Esima 7 - Tege Kiwoyeti (teg) NT Portions

Ewobi ba Etyene

¹ Ompi ambwoŋi woonini pizi Etyene ndi: «Ma ma alyele ma we ma jaajaa?»

² Nde kaali ndi: «Andumu ŋa ataara, leyuga mi! Njyami wo lekuma ma mvyere njuru ma taara bizi a be Abarayame, ntini ye ekiigi nde ka Mezopotami, eli nde kiigi kini ka ka Arane ŋi,

³ ŋaa nde ŋa nde ndi: “Ciege kasi ka we bila njo we, ŋaa we je kasi ke mi ka emvyere we.”

⁴ Ŋaa Abarayame cyegi kasi ka Caledeye, ŋaa nde yiga ki ka Arane. Kaŋaa, amana leku le taara nde Njyami si nde kayira nca kasi kaali be ki.

⁵ Njyami ki mpa se nde kabaga nca kasi kia ŋi, se biri ye kalege kwulu kali. Ŋaa nde mpi nde ndagi ndi nde ampa Abarayame kasi, ŋaa yila ampabigi a nde ba ba aya kayila nde, se ma ntini ye kiigi nde kini kula ŋi.

⁶ Njyami wobi bua: “Andaala a we baaje kaka nca kasi kakima, ba aswuza bo aka ma oyiga ŋaa bo baaje kampa bo mpasi ankama ba esibi ena (400).

⁷ Ŋaa mi epama baari ba baasa bo ayiga.” Njyami dugi ndi: “Amana bwa, bo ba aje ka cwuga, ŋaa bo ba aje kabwono mi nca biri yia ŋaa.”»

⁸ Ŋaa Njyami kuri bila ŋa Abarayame obuga eli ncazi kamaka kaliimi. Ŋaa bwa Abarayame ka ma kula Izake, nde keri nde cugu le ompuomon, Izake kuli ŋaa nde keri Zakobe, ŋaa Zakobe keri ankaaga ba kuumu ŋa bwele.

⁹ Ankaaga kiigi ŋa mfunuŋa muon ma Zizefu, bo ategi nde ma kaje bila nde Ezipite. Ŋaa Njyami kiigi li bila nde,

¹⁰ ŋaa nde ciezi nde nca ampasi, nde mpi nde ncimi bila sala ka ovuzu o Farawon, mfumu a Ezipite, olegi nde ma mbara ye onkunji wo Ezipite ŋa wo njo nde eso.

¹¹ Njala yeenini eyi nca kasi kaso ka Ezipite, ŋa nca kasi ka Kanaan, mpasi kiigi yeenini ŋaa annkaaga a bizi a be aki baga se kalogo ka kaja ŋi.

¹² Zakobe yugi ndi kiigi ŋa mburu ka Ezipite, ŋaa nde baani tumi ankaaga a bizi a be ma jaa ecomi.

¹³ Ma nja ya oyuele Zizefu mvyeri andumu a nde njuru, yia biri ye yayi Farawon kacia ka Zizefu.

¹⁴ Ŋaa Zizefu tumi kayaga taara nde Zakobe bila njo nde eso, bo kiigi ekwumu e baari ncaami ŋa baari ataani.

¹⁵ Zakobe surugi Ezipite, kabiri ye kpi nde, ŋaa annkaaga a bizi a be se.

¹⁶ Ŋaa biri bo Siceme, ŋaa ajigi bo nca ancwo ma Abarayame ma kaswumi bila baana ba Amore ka Siceme.

¹⁷ Ntini yiga tuga ye elegi Njyami Abarayame ndagi. Lembuuru le bizi a be le seligi waayi ka Ezipite.

¹⁸ Tii keeyi mfumu okima eli kimono Zizefu ŋi.

¹⁹ Mfumu wua kuri baari a bizi a be, ŋaa tasi annkaaga a bizi a be, tii ntini ye tumi nde bo ma kanyina baana a bo ba abuzu ma buni bo akpa.

²⁰ Ma ntini yia akuli Moyize; eli ka miizi a Njyami ŋa owali. Asi ovaligi o nde tii angondo atari nca njo taara a nde.

