Luke 2 - Tege Kiwoyeti (teg) NT Portions

Ekuli e Zezi

¹ Ntini yia ye ecugi mfumu kasi omon wo acwoli ma Sezare Ongisete, ŋaa nde alyele ndi ave asi oteende yila ncie nde eso.

² Bia esi ecomi ba oteende wo bwa. Ŋaa ntini ye cwugi oteende wua, ana maa ma kiigi okunji a bungu wo acwoli ma Kirinise ka Siri.

³ Ŋaa oteende wua, mbuuru ŋa mbuuru, aje sa nde kanca kangundu ka kuli nde.

⁴ Ŋaa Zizefu se ciegi bungu le Ngalile, kanca kangundu ka Nazarete, ma kaje Zide, nca bungu le kangundu ka Davide ka acwoli ma Beteleyeme. Kabila nde kiigi mpabigi ye Davide.

⁵ Ma kateende nde bila Mariya, okaazi wo nde wo kaswolo kiigi yiga ŋa yimi.

⁶ Ntini ye kiigi bo ka Beteleyeme ŋaa, antini ma akula Mariya kiigi amito.

⁷ Ŋaa nde kuli mwana nde oncomi, kiigi balaga. Nde vubigi mwana kanca mfa, nde swuzi mwana ma tolo kanca biri ye ba bunuŋa eva. Kabila ebiri kiigi emawa kanca njo ye aka anjia.

Ntuma Njyami mi ya mpila ancuga eva

⁸ Nca tiniŋa loankulu lia kiigi ŋa ancuga eva. Ba akiigi yira kekinkolo ma kayieze anjiimi a bo ma eva.

⁹ Ŋaa mono ntuma omon a yulu yi mpila bo, ŋaa lekuma le Njyami lejeniŋi bo, kamaŋi keenini kasi bo.

¹⁰ Ŋaa ntuma a yulu ŋa bo ndi: «Lebiza bwogo kamono! Okorogo mi minja mpa be ncia yeemve, ya ye ka kase ka baari aso.

¹¹ Lempiibi le lubu kanca kangundu ka Davide, ami kula be Ovuzigi, nde kamaka Kristi, Mfumu

¹² Be leto ŋaa be lemono kaliimi ka eya be nde, be lemono mwana wo amavubuga kanca mfa, nca biri ye ba bunuŋa eva.»

¹³ Parabu, bege le antuma a yulu ayi baga ntuma oncomi wua, ŋaa bo aso abaani kampa Njyami lekuma, ŋaa bo ndi:

¹⁴ «Lekuma leka ŋa Njyami ka kara yulu, ŋaa kadusu ka Njyami kayila ncie kaka ŋa baari eli nde ŋa njala bo.»

Ancuga eva baaje Beteleyeme

¹⁵ Ntini ye nyini antuma a yulu bo, ma kavuruga yulu. Ancuga eva akuri oyia ndi: «Le ma ya nce Beteleyeme ma kamono jaa le lemiya ka kwa mva lemigi le lyeli Njyami wo mfumu a bizi a be.»

¹⁶ Bo ayeni ŋa asisari, ŋaa bo amoni Mariya bila Zizefu, ŋa kapeyi ka mwana, kali ma tolo kanca biri ye eja eva.

¹⁷ Bo amana mono nde, bo abaani kanaana maami a ntuma Njyami ma ka dugi bo ma mwana wua.

¹⁸ Ekoli baari aso ba akiigi yuzuga ancuga eva. Ntini ye kiigi naana bo maami maa.

¹⁹ Ŋaa Mariya kakiele maami maa aso, ŋaa nde kacimiŋa mon kanca otuma nde.

²⁰ Ŋaa ancuga eva avurigi ma ka kazaga bila ma kampa Njyami leve, ma maami aso ma ayugi bo bila ma moni bo, ŋaa bo amoni ndi sisiele.

Kiza le asi Zezi ncazi

²¹ Amana akula mwana, kayinga kamon kayira, yiga etoyi ntini ye baasa mwana ncazi. Aŋi nde nkuumu ye Zezi, nkuumu ye mpi ntuma a yulu Mariya eli nde kiigi kini bira yimi ŋi.

Kampa le mwana ŋa Mfumu

²² Antini ma kacieze Mariya angiri ato, ma lemigi le ngiri a Mfumu ye ka dugi ŋa Moyize. Zizefu bila Mariya abiri mwana kangundu ka Zerizaleme, ma kampa nde ŋa Njyami.

²³ Bwa ma kanyima maami maateende kanca angiri a Mfumu: Aka mwana oncomi wua balaga aswuzi nde ma janja le Mfumu,

²⁴ Ŋaa ma kampa ambwoŋi: «Akuuna mwele si kali ebuzu ba aminga jyele, mva lemigi le ateende kanca ngiri e Mfumu.»

Simiyon mpi Njyami leve ma Zezi

²⁵ Ŋaa mono kiigi ŋa balaga lemon ka Zerizaleme nkuumu simiyon. Balaga lia kiigi tele, nde kiigi nyima Njyami, nde kiigi jila mbuuru wo Njyami wo ka aje katuma ma kavuzuga baari ba Ezerayele. Oduduma Santi oli bila nde.

