Luke 1 - Tege Kiwoyeti (teg) NT Portions

Luke alyele kabila bila lemigi le eteende nde buku li

¹ Ee mbuuru a mi Tofile, bege le baari asi mpari ma kateende maami a Zezi ma ayiri ka mpanaŋi a bizi.

² Bo ateendi maami ma lemigi le ba amoni ebaani e mon, ŋaa bo ka anaani bizi. Ba amoni baa yiga amfumu ba baampa mbari a Njyami.

³ Mi se mana ya lemigi le kacia ka maami ma kaabani mon, lekani mi kateende maami maa se, ŋa mi si bwa ma we wooli mbuuru a mi Tofile .

⁴ Mi si bwa, ma buni we yaa ni eyizigi ba ayizigi we ba siele.

Njyami mi tuma ntuma nde o yulu mpila Zakari

⁵ Ma ntini ye Erode mfumu wo bungu le Zide, kiigi ŋa ompi ambwoŋi, nkuumu Zakari. Nde kiigi nca oju wo ba Abia. Okari a nde nkuumu kiigi Elizabete, mpabigi Aron.

⁶ Bo aso abwele kiigi tele ka miizi a Njyami ŋaa bo ba ka nyima angiri bila ekele e Mfumu eso, akimono se jaa leebi ma bo ŋi.

⁷ Ŋaa bo kiigi baana onyaŋa, kabila Elizabete kiigi kankuma, ŋaa bo abwele kiigi ekubu.

⁸ Cugu le oju o Zakari kato ma kampa ambwoŋi kanca Njo Njyami, ŋaa nde nyuniŋi ma kasa janja.

⁹ Aswoli Zakari ma lemigi le baana sa baari ba baampa ambwoŋi kanca njo Mfumu. Nde nyuniŋi nca otuma njo ma kacuga amuomi.

¹⁰ Kuna le baari kiigi le li kajii ma ntini ye akiigi cuga amwomi kayila mbisa.

¹¹ Parabu ntuma omon a yulu o Mfumu oyi mpila Zakari, oki ma otele ma kwogo ka kalumu ka mpaani a mbisa.

¹² Zakari kamono nde, bwogo boonini osi nde, ŋaa nde ancagi ayeni swaga.

¹³ Ŋaa ntuma a yulu ŋa nde ndi: «Ndaga bwogo ka mono, kabila Njyami mi yalaga obwoni a we. Okari a we Elizabete akula we mwana wo balaga, ŋaa nkuumu ye ampa we nde Zan.

¹⁴ We aje kamono kase bila ove ma mwana wua, ŋaa bege le baari leeka nca kase keenini ma ntini ye ba akula nde.

¹⁵ Okorogo nde aka mbuuru woonini ka miizi a Mfumu. Nde aka nyua mali amburu a vinye, se mali akima ankaala ŋi. Ŋaa mpari Oduduma Santi ye je kasuruga yila nde, keeli nde kini nca muon ngwugu a nde.

¹⁶ Nde aya vuruga bila bege le baana ba Ezerayele mpila Mfumu wo Njyami a bo.

¹⁷ Ŋaa nde aje kavuzu o Mfumu, bila oduduma ŋa mpari a Eli. Ŋaa nde aya vuzuga ataara bila baana, nde akaala etuma e baari angaa kamba, eka tele. Nde aselege etuma e baari ma eyi e Mfumu.»

¹⁸ Zakari ŋa ntuma a yulu ndi: «Mi bunu eya mini siele? Kabila mi mi nkubuga, ŋaa okari a mi yiga ngaa mbuuru.»

¹⁹ Ntuma a yulu ŋa nde ndi: «Mi Ngabiriyele, mi ndi kavuzu o Njyami ma kasa janja. Mi atuma ma kalyele bila we, ma kampa we ncia yeemve,

²⁰ ŋaa we kiyalaga maami ami me dugi we ŋi. Ŋaa ntini eto we amono maami maa, ma bwa we akiriga nkina we aka ma buna kalyele ŋi, tii ntini ye mono we maami maa.»

Baari ba kajila Zakari

²¹ Ntini ye kiigi Zakari nca Njo Njyami, baari ba akiigi jila nde ka jii akimi le bigi lesi nde.

²² Ntini ye cwugi Zakari, nde kiigi yiga kibuna kalyele ŋi, nde kasa bo anjiimi ma eliemi, yia biri ye yayi bo ndi Njyami mi mvyere Zakari kalogo nca njo nde.

Elisabete yiga ŋa yimi

²³ Zakari kamana ecugu e nde e janja kanca Njo Njyami, nde vurigi njo nde.

