Esima 9 - Tege Kiwoyeti (teg) NT Portions

Mfumu Zezi acwolo Soole

¹ Ma ntini yoankulu yia, Soole kiigi aselege ŋaana alwoni a Mfumu ndi nde kabuma bo. Nde yeni kamono mfumu wo ompi ambwoŋi woonini.

² Ŋa nde pizi nde esangumu ma kanyunuŋa nca ekuga eso e Damase, ma buni nde kiigi kamono baari, abalaga sikali akaazi baba alwono Njila Mfumu, nde yiga ka kuara bo ŋa nde kabira bo Zerizaleme.

³ Nde kiigi ma njila Damase ŋa nde kasa mini kaciina mpaana kangundu kia, ŋaa kancinci ŋa, kafii kafi yulu ka kiemi ŋa kajeniŋi nde.

⁴ Nde vi ma ncie, ŋa yugi jui lemon lelyele ŋa nde ndi: «Soole, Soole, we meema ampa mi mpasi?»

⁵ Nde pizi: «We na Mfumu?» Ŋaa jui le yalagi ndi: «Mi Zezi, wo ampa we mpasi.

⁶ Ŋaa temeŋe, nyunuŋa nca kangundu, ŋa kaŋaa alyele we lemigi lesa we.»

⁷ Abuga ba akiigi je opinga bila Soole asugi bo aki buna se ojugu omon kalege ŋi. Bo ayugi jui, okorogo bo aki mono se mbuuru ŋi.

⁸ Soole saragi ma ncie, ŋa nde naani miizi, ŋaa nde kiigi kibuna mono ni. Akuari nde ma kwogo ma kaje bila nde Damase.

⁹ Nde si ecugu etari, eli nde kibuna mono ni, nde ki ja ŋi nde se ki nyua ŋi.

¹⁰ Mono nca kangundu ka Damase kiigi ŋa oluoni omon we acwoli ma Ananyase. Mfumu oyi mpila nde ma lworo ŋa nde ŋa nde ndi: «Ananyase!» Nde yaligi ndi: «Mfumu, mi e wu.»

¹¹ Mfumu ŋa nde ndi: «Temeŋe va ma njila ye baacwolo ma Kuogo ka kalumu, nyunuŋa nca njo Zida, piza osi Tarese wo baacwolo ma Soole. Ka alyele bizi a we ŋaa nde li ma kabwono,

¹² ŋa nde moni ma lworo balaga le baacwolo ma Ananyase, nyuniŋi ŋa nde legi njiala kayila nde ma buni nde kavura mono.»

¹³ Ananyase yaligi ndi: «Mfumu, mi maayuga bege le baari ba alyele ma maami maabi abalaga li makasi ma alwoni a we baali ka Zerizaleme.

¹⁴ Ŋa nde maaya kunu bila onkani ba ampa amfumu baba ampa ambwoŋi ma ka kuara baari aso ba baacwolo nkuumu a we.»

¹⁵ Ŋaa Mfumu ŋa nde ndi: «Je, kabila mi ma aswolo balaga lia ma kasa janja le mi, ma buni baari aya nkuumu a mi ma esi beemon bila amfumu a bo, ŋa asi Ezerayele.

¹⁶ Mi ankulu emvyere nde mpasi eso yeemono nde ma mi.»

¹⁷ Ananyase yeni, nde nyunuŋi nca njo, legi jiala kayila Soole, nde ŋaa nde ndi: «Soole, dumu a mi, Mfumu Zezi wo ocwugi mpila we kayila njila ye eba yira we, ma atuma mi ma buni we miizi anaaŋa ŋa Oduduma Santi kalwula we.»

¹⁸ Ma ntini yoankulu yia, biibi mva mpezi ecyegi ma miizi a Soole ŋa nde vuru moni. Ŋa nde sarigi, ŋa yagi ateemi.

¹⁹ Kamana ja, ŋa nde vuru bagi mpari. Ecugu eke Soole ki bila alwoni baakiigi ka Damase.

Soole ampa mbari a Njyami ka Damase

²⁰ Kancinci ŋaa nde yiga alyele nca ekuga ndi Zezi Mwana Njyami.

²¹ Aso baakiigi yuzuga nde ekoli bo, ŋa bo yiga ba apiza ndi: «Ka bwa ŋi balaga li lekiigi ka Zerizaleme ma kampa mpasi yeenini ma baakiigi cwolo nkuumu a Zezi ŋi? Nde ya kunu kama ka kuara ŋa ma kabira bo mpila amfumu ba ampi ambwoŋi ŋi?»

