Luke 17 - Tege Kiwoyeti (teg) NT Portions

Zezi ayieze alwoni a nde

¹ Zezi ŋa alwoni a nde ndi: «Amaami ma ma atuma baari makasa maami maabi maka bira kaama ŋi, ŋaa ewuani mbuuru wo aya ma katasa le abuga ma buni bo ava nca maami maabi.

² Nkala ntanta akuri nde tagi ma nkii ŋaa acuni nde nca oduba woonini, ŋaa ka ni nde tasi onkere omon nca bo, makasa amaami maabi ŋi.

³ Ŋaa lesa oyeri! Aka ndumu a we mi sa we jaa leebi, lyele bila nde, ŋaa nde kaya ncozo nde, bologo nde.

⁴ Ŋaa nde kasa we maami maabi nja ncaami ma oyiila cugu omon, ŋaa nde kayavuruga mpila we nja ncaami ma kalyele we ndi: Maami maasa mi we abi, bologo nde.»

Zezi alyele ma lila

⁵ Antuma ŋa Mfumu ndi: «Mpa bizi lila le levuli li.»

⁶ Ŋaa Mfumu ŋa bo ndi: «Aka be ŋa kelila mva le mburu lejulu, be lebuna kalyele ŋa oti wu ni: Cieze ekaŋa ka ŋa we je piga jo nca oduba woonini, ŋaa oti wua anyiima be.»

Lejanja bila otori

⁷ «Ŋaa aka mbuuru omon nca be ŋa oyiga, wo akuna nde anguunu sikali nde acuga eva e nde, ŋaa aka nde mi wa angwunu, nde kasa alyele ŋa ojanji ndi, sa aja?

⁸ Kali, nde kalyele ŋa nde ndi: Laama mi biila, ŋaa we kaala amfa, we lege mi biila mi nja, mi nyua. Ŋaa e we ntini eto, we se ja, ŋaa we nyua.

⁹ Nde akayuuza oyiga wua, ma lemigi lesi ojanji wua maami a nde ma katumi nde kasa ŋi.

¹⁰ Mva ka li be, aka be lemimana sa maami aso ma atumi Njyami be kasa. Lelyele ni bizi ayiga akali akali, bizi lemimana kasa janja le atumi bizi kasa.»

Zezi asalaga angaa ebila

¹¹ Ntini ye Zezi ye ka kiigi je kacu ka Zerizaleme, nde yiri ka avunuŋu ma bungu le Samari bila le Ngalile.

¹² Nde kato cwo mpugu mon, mono angaa ebila kuumu kabaya mpila nde.

¹³ Ŋaa bo aki kalala, ŋaa bo ati nya ndi: «Aaa Zezi, Mfumu! Yamaŋa bizi.»

¹⁴ Zezi kamono angaa ebila baa, nde ŋa bo ndi: «Leje be le mvyere anjuru a be ŋa baari ba baampa ambwoŋi kanca Njo Njyami.» Ŋa evi e bo ma njila, bo akese bu, bo amimana wuuma.

¹⁵ Ŋaa omontu nca bo kamono ndi nde mi wuuma, oyi vuruga, ŋaa nde tesi jui ma kampa Njyami leve.

¹⁶ Nde vi kancina miili e Zezi ŋaa nde legi kalii nca ncie. Nde mpi nde leve, ŋaa mbuuru wua kiigi osi Samari.

¹⁷ Ŋaa Zezi ndi: «Mi bo ni kuumu saligi, ŋaa abuga baamon awoa e bo?

¹⁸ Kangula jya li, se mbuuru okima kanca bo wo barigi makaya mpa Njyami leve kali?»

¹⁹ Ŋaa Zezi ŋa mbuuru wo Samari wua ndi: «Temeŋe, we abuna je, Njyami mi salaga we kabila we ma yalaga.»

Eyi ba omfumu o Njyami kanca mpanaŋi a be

²⁰ Afarizi baapiza ŋa Zezi ndi: «Omfumu o Njyami ma ntini ma bo ya?» Ŋaa Zezi akaala ŋa bo ndi: «Omfumu o Njyami bo kaya mva kalogo kaba mono ŋi,

²¹ ba kalyele ndi: Bo eba kaŋaa ŋi, sikali bo eba ka ku ŋi. Okorogo omfumu o Njyami o mi mana ya oli kanca mpanaŋi a be.»

²² Amana Zezi ŋa alwoni a nde ndi: «Ntini ye je kaya eli be lejia kamono Mwana Mbwuru se ma cugu lemon, okorogo be le kamono nde ŋi.

²³ Ma ntini yia baari ba lyele be ndi: Nde li ka kunu, sikali: Nde li ka ku. Ŋaa be lebizi kaje, be lebizi se kabira nciini kali akali.»

²⁴ Kabila cugu leya Mwana Mbwuru leka mva kawaa ka keya asizigi, ŋaa kafii ka nde ke ciege ncuo ŋa ncuo yulu yeemon.

²⁵ Keeyi ejaa lya ave Mwana Mbwuru si baana mono mpasi yeenini, ŋaa leca le lubu li le ebele nde.

²⁶ Maami moankulu ma ayiri ma ntini ye kiigi Nowe kalakala, ma je kaya ma cugu le eya Mwana Mbwuru.

²⁷ Baari ba kaja, ba kanyua, ba kabala, ba kampa baana a bo ma abaala, tii ntini ye nyunuŋi Nowe nca asua. Kasi kaso kalindi ŋaa baari asiso akpi.

²⁸ Sikali ye ka mva ntini ye Lote, baari ba kaja, ba kanyua, ba kasuuma, ba katege, ba kakuna, ba kasa ocuyi.

²⁹ Ŋaa cugu le Lote leka cyegi kangundu ka Sodome, Njyami ciini akele bila ofuru wo mbaa, fi yulu mva mvula ŋaa baari baa aso akpi.

³⁰ Cugu leya mvyere Mwana Mbwuru njuru ŋa baari, ye ka osumbu nde-ankulu wua.

³¹ «Ma cugu lia, mbuuru wo aka kayila njo akamavura baga oyeri ba ka suraga, ma kanyunuŋa nca njo nde ma kayaga biibi ŋi. Mbwuru wo aka kanca ngwunu kimasaga kavuruga njo nde ŋi.

³² Lebaraga jaa le emoni okari a Lote

³³ Mbwuru wo akaana ma kakiele osumbu wo ba asa nde, akpaa. Ŋaa we asaga ka kpaa ma nkii a mi, nde abaga omuon.

³⁴ Ee, mi ŋaa jaajaa elyele be ni, ma ntini yia, baari bwele ba baaka kayila ntari mon, Mwana Mbwuru ayaga omon, ŋaa omon asiila

³⁵ Ŋaa akaazi bwele ba basiga biibi, baayaga omon, ŋaa woomon asiila. [

³⁶ Baari bwele ba baaka nca ngwunu mon, omon baayaga ŋaa woomon baanyina.»]

³⁷ Alwoni baapiza ŋa Zezi ndi: «Ee Mfumu, maami maa kakunu ma yira?» Ŋaa Zezi akaala ŋaa bo ndi: «Biri eka ebiima ye ekuga enkpaaga.»