Luke 15 - Tege Kiwoyeti (teg) NT Portions

Kandombo ka kanyuoŋo ŋaa amivura mono

¹ Angaa lempo aso bila abuga akima ba baasa maami maabi, ayi mpila Zezi ma kayuga mbari a nde.

² Ma bwa afarizi bila ayizigi angiri yiga ba ajorogo Zezi kanca paniŋi a bo ndi: «Yi sila mbuuru ma, eli ayaligi kaka bila baari ba baasa maami maabi, ŋaa nde aja bila bo?»

³ Ŋaa Zezi kayuga osumbu wo kiigi lyele bo, nde ti bo ngana ndi:

⁴ «Nca be aka ŋaa mbuuru eli nde ŋa ekwumu ba endombo kwumu, kandombo kamon kanyoŋo, nde aka nyina endombo ba ekwumu woa ŋa woa nca ncege, ma kaje saga kaka mi nyuoŋo ŋi?

⁵ Ŋaa ntini ye amono nde ko, nde yagi kandombo kia nca kase keenini, biri kayila koro nkii.

⁶ Nde kayavuruga njo, nde cwoli andigi bila abuga ba baaka mpaana nde. Ŋaa nde ŋa bo ndi: Leya bizi a be leswere kabila mi mi vura mono kandombo ka kanyuoŋi.

⁷ Mi elyele be ni, ma lemigi loankulu lia, Njyami bila antuma a nde baamono kase keenini, kabila mbuuru wobi omon mi yalaga Njyami mi kala eku e nde. Ŋaa ka kase ka enkuumu e baari woa ŋa baari woa baama amana yalaga Njyami ŋi.»

Ngana ye doro le enyuoŋi ŋaa amivura mono

⁸ Ŋaa Zezi vuri ti ngana kima ndi: «Sikali aka ŋa okaazi eli ŋa ampara kwumu, ŋaa nde katasa doro omon, nde aka sa acuga munda, nde si kuomo njo, ma kasaga yemiŋi tii kamono nde doro lia ŋi?

⁹ Ŋaa ntini ye amamono nde doro lia, nde cwoli andigi bila abuga ba baaka mpaana nde, nde ŋa bo ndi: Leya bizi a be leswere kabila mi mimono doro le mi le lenyuoŋi.

¹⁰ Mi elyele be ni, ma lemigi loankulu lia, Njyami bila antuma a nde baamono kase keenini kabila mbuuru wobi omon mi yalaga Njyami mi kala eku e nde.»

Ngana mwana wo tamiŋi

¹¹ Ŋaa Zezi avura ta ngana nkima ndi: «Mbwuru omon kiigi ŋa baana ba abalaga bwele.

¹² Mwarigi ŋa taara ndi: Kolokolo we ataara ŋa le mi wanda. Ŋaa taara se kabi bo.

¹³ Ecugu eyira, mwarigi yagi le nde wanda tegi, kayaga ampara, oyeni kasi ka kima kalala, kato ŋaa nde biizi ampara ma akaazi ba ebila.

¹⁴ Nde kama mana ampara a nde aso, mono njala yeenini ka yeeva kanca kasi kia. Nde kiigi yiga nca kaama.

¹⁵ Nde yeni saga janja mpila mbuuru omon otu wo kasi kia, wua tumi nde ma kaje janja, ma kaje kyele enguu kanca anguunu a nde.

¹⁶ Nde njala esi, nde kakese bu ndi nde kaja biila ba enguu. Ŋaa mbuuru wo ampa nde jo onyaŋa.

¹⁷ Ŋaa mwarigi wua yiga abaraga maami masi nde, ŋaa nde ndi: Mono mi ekpa ma njala yeenini kakunu ŋi ajanji a taara mi ba apozogo biila.»

¹⁸ Mi esaraga, mi eje mpila taara mi ŋa mi eto mi lyele nde ni: Taara mi, mi maasa maami maabi ka miizi a Njyami bila a we,

¹⁹ mi yiga ka mva mwana we ŋi, yiga yaga mi ma ojanji a we.

²⁰ Nde kamana cimiŋa bwa, nde sarigi, vurugi mpila ataara. «Taara ka taala mwana ka kaya, nya esi nde, obiri nciini yeni mpila mwana, nde pori mwana, nde yiga aswere bila mwana.

²¹ Ŋaa mwana ŋa taara ndi: Mi maasa amaami maabi ka miizi a Njyami bila a we. Ŋaa yiga ndaga mi ka ma acwolo ma mwana we.

²² Ŋaa taara ŋa ayiga a nde ndi: Le sanaŋa ya bila nde mfa yeevuli owali, le laaza nde yo, le lege nde nkwere ma olyemi, ŋa akorogo.

²³ Leje kwara ngoombi wooli ŋa maari wua, ŋa lebuma nde, bizi a be leja, leswere.

²⁴ Kabila mwana mi wu kiigi mva wo ma akpaa ŋaa nde mi nyuzuga, nde kiigi ma tamaŋa ŋa mi mimono nde. Ŋaa bo yiga baaswere.

²⁵ «Kaasa bo bwa okulu kiigi maaje anguunu, kamaya ka mpaana njo yugi luumu leeyiriga bila akini.

²⁶ Ŋaa nde cwoli ojanji omon nca bo, ŋaa nde pizi nde ndi: Jo ema esa kunu?

²⁷ Osali kaali ŋa nde ndi: Mwaragi a we wo je, ma yavuruga li yemiŋi, yia biri le taara we ye katumi ndi abuma ngoombi wooli ŋa maari wua.

²⁸ Okulu kamayuga bwa nkeri esi, osugi, oki kajii. Taara nde o cuugi makaya bwono nde, ŋaa nde ŋa mwana ndi: Kolokolo we ya nyunuŋa nca njo.

²⁹ Ŋaa mwana akaala ŋa nde ndi: Ee taara, ma mono kuna le esibi li lesa mi osali o we mva oyiga. Mi nkini ndaga a njila a we ni. Ŋaa we kini mpa se mi mwana ntaba, ma kaswere bila andigi a mi ŋi.

³⁰ Ŋaa mwana we wu kaya, nde wo je biiza kabaga ka we bila akaazi ba ebila. Ŋaa eto ma nde we mi buma ngoombi wooli ŋa maari wua!

³¹ Taara kaali ŋa nde ndi: Mwana mi we ni bila mi aka ecugu eso, biibi e mi eso ni e we?

³² Yo ŋaa yemiŋi ave bizi a be le swere. Kabila mwana mi wu kiigi mva wo ma akpaa ŋaa nde mi nyuzuga, nde kiigi ma tamaŋa ŋaa mi mimono nde.»