Esima 6 - Tege Kiwoyeti (teg) NT Portions

Aswoli abalaga ncaami ma kayamba antuma

¹ Ma ntini yia, ŋaa otali wo alwoni kawaa, ayaligi ba baalyele Greke aki yalaga ma kiigi sa arameye ŋi. Bo adugi ndi, cugu ŋa cugu, ntini ye kiigi kaba bo biila bo ba akalumuŋa akuuli a bo.

² Bo akuumu ŋa Bwele acwoli kuna le alwoni, ŋaa bo ndi: «Ove onyaŋa ma kanyura mbari a Njyami, ma kaje kayila ambisa ma biila ka kaba.

³ Ŋaa adumu a mi, yia biri eli be le swolo nca be baari ncaami, baali ŋa otemi woove, eli bo ama alwula ma Oduduma Santi bila ncimi, ŋaa eli bizi a be le suuza bo ma lia janja.

⁴ Ŋaa bizi, bizi lempa ntini ye bizi ma kabwono bila ma kampa mbari a Njyami.»

⁵ Ŋaa baari aso ba Okuga asiiŋi ojugu wua. Bo aswoli Etyene balaga leeli ma lwula ma lila bila Oduduma Santi, ŋa Filipe, ŋa Perokore, ŋa Nikanore, ŋa Timon, ŋa Paremenase bila Nikolase wo Antiyoce, ma ntini akala kiigi aki kula nde Zife ŋi , ŋaa mi kiriga Zife.

⁶ Bo amvyeri bo ma antuma, ŋaa alegi jiala yila ecu e bo ma kabwono.

⁷ Mbari a Njyami ye kaselege je levuzu ŋa levuzu, otali wo alwoni kaselege waa ka Zerizaleme, ŋaa bege le ampi ambwoŋi abagi onyiimi ma lila.

Akuari Etyene

⁸ Etyene bila puga leenini ŋa mpari kasa maami ma osizi bila eliimi eluari ka kara baari.

⁹ Ŋaa baari ba njo ye ba abwono ye acwoli ma «Njo ye ayiga ba apisi», bo kiigi ŋaa aZife ba Sirene, ŋa Alesandre ŋa Silisi bila ba bungu le Azi, avi ma otogi bila nde.

¹⁰ Ŋaa bo kiigi ba aka buna kasuga ncimi ewobi e nde ye kiigi mpa Oduduma a nde.

¹¹ Ŋaa bo acogi abalaga ma ayizigi ma kalyele ndi: «Bizi le maayuga nde alyele ambila maabi ma njuru a Moyize ŋa Njyami.»

¹² Bo alegi baari oncinciezi, ŋa akunji bila asikiribe. Ŋaa bo aciini kapaana Etyene ŋaa ayiniŋi nde, akuari nde ŋaa abiri mpila oju wo amfumu ba aZife.

¹³ Bo ayagi atemi ba oca, bo ndi: «Balaga li bu le selege lyele maami ma oca ma biri ye cece bila ngiri.

¹⁴ Kabila bizi lema yuga nde alyele ndi: “Kee Zezi wo Nazarete ki acala biri yi, ŋaa nde akaala maami akala maasi Moyize bizi a be.”»

¹⁵ Aso ba abaka manci nca katini ka njo ka oju wo amfumu ba aZife ama kese Etyene, ŋaa bo amoni ndi kalii ka nde kasi mva ka ntuma-yulu.