Luke 4 - Tege Kiwoyeti (teg) NT Portions

Jabiri amiga Zezi

¹ Ŋaa Zezi kamana yaga ateemi, nde kiigi wa okeri wo Zurde, mpari ye Oduduma Santi eseligi evuli nca nde. Ŋaa Oduduma Santi biri nde kanca biri eli baari kali.

² Kaŋaa, jabiri baani nde kamiga tii ekuumu ba ecugu ena. Bege le ecugu bia nde kilege se kalogo ma onyua ŋi. Ŋaa jo ewa njala esi nde.

³ Ŋaa jabiri ŋa nde ndi: «Ŋaa aka we sisiele Mwana Njyami kaala kele li, lo lekiriga lempembe.»

⁴ Ŋaa Zezi akaala ŋa nde ndi: «Ampiri maateende nca buku le Njyami ma lyele ndi: Omuon o mbuuru ka kaja katu ŋi.»

⁵ Jabiri selegi yeni bila Zezi yila ngaala, kancinci ŋaa nde mvyeri Zezi emfumu eyila ncie eso.

⁶ Nde ŋa nde ndi: «Mi empa we onkani oso bila lekuma le emfumu eso e ncye, kabila jo kiigi ama ampa mi, ŋaa mi ebuna mpa mbuuru wo njii mi.»

⁷ Ŋaa we aka ma abwu kavuzu o mi, biibi bi eso yiga eka e we.

⁸ Ŋaa Zezi akaala ŋa nde ndi: «Amaateende nca buku le Njyami ndi, bwono Mfumu, wo Njyami a we, kayila nde we kibuna bwono Njyami okima ŋi.»

⁹ Satan vuri biri nde Zerizaleme, oswuzi Zezi kayila Njo Njyami, ŋaa nde alyele ŋa nde ndi: «Aka we Mwana Njyami, ciga kambere kunu.

¹⁰ Okorogo amaateende nca buku le Njyami ndi: Njyami aciina antuma a nde a yulu, mabu ndi bo akiele we.

¹¹ Ŋaa bo babira we kayila jyala e bo, ma kaduma ŋi ncanke le taami le we le kumuŋi ma kele.»

¹² Ŋaa Zezi akaala ŋa nde ndi: «Amaateende se nca buku le Njyami ndi, we bizi kamiga Mfumu, o Njyami a we.»

¹³ Jabiri kamana yelege Zezi ma amigi aso, nde si je ntini mon, ma kasa jila ntini nkima.

Zezi aya vuruga Ngalile

¹⁴ Keeyi vuruga e Zezi Ngalile, mpari ye Oduduma Santi kiigi ema selege vula nca nde. Ncia nde eyeni ma tiniŋa le bungu le so.

¹⁵ Nde kayiziga nca njo ye ba bwono Njyami ŋaa baari ba kampa Njyami leve.

Mbari ye mpi nde ka Nazarete.

¹⁶ Zezi yeni Nazarete ka biri ye yeli nde. Ŋaa ma cugu le ba awuuma, nde nyuniŋi nca njo ye ba bwono Njyami, mva lemigi laa baana sa nde. Nde temiŋi ma kalira nca buku le Njyami,

¹⁷ Ŋaa ampi nde buku le ntuma Njyami wo acwoli ma Ezayi. Zezi naani buku ŋa nde moni biri eli amaateende ndi:

¹⁸ «Oduduma Mfumu li yila mi, kabila nde maa swolo mi, ma kampa afuga ncia yeemve. Nde ma atuma mi ma kalyele ŋa baari baali ma ongeneŋe, be lebuna kaje bila baali miizi kali, ndi bo baaje kamono taataa, nde ma atuma mi ma kavuzuga angaa onkari.

¹⁹ Ma kalyele ndi ntini e mito eli Mfumu amvyere be ove o nde.»

²⁰ Amana, nde vuni buku, nde vuti ŋa ojanji wo okuga wua, ŋaa nde ki manci. Ŋaa aso ba akiigi nca njo ye ba bwono Njyami miizi yila Zezi.

²¹ Ŋaa nde yiga abaana kalyele ŋa bo ndi: «Lubu mbari ye yugi be ye amaateende yia yiga jaajaa.»

²² Ŋaa baari aso baga lyele maami maave ma Zezi, ŋaa ekoli bo ma andaga maave ma kiigi cuzuga Zezi ma onyua nde. Bo ndi: «Nde ka mwana Zizefu ŋi?»

²³ Ŋaa Zezi ŋa bo ndi: «Ŋaa be le buuna kata mi ncincami ye ba lyele ndi, ombuga abyeri, ŋa salaga njuru weankulu. Aso ma ayiri ka kapenawume bila ma yugi bizi, ŋaa ma sa mon kanca kangundu ka weankulu.»