²¹ Ŋaa ma bua se nguugu a nde bila taara yiga anyini nde boo, mwana Farawon wo okaazi yagi nde ma kakiele, ŋaa okwuzi nde mva mwana wo ma le kula.

²² Akwusi Moyize nca ncimi ye baari ba Ezipite aso, ŋaa nde kiigi ŋa otori nca maami a nde ma kiigi lyele bila ma kiigi sa nde.

²³ Ŋaa ntini ye bagi nde ekuumu ba esibi ena, nde kuri ojugu ma kaje mono andumu a nde, ba Ezerayele.

²⁴ Moyize ka ma tanaŋa ba abere osi Ezerayele omon lwuba, nde sunuŋi bila wo kiigi bere buga wua, nde yiri ngula wo ampi mpasi, ŋaa nde bumi osi Ezipite.

²⁵ Nde kiigi kamono ndi adumu a nde ba Ezerayele ba ayuga ndi Njyami mbuuru wo tuma Moyize ma kayamaŋa bo. Ŋaa bo aki yuga nde ŋi.

²⁶ Anyuzuga, Moyize moni baari ba Ezerayele bwele ba ajuana, nde yi mva ka kari a bo, ma kasaga vuta bo odigi. Nde ŋaa bo ndi: «Be tii be ŋa be, be jaa le lempa abuga mpasi lema?»

²⁷ Ŋaa wo kiigi bere buga ciniŋi Moyize ndi: «Wo mpa we omfumu bila onkani kayila bizi na?

²⁸ Wo we asaga buma mi mva ka bumi we osi Ezipite aciga?»

²⁹ Moyize kayuga bwa odumi kasi ka Mandia; ka kwa nde bagi baana bwele ba abalaga.

³⁰ Ekwumu ba esibi ena eyira, nca ncege mpaana kakuri ka Sinayi, ntuma yulu omon ocwugi ŋa Moyize nca ajajaga ma awuuma mbaa.

³¹ Moyize kamono bwa, ekoli nde ma ecuugi e maami maa. Ŋaa nde seligi ciina ma kamono taata, ŋaa nde yugi jui le Mfumu ŋa nde ndi:

³² «Mi Njyami Ataara a we, Njyami Abarayame, Izake bila Zakobe.» Ŋaa Moyize aterege, yiga ki kese se kua ŋi.

³³ Mfumu ŋa nde ndi: «Cieze akorogo a we ma ntaami, kabila biri yeeli we yi, biri ye cece.

³⁴ Mi ma amono mpasi ye baari baali ka Ezipite, mi maayuga ejuuya e bo, ŋaa mi mi suruga ma kacieze bo ma nya. Ŋaa yiga je, mi etuma we Ezipite.»

³⁵ Moyize wua wo bo wo abizi ndi: «Wo mpa we omfumu bila onkani na?» Kamaka nde wo Njyami wo katumi ma omfumu ŋa ovuzigi bila ntuma a yulu eli nde cuugi nca ajagajaga.

³⁶ Nde mbuuru wo ocuzigi bo ka Ezipite, nde si maami ma osizi bila eliimi eluari ka kasi ka Ezipite, kanca lemere le anja Abaa bila ŋa nca ncege, enkuumu ba esibi ena.

³⁷ Moyize wua wo dugi ŋa baana ba Ezerayele ndi: «Njyami aje katuma nca andumu a be ntuma Njyami mva mi.»

³⁸ Ŋaa baari avunuŋa kanca ncege, evuri ki nde yo kiigi ka mpanaŋa ankaaga a bizi a be ŋa ntuma-yulu yo kiigi lyele bila nde ka kakuri ka Sinayi. Ma Njyami bo abagi mbari ye omuon ma ka mpa bizi.

³⁹ Taara a bizi a be aki jya nde kanyima ŋi, bo abizi nde, ŋaa etuma ebo evurigi Ezipite.

⁴⁰ Bo ŋa Aron ndi: «Paga bizi eduduma ba beeje ka ovuzu o bizi, kabila Moyize wo oya bira bizi ka Ezipite wu, leki maya lemigi lemi sa nde ŋi.»