²⁴ Amana ntini mon, okari a nde Elizabete biri yimi, nde yizigi njuru tii angondo ataani, nde alyele ndi:

²⁵ «Mono ove ba si Mfumu mi, nde mi cieze mi kabila kaka kiigi mpa mi okuru ka miizi a baari.»

Esizigi ba kakula ka Zezi

²⁶ Elisabete kato angondo asiami, Njyami tumi ntuma nde Ngabiriyele nca kangundu kamon ka Ngalile ka acwoli ma Nazarete,

²⁷ mpila ocuuma we okaazi wo kini yaa abalaga ŋi, wo nkuumu Mariya. Ocuuma wua kiigi ama mana mpa nde ma baala ka mpila balaga le nkuumu Zizefu, mpabigi ye Mfumu wo nkuumu Davide.

²⁸ Ntuma Njyami o yulu yeni nca njo mpila mwana okaazi wua, ŋa nde ndi: «Mi ebiga we, ma we eli Mfumu ma ampa puga.»

²⁹ Ntuma kamana biga Mariya ekoli nde, ŋa nde cimiŋi kanca otuma nde ndi: «Yia sila obigi ma?»

³⁰ Ntuma a yulu ŋa nde ndi: «Ndaga kabaraga Mariya! Okorogo we mi baga puga ka miizi a Njyami.

³¹ Ŋaa mono, we aje ka baga yimi, we akula mwana wo balaga, ŋaa we ampa nde nkuumu ye Zezi.

³² Nde aka mbuuru woonini, ŋaa ba cwolo nde ma Mwana Njyami onkara yulu. Njyami wo Mfumu ampa nde onkani ba nkaaga nde Davide.

³³ Nde aka Mfumu wo obu-obu kayila njo Zakobe, ŋaa omfumu o nde bo kawa ŋi.»

³⁴ Mariya ŋa ntuma a yulu ndi: «Ŋaa mi yimi lia bunu le ya, mi ti nkini yaa abalaga ŋi?»

³⁵ Ntuma a yulu akaala ŋa nde ndi: «Oduduma Santi aya yila we, ŋaa mpari a Njyami ye ya yila we, yo ye wuga we mva kayiini. Ma buni mwana wo ba akula aka cece, ba acwolo nde ma Mwana Njyami.

³⁶ Ŋaa mono, Elizabete wo mbuuru a ankwono we, mi bira yimi kayila okubu, ŋaa mwana balaga. Nde we acwoli ma kankuma, yiga angondo asiami.

³⁷ Okorogo, jaa ye akwono Njyami onyaŋa.»

³⁸ Mariya ndi: «Mi ojanji a we Mfumu, ŋaa sa maami ma lemigi le dugi we.» Ŋaa ntuma a yulu vurigi.

Mariya yeni mono Elisabete

³⁹ Kanca ecugu jo ankulu bia, Mariya cyegi Nazarete yeni ŋa asisari ma kacu ka angaala, nca bungu le Zide.

⁴⁰ Ntini ye toyi nde nca njo Zakari nde bigi Elizabete.

⁴¹ Ŋa eyugi ba Elizabete obigi wo Mariya, mwana wooli ma muon nde, nyigi, mpari Oduduma Santi eyi yila nde.

⁴² Nde wobi nkeri nkeri ndi: «Njyami ma ampa we ovuma kabila we vuli akaazi aso, ŋaa nde se mi mpa mwana wooli ma muon we puga.

⁴³ Mi na, eli ngwugu a Mfumu mi ya mono mi?

⁴⁴ Ŋaa mono, parabu kabigi we mi ŋa, ŋaa eto acu a mi mwana wooli ma muon mi, nyigi.

⁴⁵ We li nca ovuma, we oyaligi maami ma adugi Mfumu we, mon ma aje kaya.»

Luumu le Mariya

⁴⁶ Ŋaa Mariya ndi: «Mi ekusa Mfumu ma onini o nde.

⁴⁷ Mi esuere ma Njyami wo vuzuga mi.

⁴⁸ Nde ma kese mi bila nya, mi wo ojanji nde, mbuuru wo oca, ŋaa mono yiga eca eso be lyele ndi mi ŋa sala.

⁴⁹ Kabila Njyami a mpari mi sa mi maami maave, nkuumu a nde cece.

⁵⁰ Ŋaa nkene nde eli kayila eca ŋa eca, kayila ba ba nyiima nde.

⁵¹ Ma mpari a nde, nde maasa maami maanini, nde ma cala baali nca etuma ebo ŋa ecimiŋi ba kamba.

⁵² Nde mi kaala angaa mpari kayila ambara a bo, ŋaa nde mi kusa baa abaaka nca mpasi.

