Luke 12 - Tege Kiwoyeti (teg) NT Portions

Zezi ndi: Aso ma maasa ma oyeri baaya

¹ Baari akugi ŋa njimi, bo kiigi yiga ba ajata abuga, Zezi yiga abaana kalyele ŋa alwoni a nde ndi: «Lesa oyeri ma afarizi, bo mbila ywele mva anganga ma maalege ma kalusa farini.

² Jaa le baasa ma ayizigi le baabiza yaa kali, aso ma maasa ma oyeri ba ayaa.

³ Yia biri eli maami ma alyele be aso ka lempiibi, baayuga mon ka muyi. Ŋaa ma alyele be kanca ncu nca katini ka njo, ba alyele mon ka miizi a baari.»

Kalege le tari ma Njyami

⁴ «Be ba andigi mi, mi elyele be ni, lebiza bwogo ba baari ba baabuma njuru ntu kamono. Kabila bo amana ŋaa jaa lekima le maasa bo la levuli bwa kali.

⁵ Mi elyele be, mbuuru eli be le ebuna kanyiima Njyami nde otu, kabila nde ŋa mpari ma kabuma mbuuru, ŋaa amana nde cuni kanca mbaa ye yeebiza kaduma. Ee! jaajaa ave be le nyimi Njyami.

⁶ «Be leyaa ni baatege anjuuya ataani ma ampara bwele atu. Okorogo Njyami akalimiŋa se omon otu nca bo ŋi.

⁷ Njyami yayi otali a mfu a be. Be lebizi bwogo kamono. Ka miizi a Njyami, be levuli anyoyi.»

Lebiza okuru ma mi kamono

⁸ «Mi elyele be ni, mpini mbuuru kayalaga mi ka miizi a baari, ŋaa Mwana Mbwuru se ayalaga nde ka miizi ma antuma a yulu.

⁹ Ŋaa mbuuru katuna mi ka miizi a baari, mi wo Mwana Mbuuru se etuna nde ka miizi ma antuma a yulu, mini mi kiyaa nde ŋi.

¹⁰ Mpini mbuuru kalyele ma maami maabi ma Mwana Mbwuru, ba abologo maami a nde, ŋaa mbuuru kalyele ococa ma Oduduma Santi, ba kabuna bologo maami a nde ŋi.

¹¹ Ntini ye ba bira be kanca anjo ma baabwono Njyami, kampila apami baanini bila ankani ma kampama be. Be lebizi kabaraga me ekali e be bila maami ma alyele be.

¹² Ŋaa ma ntini yia, Oduduma Santi alyele be lemigi le alyele be kancinci ŋaa.»

Kabaga ka kivula omuon ŋi

¹³ Kanca lembuuru, mbuuru omon dugi ŋa Zezi ndi: «Mfumu lyele ndumu a mi, bizi a nde lekaba wanda le ataara bizi a nde.»

¹⁴ Zezi kaali ndi: «Wo lyele be ndi mi nkani a be na? Sikali wo lyele be ndi mi okabi wanda le be na?»

¹⁵ Amana bwa Zezi ŋa baari aso ndi: «Lesa oyeri! Lebiza kalo otuma ma kabaga kayila ncye. Kabila omuon o mbuuru ka biibi ba kabaga ŋi, se mbuuru wua kabaga kavuli.»

¹⁶ Zezi ti bo ngana ndi: «Ngaa kabaga kiigi ŋa angwunu, ŋaa nde mon ampi bege le biila.

¹⁷ Ŋaa ngaa kabaga wua kacimiŋa, ŋaa nde ndi: Mi bunu esa? Kabila mi biri eli mi selege lege biila emi bi kali.

¹⁸ Nde ndi: Mono lemigi lesa mi, ŋaa mi ecala etalaga emi, ŋaa mi ncua ba evuli onini, mi elege mburu bila biila emi eso.

