Esima 5 - Tege Kiwoyeti (teg) NT Portions

Ananyase bila Safira

¹ Ŋaa balaga lemon Ananyase, eli okari kiigi nkuumu Safira, tegi ngwunu.

² Nde kyeli kabari ka ampara ŋaa okari a nde kiigi yayi, nde kayaga ma asiili nde yeni mpa antuma.

³ Pyere ŋa nde ndi: «Ye Ananyase, Satan mi biiza wo otuma. Wo kura Oduduma Santi ŋaa wo ma akiele kabari ka ampara kabaga we ma ngwunu yia.

⁴ Ka ncomi eli wo kiigi kini tege yo ŋi, yo kiigi e we ŋaa wo mana tege yo ampara kiigi a we, kabwa ŋi? Ŋaa we bunu kana kasa yi sila jaa? Ŋaa we ka bizi wo kura ŋi, ŋaa Njyami!»

⁵ Ananyase kama yuga mbari yia, nde vi ŋaa kpi. Kamaŋi keenini kasi baari aso ba ayugi jaa lia.

⁶ Baana ba abalaga ayi kura kabiima ka nde nca mfa, bo abiri nde ŋaa ajiigi.

⁷ Esi atari atari amana, okari Ananyase nyuniŋi ŋaa nde kiigi kini yaa jaa ye eyiri ŋi.

⁸ Pyere pizi nde ndi: «Duga mi, be mvunu ye letege nguunu yi?» Ŋaa nde yaligi ndi: «Ee, mvunu yo yia.»

⁹ Ŋaa Pyere ŋa nde ndi: «Be bunu lekura ma kamiga Oduduma Mfumu? Mono baari ba ajiigi olumi a we a baali ka onyua njo ŋaa bo ba abira we se.»

¹⁰ Ma ntini yoankulu yia, vi ka miili ba antuma, ŋaa nde kpi. Baana ba abalaga anyunuŋi nca njo ŋaa amoni nde ma akpa, bo abiri nde ajiigi kapaana olumi a nde.

¹¹ Okuga oso bila baari aso ba ayugi jaa yia amoni bwogo boonini.

Antuma baasa bege le eliimi eluari

¹² Bege le eliimi eluari bila maami ma osizi ma kiigi yira kanca jiala ba antuma ka miizi a baari. Ayaligi aso a kiigi vunuŋa ka biri mon kanca olebe Salomon.

¹³ Ŋaa se mbuuru okima ki yelege kaciina mpaana bo ŋi. Ŋi baari ba kalyele maami maave ma bo.

¹⁴ Kuna le abalaga bila akaazi ba ayaligi Mfumu, otali a bo selegi waayi.

¹⁵ Ŋaa yiga ba kaya bila anga angayi nca ewombo, ŋaa ba kaya bila bo kayila ekuba bila baana ba atari ma buni ntini ye yira Pyere kayiini ka nde kadubi se mbuuru ŋa mbuuru nca bo ake.

¹⁶ Bege le baari le kawa ma ampugu a mpaani nca Zerizaleme, ba kaya bila angaa angaayi bila baari baali epundu beebi ema kolo, ŋaa aso awuumi.

Antuma ba akuari amana apisi bo

¹⁷ Okorogo mfumu ampi ambwoŋi bila aso ba akiigi bila nde, ba kalyele ndi, lengulu le aSadiseye, kiigi yiga etuma emi lwula ma mfunuŋa mwon ma antuma. Bo akani kasa.

¹⁸ Bo akuari antuma bo alegi bo ma ongeneŋe.

¹⁹ Ŋaa nca lempiibi, ntuma-Mfumu wo yulu naani edubugu ba ongeneŋe, cuzigi antuma ŋaa nde ŋa bo ndi:

²⁰ «Leje Njo Njyami ŋaa le naana baari maami aso ma omwon ba onyarigi.»

²¹ Antuma anyimi: ŋaa ka enciere ekpye, bo ayeni Njo Njyami ŋaa kiigi yiga ba ayiziga. Mfumu ompi ambwoŋi bila ba abaaka bila nde acwoli ankwuru ba aZife ma buni Oju wo amfumu ba aZife avunuŋa. Ŋaa atumi baari ma kaje yaga antuma ka ongeneŋe.

²² Ŋaa baari ba baakiele Njo Njyami ato ŋaa, bo akimono bo ŋi. Bo avurigi ma kaje lyele enyua ŋa oju.

