Luke 3 - Tege Kiwoyeti (teg) NT Portions

Ntuma Njyami

¹ Kasibi ka kwumu ŋa otaani ka kiigi Tibere Sezare mfumu kasi. Ntini yia ye kiigi Pontese Pilate okunji wo bungu le Zide. Erode Atipase mfumu a Ngalile. Ndumu a nde Filipe kiigi okunji wo Liture bila bungu le Tarakonite, Lyzaniyase okunji wo bungu le Abilene.

² Ŋaa Anaa bila Kayife kiigi ampi ambwoŋi baanini. Ŋaa ma ntini yeankulu yia Njyami wobi ŋa Zan, mwana Zakari kanca biri eli baari kali.

³ Zan yiri ma ebiri eso ba bungu le lesuniŋi ŋa okeri o nkuumu Zurde, nde amono ata obamaŋa ndi: «Lekaala eku e be, leyaga ateemi, ŋaa Njyami kabologo maami a be maabi.»

⁴ Mono lemigi le teende ntuma Njyami wo nkuumu Ezayi, nca buku le nde ndi: «Jui le mbuuru leta obamaŋa nca ncege. Leselege Mfumu njila, lesa anjila a nde aka tele.

⁵ Edebi njwori esiliga, ekuru njwori bila angaala ajiniŋa. Anjila ma enkoro aka tele, aselege anjila ma abi.

⁶ Ŋaa baari aso baamono kasaga vuzuga Njyami bo.»

⁷ Zan alyele ŋa bege le baari le leyi ma kayaga le ateemi, ndi: «Be ŋa kura mva ampili! We olyele be ndi be le duma opami a Njyami wo aya na?

⁸ Lesa maami maave ma kamvyere ndi be le mi kaala eku. Ŋaa lebiza kalyele ma be ankulu ni, bizi ampabigi ba Abarayame! Okorogo mi elyele be ni Njyami abuna kayaga akele ma buni mon akirigi ampabigi ba Abarayame.

⁹ Njyami yiga tuga ma kampama baari eli kikaala eku ŋi, mva ka balege kawunu ma kacaga ekaŋa ba eti beebi eli kikula mburu ŋi. Ŋaa ba acuna jo ka mbaa.»

¹⁰ Ŋaa kuna le baari lia le epiza ndi: «Ŋaa bizi lesa bunu?»

¹¹ Zan akaala ŋa bo ndi: «Ŋaa mbuuru oli ŋa angoyi mwele mpi buga oli ŋa kaama mon, ŋaa wooli ŋa biila osi se bwa.»

¹² Angaa lempo, ayi mono nde se ma kayaga ateemi, ŋa bo ndi: «Mfumu, ŋaa bizi lesa bunu?»

¹³ Nde ŋa bo ndi: «Lebiza mvunu ye ampi be kalusa.»

¹⁴ Aworo se apizi nde ndi: «Ŋaa eto ma bizi, bizi lesa bunu?» Nde akaala ŋa bo ndi: «Lebiza baari ampara kayaga, bila mpari sikali ma alaa, ŋaa be kakese wura le be.»

¹⁵ Bege le baari lia ba kajila bila tari, ma kamono Kristi ntuma Njyami, ŋaa bo aso ba kacimiŋa ndi, Zan kiigi ntuma wua.

¹⁶ Nde akaala ŋa bo aso ndi: «Ma mi ateemi ma katuba be ma anja, ŋaa mbuuru wo aje kaya vuli mi onkani. Ŋaa mi eka buna kasuga otele tele ka miizi a nde ŋi. Nde aje kampa be ateemi ma Oduduma Santi bila ma mbaa.

¹⁷ Nca kwogo ka nde, nde ma kuara kacegi ma kasege mburu. Nde kayaga mburu, nde kalege nca otalaga. Ŋaa nde kayaga ebu nde kacuga ka mbaa ya ye bira dima.»

¹⁸ Zan mpi ncia yeemve ŋa baari bila bege le anjwo akima ma yiezi nde bo.

¹⁹ Ŋaa Zan yuumi Erode wo kiigi mfumu a bungu kabila nde vuri bala Erodiyase wo okari a ndumu a nde. Ŋaa Erode se kiigi maasa bege le maami akima maabi.

²⁰ Ŋi Erode vuri si jaa lekima le levuli obi, nde tumi kalege Zan ma ongeneŋe.

Zezi ayaga ateemi

²¹ Ntini ye mani Zan ka mpa bege le baari aso ateemi, Zezi se oyi yaga a nde ateemi se. Ŋaa ntini ye kiigi bwono Zezi, yulu le naaŋi,

²² Ŋaa Oduduma Santi surigi yila nde ma kadisi akuuna le kubigi. Ŋaa ayuga jui le fi yulu ndi: «We Mwana mi ojya, we ampa mi kase.»

Kacia ka Zezi

²³ Kabaani Zezi janja, nde kiigi yiga ŋa ekwumu ba esibi etari. Ma lemigi le baari le acimiŋi ndi nde mwana Zizefu. Zizefu mwana Eli.

²⁴ Eli mwana Matate, Matate mwana Levi, Levi mwana Meleki, Meleki mwana Zanayi, Zanayi mwana Zizefu,

²⁵ Zizefu mwana Mataciyase, Mataciyase mwana Amose, Amose mwana Nawume, Nawume mwana Esili, Esili mwana Nangayi,

²⁶ Nangayi mwana Maate, Maate mwana Mataciyase, Mataciyase mwana Semeyi, Semeyi mwana Yoseke, Yoseke mwana Yoda,

²⁷ Yoda mwana Yoyanane, Yoyanane mwana Resa, Resa mwana Zorobabele, Zerobabele mwana Salatiyele, Salatiyele mwana Neri,

²⁸ Neri mwana Meleki, Meleki mwana Adi, Adi mwana Kosame, Kosame mwana Elemadame, Elemadame mwana Ere,

²⁹ Ere mwana Zezi, Zezi mwana Eliyezere, Eliyezere mwana Zorime, Zorime mwana Matate, Matate mwana Levi,

³⁰ Levi mwana Simiyon, Simiyon mwana Zida, Zida mwana Zizefu, Zizefu mwana Yoname, Yoname mwana Eliyakime,

³¹ Eliyakime mwana Meleya, Meleya mwana Mena, Mena mwana Matata, Matata mwana Natame, Natame mwana Davide,

³² mwana Zese, Zese mwana Zobede, Yobede mwana Booze, Booze mwana Sala, Sala mwana Naasone,

³³ Naasone mwana Aminadabe, Aminadabe mwana Adimine, Adimine mwana Areni, Arini mwana Esirome, Esirome mwana Farese, Farese mwana Zida,

³⁴ mwana Zakobe, Zakobe mwana Izake, Izake mwana Abarayame, Abarayame mwana Ntera, Ntera mwana Nakore,

³⁵ Nakore mwana Seruke, Seruke mwana Rango, Rango mwana Faleke, Faleke mwana Ebere, Ebere mwana Sala,

³⁶ mwana Kayinane, Kayinane mwana Arifazade, Arifazade mwana Seme, Seme mwana Nowe, Nowe mwana Lameke,

³⁷ Lameke mwana Matusaleme, Matusaleme mwana Enoke, Enoke mwana Yarete, Yarete mwana Maleleyele, Maleleyele mwana Kayinane,

³⁸ Kayinane mwana Enose, Enose mwana Sete, Sete mwana Adame, Adame mwana Njyami.