Esima 4 - Tege Kiwoyeti (teg) NT Portions

Pyere ŋa Zan ka levuzu le okuga wo akuuru

¹ Pyere bila Zan kiigi kini ba alyele bila baari, mono ka aya ampi ambwoŋi bila mfumu ba baakyele Njo Njyami ŋa aSadiseye.

² Bo kiigi amabira nkeri ma eyizigi ba antuma ba ba mpa baari, ma bo ba ba alyele ndi, ma Zezi baari ba akpa kpa ba anyuzuga.

³ Bo akuari bo ŋa bo akieli bo ma ongeneŋe, ma kajila ndi cugu oca, kabila vuzu kiigi yiga omikolo.

⁴ Okorogo bege le baari ba ayugi mbari a Njyami ayaligi, otali a baari ba ayaligi seligi kumu ankama a baari (5.000).

⁵ Vuzu oca oju wo akumu ba aZife, ŋa akuuru bila Ayizigi angiri avunuŋi ka Zerizaleme.

⁶ Ŋaa mfumu wo nca ampi ba ambwoŋi Ane bila Kayife ŋa Zan, ŋa Alesandre bila aso ba kaga le amfumu ba ampi ambwoŋi.

⁷ Bo asi kayaa Pyere bila Zan kanca kari a bo, ŋaa bo apizi bo ndi: «Be ma mpari a na, sikali ma a na be lesa maami ma?»

⁸ Ŋaa Oduduma Santi kiigi ma anyunuŋa nca Pyere, nde ŋa bo ndi: «Be amfumu ba kasi bila be ba akuuru,

⁹ lubu yiga ba alege bizi ejugu ma leve le asa balaga ngaa kaleme, ba apiza bizi ndi le lyele lemigi le ewuumi nde.

¹⁰ Ave be leya mini be aso se baari ba Ezerayele, ŋaa ma a Zezi Kirisite wo Nazarete, wo komi be ma lemaanji, Njyami kanyusa nde nca baari ba akpa kpa ma nde balaga li yiga taataa ka miizi a be.

¹¹ Zezi ŋaa: “Kele le be, be ba acua anjo le lebeli, ŋaa yiga lema kiriga kele le ba awasa abaani a njo.”

¹² Kangula nde okima wo abuna vuzuga bizi a be kali; kayila ncie. Njyami ki mpa nca baari ba omuon kima ya ye buna vuzuga bizi a be ŋi.»

¹³ Ekoli baari ba nca oju wo amfumu ba aZife, kabila bo akiigi mono tari le Pyere bila Zan, ŋaa bo se amoni ndi Pyere bila Zan etuma samisami ŋa ba akami oyeri ŋaa bo se jaa lemon le ayaayi kali. Ŋi bo ayaligi ndi bo baari ba Zezi.

¹⁴ Ŋaa bo ba kamono mbuuru wo wuumi se kiigi ka kapaana bo, ŋaa bo akimabaga ojugu wo alege bo ŋi.

¹⁵ Ŋaa bo ŋa Pyere bila Zan ndi le cwuga nji, bo asiili ma kalyele ka mpaniŋi a bo.

¹⁶ Bo ba alyele ndi: «Lesa baari ba bunu? Kabila baari aso ba Zerizaleme ayaayi taataa ndi bo baari ba asa mpiri ye osiri, ŋaa bizi a be kibuna bira yo ŋi.

¹⁷ Ŋaa ave bizi a be le liga bo ni, ncanke ncya yi eseligi eyeni nca kasi kaso, ŋaa lesa bo nkeri ma buni bo ki ma lyele bila mpini mbuuru ma a Zezi ŋi.»

¹⁸ Bo avuri ncwoli Pyere bila Zan ŋaa bo alegi bo okele bu bu ma kacwolo bila ma kayiziga ma a Zezi.

¹⁹ Ŋaa Pyere bila Zan ŋa bo ndi: «Lepama ma be ankulu aka yemiŋi ka miizi a Njyami, ma kanyima be sikali Njyami.

²⁰ Ŋaa aka ma bizi, bizi leka buna nyina kalyele ma moni bizi bila ma yugi bizi ŋi.»

²¹ Baari ba oju wo amfumu ba aZife avuru fali bila bo ŋaa amana bo apisi bo. Bo aki baga oyeri ma kasisa bo ŋi, kabila baari aso ampi Njyami leve ma ma ayiri.

²² Mbuuru a balaga wo wuumi ma mpiri kiigi yiga vuli enkuumu ba esibi ena.

Obwoni wo ayaligi

²³ Amana pisa bo, Pyere bila Zan ayeni mpila adigi a bo ŋaa bo anaani bo aso ma adugi amfumu ba ampi ambwoŋi bila ankwuru.

²⁴ Bo amana yuga kayumba kia ayaligi abwoni Njyami ma otuma omon ndi: «Mfumu we Mbuuru wo wanga yulu, ŋa ncie, lemere bila biibi eso beeli nca kari.

²⁵ We mbuuru wo wobi ma Oduduma Santi, ma onyua Davide wo nkaaga bizi ojanja we: “Yi ngimiŋa yila baari, ema esa? Baari ba ama kura ncwumu ma amaami ma oca!

²⁶ Amfumu ba esi ama saraga ma kajuana eta, ŋaa akunji ami vunuŋa ma njuru a Mfumu Njyami bila Masiya a nde.”

²⁷ Ŋaa jaajaa Erode bila Pontese Pilate ami vunuŋa nca kangundu ki, bila baari baayi ba esi ekima ŋaa baari ba kasi ka Ezerayele ba akura ncwumu ma ojanji we Zezi wo cece, wo swoli we mva Masiya.

²⁸ Bo ami mana sa aso maasa kana we ka ebaani, nca mpari we ŋaa mva kajii we.

²⁹ Mfumu ŋaa yiga kese yemiŋi yemiŋi maami maasa bo bizi ŋaa mpa ajanji a we mpari ma kampa mbari a we bila tari leenini.

³⁰ Mvyere mpari a we ma ewuumi, ma eliimi eluari bila maami ma osizi aya ma nkuumu a ojanji a we Zezi, nde wo cece.»

³¹ Ŋaa bo kiigi baabwono, biri ye ebaaka bo enyigi. Oduduma Santi nyuniŋi nca bo aso ŋaa bo ampi mbari a Njyami bila kawasi.

Ayaligi ba akaba kabaga ka mpanaŋa bo ŋa bo

³² Bege le ayaligi kiigi jaa lemon, ŋa ecimiŋi se omon. Se mbuuru omon nca bo wo ajogo ma biibi e nde otu kali, ŋaa aso kiigi jaa lemon.

³³ Antuma ba kampa ncya ye enyuzigi e Mfumu, Zezi bila mpari yeenini. Ŋaa puga leenini kiigi leli yila bo.

³⁴ Nca bo se mbuuru omon kiigi aka kaama se keekalogo ŋi. Okorogo aso baakiigi ŋa anguunu sikali anjo ba katege mon ŋaa bo ba kaya bila ampara ma kiigi baga bo ma antegi.

³⁵ Ŋaa bo ba kaya suuza mon ncina miili ba antuma, ŋaa ba kampa ampara ma mbuuru ŋa mbuuru ma lemigi le akaama a nde.

³⁶ Zizefu wo olevite wo akuli ka kasi ka Cipre, wo antuma a Zezi wo acwoli ma Barnabase, yia ma kalyele ndi: «ompi kawasi»,

³⁷ tegi nguunu a nde ye ka kiigi ŋa yo, nde yi bila ampara ŋaa nde mpi mon ŋa antuma.