye kabagi acyezi.»

Ngwugu bila barigi a Zezi

¹⁹ Ngwugu bila barigi a Zezi ayi baga nde, ŋaa bo akibaga ncuo ye kalyele bila nde ŋi, kabila lembuuru kiigi le ma avula kuna.

²⁰ Adugi ŋa nde ndi: «Ngwugu a we bila barigi a we ali kajii, ŋaa bo baasaga mono we.»

²¹ Ŋaa nde kaali ndi: «Ngwugu a mi bila andumu a mi, ba baayuga bila ba baasa maami ma alyele mbari a Njyami.»

Pyebi bila anja anyimi Zezi

²² Cugu lemon, Zezi kumi nca vaari bila alwoni a nde, nde ŋa bo ndi: «Lecue lengulu lemon le oduba li ku,» ŋaa bo ayeni.

²³ Ntini yeekiigi bwula bo, Zezi ci tolo. Parabu, pyebi leenini leyi nca oduba, vaari yiga alwula anja, bo amoni bwogo ba leku.

²⁴ Alwoni a Zezi aciini mpaana nde, ŋaa bo anyusi nde, bo ndi: «Mfumu, mfumu, bizi a be lekwi!» Zezi kanyuzuga, nde wobi bila nkeri ŋa piebi bila epugu ba anja beenini. Ŋaa pyebi bila epugu ba anja yiga asugi.

²⁵ Ŋaa nde ŋa alwoni a nde ndi: «Tari le be alo?» Kamaaŋi kasi bo, ŋa ekoli bo, bo yiga ba lyele nca mpanaŋa bo ndi: «Nde wu na, we a lyele bila pyebi ŋa anja, ŋa jo enyimi nde?»

Zezi saligi ngaa ependu beebi

²⁶ Zezi bila alwoni a nde atoyi nca kasi ka baari a Zerazeni, kaga ma kasuniŋa kasi ka Ngalile.

²⁷ Ntini ye surigi Zezi nca vaari, ŋa elegi nde miili ma ncie, balaga lemon le kangundu kia yiga le eya mpila Zezi. Ŋaa balaga lia kiigi ŋa bege le epundu beebi kanca nde. Nde kiigi kayira otaba, ŋaa nde kiigi yiga akaka nca njo ŋi, nde kiigi yiga kaka nca amwuma.

²⁸ Nde kamono Zezi nde ti nya, ovi kacina miili e nde, ŋaa nde wobi nkeri nkeri ndi: «Jo ema eli ka mpanaŋi a bizi a we, Zezi, Mwana Njyami onkara yulu? Kolo kolo we, ndaga mi kasisa.»

²⁹ Nde dugi bwa, ma Zezi wo owobi ma nkeri ŋa kapundu keebi ndi: «Cwuga nca balaga li!» Ma antini ake, kapundu keebi kia ka kpara nde, ŋaa akuri nde endi ba ankozo ma jiala bila miili ma ka kwozo nde. Ŋaa nde amono acaga ankozo ma akiigi kura nde maa, ŋaa kapundu kia ka kabira nde nca ancuo.

³⁰ Zezi pizi nde ndi: «We nkuumu na?» Ŋaa ko ndi: «Nkwumu a bizi abege.» Ko kadugi bwa kabila bege le epundu kiigi le ma anyunuŋa nca nde.

³¹ Ŋaa epundu yiga be pele Zezi ŋa asisari, ma buni nde kabiza bo katuma nca biri ye baasisa baari.

³² Ŋaa kiigi kaŋaa ŋa njiimi le engwu kayila kakuru le leekiigi ja, ŋa epundu ba kampa Zezi akolokolo ma kasa bo kanyunuŋa nca engwu bia. Ŋaa nde se yaligi.

³³ Ŋaa epundu ecwugi nca balaga lia, enyuniŋi nca engwu, ŋaa njiimi le surigi ma nciini levi nca oduba. Ŋaa lenyui anja lekpi.

³⁴ Baari ba kiigi bunuŋa jo, amamono bwa, adumi, ŋaa ayi ma kanaana ncia nca kangundu bila nca ampugu ma akiege aso.

³⁵ Baari ayi mono jaa ye emaaya. Bo ayi ciina mpaana Zezi, ŋa bo a moni balaga le ecuuga epundu kanca nde, manci ka miili e Zezi, ma alaaza amfa, ŋaa yiga nca eki beeve. Ŋaa baayi mono, abagi kamaŋi.

³⁶ Ba amoni kayiri maami maa, anaani mva kasaligi Zezi balaga le kiigi epundu beebi ema nyunuŋa nca nde.