⁵³ Nde mi mpa baa abaaka ŋa njala, biibi beeve ekukuna, ŋaa nde mi cuta angaa kabaga jiala onyaŋa.

⁵⁴ Nde mi vuzuga Ezerayele, ajanji a nde, ŋaa nde mi baraga ndagi a nde ye kasi bo, ŋaa nde mi sa bo jaa leeve.

⁵⁵ Ma lemigi le lyeli nde ŋa ankaaga a bizi a be, ma Abarayame bila ampabigi a nde obu-obu.»

⁵⁶ Mariya si nkali angondo atari bila Elisabete, amana nde vurugi mpila nde.

Ekuli e Zan Batise

⁵⁷ Ntini ye ekula Elizabete eto, ŋaa nde kuli mwana wo balaga.

⁵⁸ Abuga ba kiigi ka mpaani a nde bila nkuono nde ayugi ndi Mfumu kiigi ma mono nde nkene, ŋaa bo aswori bila nde.

⁵⁹ Cugu le ompwomon bo akeri mwana ŋaa bo asagi mpa mwana nkuumu a taara nde Zakari.

⁶⁰ Ŋaa ngwugu a nde yagi mbari, ŋaa nde ndi: «Kali, acwolo nde ma Zan.»

⁶¹ Bo ŋa nde ndi: «Okorogo se mbuuru omon nca ankwono we, ngaa nkuumu yia kali.»

⁶² Ŋaa bo asi taara anjiimi ma kaya osumbu wo ba acwolo nde.

⁶³ Zakari laayi kampaja ma kateende ndi: «Nkuumu a nde Zan.» Iiin! Ŋaa ekoli baari aso.

⁶⁴ Kancinci ŋa, Zakari jui leyi vuruga, nde baani ka seme Njyami nkeri nkeri.

⁶⁵ Baari aso ba tiniŋa lia a moni kamaŋi, ŋa ba ka lyele ma maami maa nca angaala a Zide aso.

⁶⁶ Aso ba akiigi yuga maami maa akieli mon nca etuma e bo, ŋaa yiga ba alyele ndi: «Mwana wua bunu kaje kaka? Ee, jaajaa Mfumu li bila nde.»

Luumu le Zakari

⁶⁷ Ŋaa Oduduma Santi mpi taara mwana mpari. Nde kalyele maami ma kiigi lyele oduduma nde.

⁶⁸ Ndi: «Lekuma leka ŋa Mfumu, Njyami a Ezerayele, ma lemigi leyi kese nde baari a nde bila leyi vuzuga nde bo.

⁶⁹ Ŋaa nde mi tuma bizi a be ovuzigi woonini kanca njo Davide wo mfumu, wo osali a nde.

⁷⁰ Mva lemigi le elyeli nde ŋa antuma a nde ayiele ma ntini ye kala, ndi,

⁷¹ Wo aya vuzuga bizi a be kanca alogi bila kacieze le bizi a be nca jiala e baa ma abele bizi a be!»

⁷² Ŋaa ma bwa nde mvyeri nkene nde ma ankaaga a bizi a be, ŋaa nde kini abaraga ndagi a nde e yiele ye kasi ma bo.

⁷³ Mva okezi wo labi Njyami kayila nkaaga a bizi a be Abarayame ma ondigi o bo.

⁷⁴ Nde legi ndagi ndi nde avuzuga bizi a be nca jiala ba alogi, ma buni bizi a be lesa janja le nde, ŋaa lebiza bwogo kamono.

⁷⁵ Ma kaka tele bila onyimi ka miizi a Njyami ecugu eso ba omwon o bizi a be.

⁷⁶ Zakari vuri dugi ndi: «Ŋaa we wo mwana mi, ba acwolo we ma ntuma onkara yulu. Kabila we aje kaka kavuzu o Mfumu ma kaselege etuma e baari ba baajila nde.

⁷⁷ Mono maami ma alyele we ŋa baari a nde, ma buni bo ayaa ndi Njyami avuzuga bo, ŋaa nde abologo maami maabi a bo.

⁷⁸ Njyami a bizi a be ŋa nkene yeenini bila kadusu, nde alege kawaa ka yulu kayila bizi a be, mva ka kyeme muyi wo enciere.

⁷⁹ Ŋaa kawaa koankulu kia ke ekyeme kayila baali nca lempiibi, bila baali ŋa bwogo ba leku, ma kabira bizi a be nca njila ye kadusu.»

⁸⁰ Ŋi Zan kayele, ŋaa nde kawama tii nca ecimiŋi e nde, ŋaa nde yiga nde otu nca biri eli baari kali, tii cugu le baani nde kampa mbari a Njyami kanca Ezerayele.