¹⁹ Ŋaa mi yiga ebuna kalyele meankulu ni, mi yiga ŋa biila ekukuna ma nkuugu esibi bege. Mi wuuma, mi ja, mi nyua ŋa mi suere.

²⁰ Ŋaa Njyami ŋa nde ndi: We ojiri! Lempiibi loankulu li, mi ecieze owuru a we. Ŋaa eso e we be kuzigi, ŋa na be siila?»

²¹ Zezi lusi ndi: «Mono jaa le leya ma mbuuru wo asaga kabaga ka nde-ankulu, ŋaa ka miizi a Njyami nde kalogo kali.»

Omuon ovuli biila ba kaja

²² Zezi dugi ŋa alwoni a nde ndi: «Lenyina kabaraga ni, bizi ema leja, bizi ema le laaza.

²³ Ŋaa omuon ovuli biila ba kaja, ŋaa njuru evuli amfa.

²⁴ Lekese enkpaaga, jo be ka kuna ŋi, jo be ka tolo ŋi. Jo etalaga ba kakiele biibi kali. Ŋaa Njyami abunuŋa jo, ŋaa ka miizi a Njyami be levuli anyoyi.

²⁵ Mbwuru kanca be na, eli ma ebarigi e nde, abuna kalusa ecugu ba omuon o nde?

²⁶ Ŋaa aka be leka buna sa kalogo ke kiege ŋi, be mema le baraga biibi ba esiili?

²⁷ Lekese kaasa fula le eti, lo le kajanja ŋi, lo leka cua amfa ŋi. Ee! Mi elyele be, se mfumu a kasi Salomon nca lekuma le nde le so, kibuna kalaaza mva fula lia ŋi.

²⁸ Aka lubu Njyami alaaza elie ba eli nca suaga eli mbari ba acuna ka mbaa, nde akabuna sa bwa ma be ŋi? Be ba le kaami tari ba.

²⁹ Lebiza kabaraga ma biila baaja be ŋa ba a be.

³⁰ Ŋaa ba baasaga biibi bya njwori, baari ba akini yalaga Njyami ŋi. Njyami wo Taara be yayi ndi be ŋa kaama.

³¹ Ŋaa biibi baasaga be ncomi ba jii Njyami wo Mfumu a be, ŋa beesiili baampa be jo ngula ŋaa.»

Kabaga keeve kampila Njyami

³² «Be baari a mi, lebiza bwogo kamono. Ŋaa Njyami wo Taara be, ma akana kampa be omfumu o nde.

³³ Letege biibi beeli ŋa be, ŋaa lempa afuga ampara maa. Ma bwa be lekuzuga kabaga ka kebiza bia. Kabaga ka kebiza wa kampila Njyami, eli osara kibuna ciila ŋi, se ncieri kibuna kaja ŋi.»

³⁴ Kabila biri eli kabaga ka we, biri ye elege we akeyi keyi.

Zezi ndi: Leka lagi lagi

³⁵ Zezi avura lyele ndi: «Lekura endunga e be, ŋa lebiza kadisa amunda a be,

³⁶ mva ajanji eli ba ajila mfumu a bo, kaka wa kiza le baala, ma buni nde kaya waa, nde kaberege njo, bo anaani.

³⁷ Kase kali ŋa ayiga eli mfumu kaya atanaŋa bo ma mogo. Sisiele, mi elyele be ni, nde se akura endunga, nde kalege bo kambisa, ma kampa bo biila.»

³⁸ Kase kali ŋa ajanji eli mfumu kaya ka otuma mpiibi sikali ka akwogo ancuzu, nde taniŋi bo ma mogo.

³⁹ «Leyuga taataa, aka nga njo kiigi yayi tari leya osara, nke nde kyeli njo nde, ma buni osara kimabula njo nde ŋi.

⁴⁰ Be se leka lagi lagi, kabila Mwana Mbwuru aya ma tari eli be le kayaa ŋi.»