²⁴ Nde avura lyele ndi: «Sisiele, mi elyele be mi ni ba kayalaga maami a ntuma Njyami nca mpugu a nde-ankulu ŋi.

²⁵ Mi ŋaa jaajaa elyele be, ŋa ma ntini ye kiigi Eli ntuma Njyami, Njyami obiindi yulu esi esibi etari ŋa angondo asiami, ŋaa njala yeenini eyi kanca kasi kaso. Ŋaa kiigi ŋa bege le akaazi ba akwulu kanca kasi koankulu ka Ezerayele kia.

²⁶ Ŋaa Njyami kituma Eli se mpila okaazi wo okwulu okima nca bo ŋi, ŋaa Njyami tumi nde mpila okaazi wo okwulu wo mpugu ye Sarepete wo kasi ka Sidon.

²⁷ Ma ntini ye kiigi ntuma Njyami wo acwoli ma Elize, kiigi se ŋa bege le angaa ebila ka Ezerayele. Ŋaa Njyami kisalaga se ngaa ebila se omon kanca bo ŋi, kayila Naamane otu wo osi Siri.»

²⁸ Ŋaa bo aso baakiigi nca njo ye ba bwono Njyami abiri nkeri, ntini ye yugi bo maami maa.

²⁹ Bo atemiŋi, bo ajuti nde, bo abiri nde tii yila kakuru ka cui bo kangundu, ma kaciniŋa nde kambere.

³⁰ Ŋaa Zezi yiri kanca bo, ŋa nde yeni.

Onkani o mbari Zezi

³¹ Zezi oyeni kapenawume, nca kangundu ka Ngalile, ma cugu le ba awuuma, ŋaa nde yizigi baari.

³² Ŋaa ekoli bo ma lemigi leekiigi yiziga nde. Ŋaa Zezi kalyele bila onkani ba Njyami ba kampa nde.

³³ Nca njo ye ba abwono Njyami balaga le mon kiigi ŋa kapundu keebi kanca nde, kati nya bila jui leenini.

³⁴ «Ndaga mpaana bizi kaciina, Zezi wo Nazarete! We bizi ya ncazaga? Mi njayi we, ocece wo Njyami.»

³⁵ Zezi ŋa nde ma nkeri ndi: «Kapi, cwuga nca balaga li.» Ŋaa ko, kavuuzi nde nca mpanaŋa baari baa, ŋaa kapundu kia ka cuugi, ko ka kisa nde jaa leebi ŋi.

³⁶ Okuga wuozi moni bwogo, ŋaa bo awobi nca mpaniŋi a bo ndi: «Yia sila mbari ma! Nde kalyele kwa bila tari ŋa mpari yila epundu beebi, ŋaa jo ecuugi.»

³⁷ Ŋaa ancia a nde ayeni tii nca atiniŋa ma bungu leso.

Zezi asalaga abieri

³⁸ Zezi kaciege kanca njo ye baabwono Njyami, nde yeni njo Simon. Oko nde wo okaazi kiigi ŋa kabaa ka nkeri. Ŋaa bo adugi ŋa Zezi ma kabaga ancwo ma ngaa nde.

³⁹ Zezi ociini mpaana nde, nde bye ŋa kabaa, ŋaa ko kafi. Ŋaa wo baka bila kabaa, temiŋi yiga ma kampa bo biila.

⁴⁰ Muyi kava baari aso baakiigi ŋa angaa, mbuuru ŋa mbuuru wooli bila e nde ngaa yi mpa mpila Zezi. Ŋaa nde saligi bo.

⁴¹ Ŋaa epundu se be kiigi kanca bege le baari baa, ecwugi ma kawula anya: «We Mwana Njyami!» Ŋaa Zezi ligi bo ndi bo aka pi, kabila bo kiigi ayaa ndi nde Kristi ntuma Njyami.

Zezi kanca ekuga e Njyami e Zide

⁴² Cugu oca, nde cwugi, nde yeni nca biri eli baari kali. Bege le baari le kasaga nde. Ŋaa bo ayi tii mpila nde. Bo akali Zezi ma buni nde kaka bila bo.

⁴³ Ŋaa Zezi ŋa bo ndi: «Ave mi se yeni nca engundu beemon, ma kampa bo ncia yeemve ye eli Njyami yiga aya bila omfumu o nde, kia kabila ka Njyami katuma mi yila ncie.»

⁴⁴ Ŋaa Zezi kaje ma kampa mbari a Njyami kanca anjo ma baabwono ma tiniŋa le Zide.