⁴¹ Ŋaa ma ecugu bia bo awangi mwana ngoombi. Bo ampi kaduduma kia ambwoŋi. Ŋaa bo yiga ba aswere ma kalogo kawangi bo ma njyala e bo mankulu.

⁴² Ŋaa mono Njyami kaka bele bo, ma bo baakiigi bwono anyari, mva lemigi le ateende nca buku le antuma Njyami ndi: «Ma ekwumu ba esibi ena nca ncege, be baari a Ezerayele, ma mi be lempi anyama bila ambwoŋi?

⁴³ Kali! Be lemaaya bila omangi a njyami Moloke ŋa nyari a njyami a be Rayifane, eduduma ba esa be ma kabwono jo! Ŋaa mi se ebira be ngula Babilone.»

⁴⁴ Nca ncege, annkaaga a bizi a be kiigi ŋa omangi wo kiigi mvyere ndi Njyami li bila bo. Ŋaa Njyami kiigi tumi Moyize ma kacwa yo mva ka emwozi nde.

⁴⁵ Amana bwa, baana ba annkaaga a bizi a be abagi omangi ma ye bo ntini. Ke kiigi Zozue mfumu a bo, bo abiri omangi ma kasi ke yagi bo ma baari eli Njyami curi ka miizi a bo. Ŋaa yiga omangi ki kaŋaa tii ntini ye Davide.

⁴⁶ Davide bagi sala ka miizi a Njyami, ŋaa nde pizi nde aka nde abuna piza biri eli andaala a Zakobe ba abuna kabwono Njyami.

⁴⁷ Ŋaa yiga Salomon mbuuru wo cui Njyami njo.

⁴⁸ Ŋaa Njyami wo nkara yulu akaka kanca anjo ma acua njiala e baari ŋi, mva lemigi le alyele ntuma Njyami:

⁴⁹ «Mfumu dugi ndi: Yulu mbara mi, ŋaa ncie biri ye eswuza mi ntaami. Be njo ye le ecwa mi yini? Sikali biri ye wuuma mi yini?

⁵⁰ Mi ka mbuuru wo wanga biibi eso ŋi?»

⁵¹ «Ee baari baali angaa etuma ononon bila ba aduba acu! Be kiigi lebiza maami ma Oduduma Santi. Be se mva annkaaga a be!

⁵² Wua ntuma Njyami wunu wo annkaaga a be kabizi kaweele? Bo abumi baasa lyele ma eyi ba mbuuru a Tele, eli yiga be le mi kaba, ŋaa eli be kiigi yiga ambumi a baari.

⁵³ Be ba le yaligi angiri ma lemigi le elegi antuma a yulu, ŋaa ba abizi ka kyele.»

Leku le Etyene

⁵⁴ Oju wo amfumu kama yuga mbari yia, bo abiri nkeri eli yiga ba aja mii ma Etyene.

⁵⁵ Ŋaa Etyene, Oduduma Santi kiigi ma alwula nca nde, ŋaa nde tali kalii kayulu pii, nde moni lekuma le Njyami, ŋaa Zezi li ma otele ka kwogo ka Njyami ka kalumu.

⁵⁶ Ŋaa nde ndi: «Mono, mi emono yulu oma anaaŋa, ŋaa Mwana Mbuuru oli ma otele ka kwogo ka Njyami ka kalumu!»

⁵⁷ Ŋaa bo adubi acu, yiga baata nya, ŋaa bo aso akumi yila nde.

⁵⁸ Bo abiri nde ngula kangundu, ŋaa bo yiga atobi nde akele. Atemi aswuzi amfa a bo ka ncina mwana balaga nkuumu Soole.

⁵⁹ Ŋaa bo kiigi ba abuma Etyene ma akele, nde abwono ndi: «Mfumu Zezi, yaga oduduma mi.»

⁶⁰ Ŋaa ka mva ma abuu, nde ti osarigi nkeri nkeri ndi: «Mfumu, wo bizi bo mberi kampa ma jaa leebi lia!» Nde kamana lyele bwa, nde kpi.