³⁷ Ŋaa baari aso ba kasi ka Zerazeni ampi Zezi akolokolo ma kaciege nca bo, ma bo baali kiigi yiga ŋa kamaŋi keenini. Zezi kumi nca vaari, ŋaa nde kasa ni kaje,

³⁸ balaga eli epundu ecwugi nca nde, o pizi nde njila ndi aka nde abuna ka bira nde. Ŋaa Zezi ŋa nde ndi:

³⁹ «Vuruga njo we! Ŋaa naana aso ma Njyami ma kasi we.» Nde yeni, ŋaa nde naani ma ebiri eso ba kangundu, maami ma Zezi ma kasi nde aso.

Enyuzigi ba mwana wo okaazi o Zayiruse, ŋa okaazi wo obyele yiga esibi nkuumu ŋa jyele.

⁴⁰ Zezi bila alwoni a nde, avura bwula oduba. Lembuuru leenini leekiigi jila nde, ŋaa bo ayambi nde.

⁴¹ Ŋaa mono, kaya balaga lemon, nkuumu Jayiruse, kiigi okunji wo njo ye ba bwono Njyami. Nde vi kacina miili e Zezi, ŋaa nde mpi nde kolokolo ma kaje njo nde.

⁴² Nde kiigi ŋa mwana wo okaazi omon. Ŋaa nde mwana nde-ankulu wua, kiigi yiga nkali esibi kwumu ŋa jyele, kiigi yiga akpaa. Ntini ye kiigi je Zezi kwa, lembuuru leenini kiigi le ma ajya nde.

⁴³ Ŋi kiigi ŋa okaazi omon wo kiigi ŋa ovugu, kiigi yiga esibi kwumu ŋa jyele, ŋaa nde kiigi mi mana kabaga ka nde ma kawura adukuteni, ŋaa se omon kibuna kasalaga nde ŋi.

⁴⁴ Nde yi ceze mbiza, ŋa ciili okabi a mfa Zezi. Parabu ŋa ovugu fi.

⁴⁵ Ŋaa Zezi ndi: «Wo ciili mi na?» Ŋaa baari baa aso ba kaja akaniŋi. Ŋaa Pyere ŋa nde ndi: «Mfumu, lembuuru le lejia we li, le epiza we ni wo ciili mi na?»

⁴⁶ Ŋaa Zezi kaali ndi: «Mbwuru ma aciila mi kabila mpari mon ema cwuga kanca njuru a mi.»

⁴⁷ Okaazi wua kamono ndi amibanaŋa nde, nde yiga aya ma katerege ŋaa nde vi ka ncina miili e Zezi, ŋa nde cwugi ka miizi a baari ma kalyele kabila ka aciili nde Zezi, ŋa lemigi le wuumi nde, kancinci ŋa.

⁴⁸ Zezi ŋa nde ndi: «Kaazi, tari le we le mi vuzuga we, je bila kadusu.»

⁴⁹ Ŋaa Zezi kiigi kini alyele, mono mbuuru omon ka kawa mpila okunji wo njo ye baabwono Njyami, nde alyele ndi: «Mwana we wo okaazi mi kpa, ndaga kama weele mfumu ma kavura je njo we.»

⁵⁰ Ŋaa Zezi kayuga bwa, ŋa okunji wo njo ye baabwono Njyami ndi: «Ndaga bwogo kamono, yalaga, ŋaa nde avuuga.»

⁵¹ Zezi ka to njo okunji, nde kijia ndi mbuuru se omon otu anyunuŋa bila nde ŋi, ka ngula Pyere, ŋa Zan, Zake, ŋa taara bila nguugu a mwana.

⁵² Baari aso ba baaka nca njo ba kalila, ŋaa bo ba kalege ambila ma nya mwana. Ŋaa Zezi ndi: «Lebiza kalila, nde kini kpaa ŋi, ŋa nde aca tolo.»

⁵³ Ŋaa baari baakiigi kaŋaa, ba kasebe Zezi, ma bo kiigi ndi mwana ma mana kpaa.

⁵⁴ Ŋaa nde kwari mwana ma kwogo, ŋaa nde wobi ma jui leenini ndi: «Mwana, temeŋe!»

⁵⁵ Ŋaa oduduma nde yi vuruga nca njuru a nde, ŋaa parabu ŋaa nde sarigi, ŋaa Zezi ŋa bo ndi: «Lempa nde biila.»

⁵⁶ Ekoli ataara bila ngwugu a mwana. Ŋaa Zezi ŋa bo ndi: «Be lebizi kalyele se mbuuru omon maami ma yiri ma!»