Onkiele biibi otele bila ambalaga

⁴¹ Ŋaa Pyere ŋa nde ndi: «Mfumu, ngana ye ata we yia ma bizi a otu sikali ma bizi aso?»

⁴² Ŋaa Zezi kaali ŋa nde ndi: «Ojanji wo tele bila ambalaga kanca be wooli mfumu ampa nde omfumu ma kakyele njo nde, ŋaa ntini eto, nde mpi abuga biila na?

⁴³ Kase kali ŋa oyiga wua, eli mfumu kaya moni nde maasa janja le nde.

⁴⁴ Sisiele mi elyele be ni, ojanji wua eli mfumu ampa nde kakiele biibi e nde eso.

⁴⁵ Ŋaa aka oyiga wua yiga abaana kalyele ndi: Mfumu a mi akayavuruga parabu ŋa ŋi, ŋa nde yiga abere ajanji ba abalaga bila ba akaazi, ŋaa eli nde yiga ma kaja, ma kanyua, tii nde yiga akolo mali,

⁴⁶ ŋaa mfumu a oyiga wua kaya ma cugu ŋa tari eli nde kiyaa ŋi, esisi baasisa mfumu nde be ka beenini, ŋaa mfumu asisa ojanji wua mva ajanji baali katele ŋi.

⁴⁷ «Aka oyiga maaya maami ma jii mfumu, nde kabiza sa maami ma lemigi lejii mfumu, esisi ba baasisa nde be ka beenini.

⁴⁸ Ŋaa ma ojanji wo bira yaa maami ma jii mfumu, ŋaa e nde esi ococa, esisi baasisa mfumu nde be ka nceti. Baapiza kuna ŋa mbuuru wo aŋi kuna, ŋa mbuuru wo aselegi mpa kuna, baaselege piza nde kuna.»

Antini ampasi maaya

⁴⁹ Zezi avura lyele ndi: «Mi ya lege mbaa yila ncie, ŋaa mi esaga ni nke amimana lasa yo.

⁵⁰ Mi enyunuŋa nca mpasi mva lemigi lenyunuŋa mbuuru kanca anja ma kayaga ateemi. Ŋaa mi yiga esaga ni ntini ye mpasi yia emito.

⁵¹ Be le cimiŋa ni, mi ya mpa kadusu kayila ncie? Kali, mi elyele be ni, mi ya ma kabaya.

⁵² Kalemi baana lubu ŋa, yiga ataani kanca njo mon ba acalaga, atari baabele bwele, ŋaa bwele baabele atari.

⁵³ Taara kabere mwana wo balaga, ŋaa mwana kabere taara, nguugu kabere mwana wo okaazi, ŋa mwana kabere nguugu. Oko wo okaazi kabere okari a mwana, ŋaa okari a mwana kabere oko wo okaazi.»

Ave be leyaa eliimi e Njyami

⁵⁴ Zezi vuri dugi ŋa lembuuru ndi: «Be lemono kacui keya ma kacu kava tari, be ni: Mvula lubu anogo, ŋaa mvula se nogi.

⁵⁵ Ŋaa be lemono pyebi lewa ma kwogo ka kalumu, be ni: Nyusu ye ya, ŋa nyusu eyi.

⁵⁶ Kura le be! Okorogo be ŋa oyeri ba kayaa eliimi e ncie bila e yulu. Ŋaa be meema lebiza ya ntini yi?»

Selege amaami bila buga le we lengulu

⁵⁷ «Ŋaa be meema lebiza kayaa ma be-ankulu maami ma tele?

⁵⁸ Aka we ŋa jaa bila buga le we le ngulu, ave kaaje be ma njila mpila nkani, be lebagi ancwo. Ncanke nde biri we ka miizi ma apami. Ŋaa apami ampi we ŋa aworo, ŋaa aworo alegi we ma ongeneŋe.

⁵⁹ Mi elyele we ni, we aka buna cwuga ma ongeneŋe, eli we kini mana kawura kabiimi ka we ŋi.»