Luke 6 - Tege Kiwoyeti (teg) NT Portions

Zezi mfumu a cugu le ba awuuma

¹ Cugu le ba awuuma lekima leto, Zezi bila alwoni a nde ba kayira kanca angwunu. Alwoni a nde acyezi miizi a ble ŋaa bo aji.

² Ŋaa Afarizi ake amono bwa, bo ndi: «Be mema lesa maami ma amaaliga ma cugu le baawuuma.»

³ Nde ŋaa bo ndi: «Be le kina lira nca buku le Njyami maami maasi Davide bila abuga a nde ŋi? Njala esa bo.

⁴ Nde nyunuŋi nca Njo Njyami, yagi ampeembe ye ambwoŋi ji bila abuga. Ŋaaŋi ngiri ye amalege ye lyele ndi ampeembe yia oji yo ampi ba ambwoŋi atu .»

⁵ Zezi vuru kaali ŋa ofarizi ndi: «Mwana Mbwuru nde-ankulu kamaka mfumu a cugu le baawuuma.»

Zezi saligi mbuuru ngaa kwogo ka kaleme

⁶ Ato cugu lekima le baawuuma, Zezi nyunuŋi nca njo ye baabwono Njyami ŋa nde kayiziga mbari a Njyami. Kiigi ŋa balaga lemon eli kwogo kaleme.

⁷ Ayizigi angiri bila Afarizi amono ba alwa Zezi ma kamono aka nde asalaga obieri ma cugu le baawuuma. Ma buni bo akata nde jaa.

⁸ Ŋaa Zezi kiigi yaa ecimiŋi ebo. Ŋaa nde ŋa balaga ngaa kaleme ndi: «Temeŋe, ŋaa ka kamwon miizi a baari aso.»

⁹ Zezi ŋa bo ndi: «Mi epiza be ni ngiri ye alege bira be bunu ye lyele? Kasa leve ma cugu le baawuuma sikali kasa obi? Levuzuga lembuuru sikali lebuma?»

¹⁰ Nde kesi bo aso, nde ŋa balaga lia ndi: «Laba kwogo ka we!» Nde se si bwa, ŋa kwogo kavieyi.

¹¹ Ayizigi angiri abagi kariga keenini, ŋaa bo yiga baasa akiimi ma Zezi.

Zezi swoli antuma nkuumu ŋa bwele.

¹² Ma antini moankulu maa Zezi yeni yila kakuru ma kabwono Njyami lempiibi le ciina.

¹³ Vuzu oca, nde cwoli alwoni a nde, ŋaa nca bo, nde swoli antuma nkuumu ŋa bwele.

¹⁴ Ŋaa ankuumu a bo: Simon wo ampi nkuumu ye Pyere ŋa Andre wo ndumu a Simon, ŋa Zake ŋa Zan, ŋa Filipe ŋaa ŋa Baretelemi.

¹⁵ Ŋa Matye, ŋa Tuma, ŋa Zake mwana wo Yalefe ŋa Simon wo acwoli ma Kanonon,

¹⁶ ŋaa Zide mwana Zake, ŋa Zida Izekariyote wo ososi Zezi mpila alogi a nde.

Zezi ayiziga mbari a Njyami

¹⁷ Zezi surigi bila antuma a nde ŋa nde sugi kanca biri mon epeme. Ka biri yia kiigi ŋa bege le alwoni a nde bila baari akima ba akukuna. Baari baa ake afi kacu ka Zide kaso, ka Zerizaleme ŋa ka tiniŋa ka lemere le Tire bila le Sidon.

¹⁸ Bo ayi ma kayuga nde ŋa ma ka awuuma ma angaa a bo. Baali epundu beebi ema jonoŋo bo, awuumi.

¹⁹ Ŋaa lembuuru leso le kasaga ka ciila nde kabila mpari mon emono ye cwuga nca nde, ŋaa nde saligi bo aso.

Zezi alyele ma ovuma bila nya

²⁰ Ŋaa Zezi kasata miizi kayila alwoni a nde ŋa nde ndi: «Kase kali ŋa be ba baabiza kese. Ŋaa be kamaka baari a Njyami kabila nde Mfumu a be.

²¹ Kase kali ŋa be angaa njala ŋaa be leje kayuruga.» Kase kali ŋa be, be ba le lila ŋaa be leje kasebe.

²² «Kase nke kaka ŋa be ba amabele, ntini ye ba bia be, ba tuga be, ka ba biiza ankuumu a be kayila ocua mi wo Mwana Mbwuru.

²³ Ma ntini yia lesuere, le caba, lesa oyaŋi kabila wura le be leka leenini ka yulu ŋa lia lemigi le esi ataara a bo antuma Njyami.»

²⁴ «Ŋaa nya ŋa be angaa kabaga. Okorogo be ŋa e be ebusi.

²⁵ Ŋaa nya eli ŋa be ba le ma ayuruga. Okorogo njala ye sa be. Ndogo eli ŋa be eli yiga leesebe. Okorogo be leje kaka kanca ankwono bila ancya!