²³ Ndi: «Bizi lema atanaŋa ongeneŋe ama binda ngingi ŋaa ba bakiele ali ka biri e bo e janja ka onyua ongeneŋe. Ŋaa bizi le ma naana, bizi le ki mono mbuuru kanca kari ŋi.»

²⁴ Bo amana yuga mbari yia, okunji a ba baakiele Njo Njyami bila amfumu ba ampi ambwoŋi yiga asagi jaa ye ba alyele akwoni ŋaa bo yiga ba apiza abuga ndi jo ema esa.

²⁵ Ŋaa mbuuru yi lyele bo ndi: «Baari a be ba lelege ma ongeneŋe ali nca lebugu le Njo Njyami ka biri ye eyiziga bo baari.»

²⁶ Okunji wo akiele Njo Njyami yeni bila abalaga baa ma kayavuruga bila antuma. Ŋaa bo aki sa bo kabikabi ŋi, bo kiigi ŋa obwogo ncanke baari atobi bo akele.

²⁷ Bo amana ya vuruga bila bo, bo aswuzi bo ka miizi ma Oju wo amfumu, ŋaa mfumu ampa ambwoŋi yiga alege bo ejugu.

²⁸ Nde ŋa bo ndi: «Bizi ti kiigi le ma alege be okele ma kabiza yiziga ma nkuumu a balaga li. Ŋaa be buni lesa? Ŋaa be eba le mi mana vusa kangundu ka Zerizaleme kaso ma eyizigi e be ŋaa be lesaga lege maami ma leku le nde yila engwo e bizi!»

²⁹ Pyere bila abuga ba antuma akaali ndi: «Anyima Njyami ŋaa ka baari omuon ŋi.

³⁰ Njyami wo ankaaga a bizi a be wo nyusa Zezi wua, wo bumi be, wo le kuti ma lemaanji.

³¹ Njyami ma akusa nde ma kwogo ka kalumu, nde ma ampa nde omfumu, nde maasa ma nde Mfumu bila Ovuzigi, ma kampa baari ba Ezerayele ncuo ye ka kaala omuon bila kabologo maami a bo maabi.

³² Bizi a be baari ba lemoni maami, bizi a be bila Oduduma Santi wo Njyami wo kampa baari ba baanyima nde.»

³³ Oju wo amfumu ba aZife ama yuga mbari yia, abiri nkeri, ŋaa bo yiga baasaga buma antuma.

³⁴ Ŋaa nca bo kiigi ŋa ofarizi nkuumu Ngamalyele oyizigi angiri, baari aso baanyima nde. Nde sarigi ka miizi ma oju ŋaa nde ndi asa baana mpa antuma mfaaza ma kasa acwuga.

³⁵ Ŋaa nde ŋa okuga ndi: «Baari ba Ezerayele lesa oyeri ma maami maasa be baari ba.

³⁶ Kabila ekini sa lebigi lebizi a be ka lemoni Tedase, wo baamono ndi nde kiigi mbuuru mbuuru, kiigi ŋaa ankama ma baari ana (400) baayi baaga nde. Ŋaa abumi nde, aso ba alwoni nde acaligi oca maami maakiigi sa bo afi bwa.

³⁷ Amana nde, ma ana ma oteende lemoni katemeŋe Zida wo osi Ngalile; nde tasa baari ba akukuna ŋaa abumu nde se, ŋaa baari aso ba alwoni nde acaligi oca.

³⁸ Ŋaa mi yiga elyele be, lebiza baari ba kabaraga ŋaa lenyina bo aje. Kabila ecimiŋi e bo bila janja le bo aka le baari omwon, mon aso ma aje kawa.

³⁹ Ŋaa aka jaajaa mon mpila Njyami maawa, be le ka buna kacala ŋi. Lebiza se kamiga Njyami!» Oju yaligi jaa le Ngamalyele.

⁴⁰ Bo avuri cwoli antuma, bo aberi bo ŋaa amana oju ŋa antuma ndi, be lebiza kama lyele ma nkuumu a Zezi, amana apisi bo.

⁴¹ Ka aciege antuma mpila oju wo amfumu ba aZife, Njyami moni ove ma bo ba vuli tele ma mpasi ye moni bo, ma nkuumu a Zezi.

⁴² Ŋaa cugu ŋa cugu nca lebugu le Njo Njyami ŋa njo ŋa njo, bo amono ba aselege yiziga bila ma kampa Ncya Yeemve ye Zezi, wo Masiya.