²⁶ Ŋaa Oduduma Santi kiigi ma amana kayieze nde ndi, nde akasa akpaa eli nde kini mono Kristi ntuma Njyami wo aya vuzuga baari ŋi.

²⁷ Nde yi nca Njo Njyami, Oduduma tumi nde. Ma ntini yia, taara Zezi bila ngwugu a biri nde. Ma kaje bila ma kasa maami ma lemigi le amaateende kanca angiri a Mfumu.

²⁸ Ŋaa Simiyon yagi mwana nca jiala e nde, nde mpi Njyami lekuma, ŋaa nde ndi: yele

²⁹ «Mfumu, ŋaa yiga nyina oyiga a we akpaa nca kadusu mva ka alyele we.

³⁰ Okorogo miizi a mi amimono ovuzigi.

³¹ Mbwuru a we wo swolo ma baari aso.

³² Nde kafii ka keesa esi eso ma kayaa we. Nde mbuuru we aya mpa lekuma ŋa baari ba Ezerayele.»

³³ Taara Zezi bila nguugu a nde kiigi nca akimi, ma maami a Simiyon ma kiigi lyele nde ma mwana.

³⁴ Simiyon obuoni Njyami ma kampa bo puga, ŋaa nde ŋa Mariya ndi: «Ma mwana wu bege le baari ba tamaŋa, bege le vuuga kanca Ezerayele. Nde kamaka njiimi e Njyami eli kuna le baari le ebele nde.

³⁵ Ma buni ayaa ecimiŋi ba eka kanca etuma e baari ba akukuna. Ŋaa we wo ngwugu a nde amono nkeri ma otuma, mva katuba baga le ampele mwele otuma.»

Anaa ampa Njyami leve ma Zezi

³⁶ Kiigi ŋa ntuma Njyami wo okaazi se, nkuumu Anaa, mwana Fanuyele wo njo Azere. Nde kiigi yiga nga mbuuru, ŋaa nde kiigi yiga mi sa esibi ncaami bila olumi a nde, olumi a nde kpi.

³⁷ Ŋaa nde siili okwulu, nde kiigi ŋa ekwumu ba esibi mpuomon ŋa ena. Antini aso nde kiigi kaka nca Njo Njyami, nde kasa janja le Njyami mpiibi bila muyi. Nde kaka njala bila nde kabwono.

³⁸ Anaa bila Simiyon ayi ma tari lo ankulu lia nca Njo Njyami, ŋaa bo ba kampa Njyami leve. Ŋaa antini aso nde kalyele ma mwana, ŋa baari aso ba akiigi jila ovuzigi wo ka kangundu ka Zerizaleme.

Zezi yeli ka Nazarete

³⁹ Ntini ye Taara a Zezi bila ngwugu a nde ye amani kasa maami maateende kanca angiri a Mfumu. Bo avurugi kangundu ka Nazarete mpila bo, nca bungu le Ngalile.

⁴⁰ Ŋaa mwana yeli, ŋaa nde wami, nde kiigi ŋa ncimi yeenini. Ŋaa Njyami kiigi maalege puga leenini kayila nde.

Zezi nca Njo Njyami

⁴¹ Taara Zezi bila ngwugu a nde kiigi ba kaje Zerizaleme esibi eso. Ntini ye kiza le Paake, le ba baraga ecyegi ba annkaaga a bo Ezipite.

⁴² Nde kato esibi nkuumu ŋa jyele, bo ayeni bila nde Zerizaleme mva ma lemigi le abaana sa baari a bo akala.

⁴³ Kiza lewa bo avurigi. Zezi wo mwana siili ka Zerizaleme, bo akiyaa biri le siili nde ŋi.

⁴⁴ Bo asi cugu leciina ma njila, bo amono ndi nde li bila baari ba baaje njila mon bila bo. Bo ayiri ma kasaga nde mpila ankwono a bo ŋa andigi.

⁴⁵ Ŋaa bo akimono nde ŋi, bo avurigi Zerizaleme ma kasaga nde.

⁴⁶ Ŋaa cugu le otari, le emoni bo nde nca Njo Njyami, nde li manci kakari le ayizigi angiri, nde ayuzuga bo. Ŋaa nde alege bo ejugu.

⁴⁷ Aso ba akiigi yuzuga nde, ekoli bo, ma oyeri bila ekali e nde.

⁴⁸ Taara bila nguugu amono nde, ekoli bo, nguugu ŋa nde ndi: «Mwana mi, we mema sa bizi bwa. Mono bizi a taara we le baasaga we bila kangwo.»

⁴⁹ Nde kaali ŋa bo ndi: «Be jaa le lesaga mi lema? Be le ki ya mini ave mi ki nca njo Taara mi ŋi?»

⁵⁰ Ŋaa bo akiyuga se jaa lemon ŋi.

⁵¹ Zezi surugi bila bo ma kaje Nazarete, ŋaa nde onyimi bo. Ŋaa ngwugu ka kiele maami ma aso kanca otuma.

⁵² Zezi yeli, ŋaa ncimi a nde ya kaselege kaje levuzu, ŋaa nde kiigi ŋa ove ka miizi a Njyami bila a baari.