²² Ŋaa Soole seligi yeli ma lila, aZife baakiigi ka Damase asagi jaa le kalyele akwoni, ntini ye kiigi mvyere nde bo ndi Zezi kamaka Masiya.

²³ Amana ntini mon aZife akuru ojugu ma ka buma Soole,

²⁴ ŋaa ayiezi nde ma kiimi le bo. Lempiimbi bila muyi baakiele edubugu ba kangundu, ma buni bo abuma nde.

²⁵ Ŋaa lempiimbi lemon, alwoni a Soole ba bira nde ngula kabaga ka kangundu, bo asi nde kasuruga nca lengulu.

Soole ka Zerizaleme

²⁶ Ato Zerizaleme, Soole oyeligi ma kaje baga alwoni a nde, ŋaa aso kiigi ŋa bwogo, kabila bo akiyalaga ndi nde olwoni ŋi.

²⁷ Barenabase yagi nde oyeni bila nde mpila antuma. Nde dugi bo lemigi le Soole le kamoni Mfumu ma njila ŋa lemigi le awobi bila nde. Nde naani bo bila lila lemigi le Soole le ka mpi mbari ma nkuumu a Zezi ka Damase.

²⁸ Ma ntini yia Soole yiga bila bo, nde a je aya nca Zerizaleme bila nde kampa mbari bila tari ma nkuumu a Mfumu.

²⁹ Nde sunuŋi ŋa aZife ba jui le Greke ŋa nde kaasa lebila bila bo, ŋaa baakiigi ma mbia ye kabuma nde.

³⁰ Ntini ye adumu ka yugi, bo ayeni bila Soole Sezare, ŋa ka kwa bo asi nde kaje Tarese.

³¹ Ŋaa Okuga kiigi nca kadusu ŋa nca Zide eso, nca Ngalile bila Samari, nde kawama ŋa ki nca e yaligi ba onkani o Mfumu, nde wayi kangula Oduduma Santi.

Pyere salagi Ene

³² Pyere oki yira ma kasi kaso, cugu lemon nde yeni mpila ayaligi baakiigi ka Lyda.

³³ Kaŋaa, nde moni balaga lemon nkuumu Ene wo kiigi ma tolo kayila tari maasa esibi mpuomon, kabila nde kiigi kabuka.

³⁴ Pyere ŋa nde ndi: «Ene, Zezi Kristi mi salaga we! Temeŋe ŋa vuna tari a we.» Kancinci ŋaa Ene temiŋi.

³⁵ Baari aso a Lyda bila a ncege e Saro amoni nde ŋa ayaligi Mfumu.

Dorekase yi vuruga omuon

³⁶ Ka Zafa kiigi ŋa olwoni a Njyami omon wo okaazi nkuumu Tabita. Nkwumu yia ma jui le Greke ndi «Dorekase», ma kalyele ndi «seri». Nde kiigi kaselege janja ma kasa baari leve bila ma kayamaŋa afuga.

³⁷ Ma ntini yia, nde vi ngaayi ŋa nde kpi. Amana yogo kabiima ka nde, asuuzi nde nca katini kayulu a njo.

³⁸ Alwoni a Zafa kiigi ama ayuga ndi, Pyere kiigi ka Lyda, yeeli kapaana Zafa. Bo atumi nde abalaga bwele bila mbari yi: «Kolokolo we ya mpila bizi, ndaga kaliriga.»

³⁹ Pyere yeni bila bo, nde kato, abiri nde nca katini kakali kayila njo. Akuulu aso ayi mpaana nde ma kalili, bo ba kamvyere nde angoyi bila eringa ba elaa ba ekiigi ncua Tabita ntini ye kiigi nde kini mwon.

⁴⁰ Pyere cuzugi baari aso, ovi ma abwu ŋaa bwoni. Amana nde tali ma kacu ka kabiima, ŋa nde ndi: «Tabita saraga!» Nde naani miizi ŋa nde kamono Pyere, nde ki manci.

⁴¹ Pyere yagi kwogo ka nde ŋa nde siligi nde. Amana nde cwoli ayaligi bila akwulu, ŋa nde mvyeri bo nde muon.

⁴² Kangundu kaso ka Zafa kayugi ncia yia ŋa bege ayaligi Mfumu.

⁴³ Pyere bigi ka Zafa, mpila balaga lemon nkuumu Simon ojanji omon wo ebaana ba anyama.