²⁶ «Nyia eli ŋa be ntini eli baari aso ba alyele maami maave ma be! Okorogo ataara a bo bwa akiigi sa ma antuma a njyami ba ococa.»

Zezi ndi lejya anyon a be

²⁷ «Ŋaa mi elyele ŋa be ba le eyuzuga mi, lejya anyon a be, ŋaa lesa baari ba amabele be leve.

²⁸ Leta baari ba baabele be okuu ŋa lebwono ma ba baasa be maami maabi.

²⁹ Aka mbuuru mi bere we ma kabaa vura mpa nde kabaa keemon se. Ŋaa aka mbuuru mi yaga mfa we mpa se nde ngoyi.

³⁰ Mbuuru kalaa kalogo ka we, mpa nde. Ŋaa mbuuru kayaga kalogo ka we, we bizi nde kakata.

³¹ Maami ma asaga be ni abuga asa be mon, lesa se abuga mon.

³² Aka be kajya yuozi baari baajyi be, wura le be leje kaka lema? Ba kini va Njyami ŋi baasa se bwa.

³³ Aka be kasa ove ma baari ba baasa be ove, wura le be leje kaka lema? Ba kini va Njyami ŋi se baasa bwa.

³⁴ Ŋaa aka be kadifa ampara yuozi baari eli be le malege tari ni bo ba avuta be mon, ŋaa wura le be leje kaka lema? Se baari ba baasa obi ba adifa abuga a bo, ŋaa bo se ba jila mva lemigi le bo le ampi abuga.

³⁵ Lemono lemigi laasa be, lejya anyon a be, lesa bo ove, ŋaa le difa, lebiza kasaga ni avuta. Ma bwa wura le be leje kaka leenini ŋaa be leka baana a Njyami onkara yulu. Okorogo Njyami maasa baari ba baabiza yalaga leve ŋa angaa maami maabi, ove.

³⁶ Etuma e be eka beeve mva kali e Taara a be.»

Lebiza abuga kampama

³⁷ «Lendaga abuga kampama ma buni Njyami kabiza be kampama. Ŋaa lebiza kasisa abuga ncanke Njyami sisi be. Lebologo abuga a be ŋa Njyami kabologo be se.

³⁸ Lempa, ŋa se ampa be, ba afuga bugu leenini nca njyala e we, ba apya ba asege, elwula too, kabila ba yezege be ma lemigi le esali be.»

³⁹ Zezi vuri ti bo se ngana ndi: «Be lemoni ngaa miizi kali abuna bira buga eli se miizi kali? Bo abuele nca bila ka va ŋi?

⁴⁰ Oyigi kibuna vula oyizigi ŋi. Ŋaa aka oyigi wua mi yaa amaami ma yigi nde, nde yiga mva oyizigi.

⁴¹ We mema amono mfumfuzu yeeli nca jiizi le dumu a we, ŋi we akamono mpala oti ye eli nca jiizi le weankulu ŋi?

⁴² We ti akamono mpala oti yeeli nca jiizi le we ŋi. We mema alyele ndumu a we ni ya mi cieze mfumfuzu yeeli nca jiizi le we! Kura le be, baana cieze mpala oti yeeli nca jiizi le we, ŋaa we se mono taataa, we yiga abuna cieze mfumfuzu yeeli nca jiizi le ndumu a we.»

Zezi alyele ma oti bila mburu a nde

⁴³ «Oti woove akakula mburu yeemve ŋi. Ŋaa oti se woobi akakula mburu ye mve ŋi.

⁴⁴ Oti woove kaya ma mburu. Ba katolo elili kayila oncincene ŋi, ŋaa ba katolo mbologo kayila oncuma ŋi.

⁴⁵ Mbwuru woove kasa maami maave mva lemigi le otuma nde we ove. Ŋaa ngaa amaami obi kasa maami maabi mva lemigi le otuma nde we obi se. Okorogo onyua alyele me cimiŋi be kukuna ba otuma.»

Jaa le anjo amwele

⁴⁶ «Be mema le ecwolo mi ma Mfumu! Mfumu! ŋaa ŋi be le kasa maami ma lyele mi be ŋi?

⁴⁷ Mi emvyere be mbuuru we ayalaga mi, eli ayuga maami a mi, ŋa nde maasa mon.

⁴⁸ Nde mva mbuuru wo cui njo eli abila a nde alabigi ncina ncie. Ŋaa mpila mvula eya njo kibuna va ŋi kabila abila ayo kiigi ama labaga nca ncie taataa.

⁴⁹ Ŋaa mbuuru wo ayuga, ŋaa nde kabiza sa maami ma lemigi leyugi nde, nde mva mbuuru wo cui njo yila seyi, eli abaani ove onyaŋa. Mpila mvula eya ma njuru anjo yia esa waa yo evi, ŋaa ebogi eyo beeje kaka beenini.»