Esima 3 - Tege Kiwoyeti (teg) NT Portions

Balaga le kabuka le mi wuuma

¹ Tari kiigi yiga ngula ocu, Pyere bila Zan a kumi Njo Njyami ma ka bwono ma tari le otari.

² Kapaana kadubugu ka Njo Njyami ka ba acwolo ma Kave ka kadubugu, kiigi ŋa balaga le akula eli nde kabuka. Cugu ŋa cugu, ayi bila nde ŋaa aswuzi nde kaŋaa, ma buni nde kalaa ampara ŋa baari ba kiigi nyunuŋa nca Njo Njyami.

³ Nde kama mono Pyere bila Zan ba aya nyunuŋa nca Njo Njyami ŋa nde laayi bo ampara.

⁴ Ŋaa bo akesi nde nca miizi ŋaa Pyere ndi: «Kese bizi!»

⁵ Kabuka kia ka seligi kesi bo, nde kamono ndi, lubu bo baampa nde kalogo.

⁶ Ŋaa Pyere ŋa nde ndi: «Mi ŋa se ampara, se nore kali, ŋaa beeli ŋa mi, mi empa we, ma a Zezi Kirisite wo Nazarete saraga ŋa je!»

⁷ Ŋaa nde kuari nde ma kwogo ka kalumu, nde sati nde. Kancinci ŋaa, miili bila nkeeŋe yiga ewami.

⁸ Nde kata kabi lemon, nde yiga ma otele, ŋaa nde yiga ayira. Nde nyunuŋi bila bo nca Njo Njyami, yiga ayira ma kata akabi, ma kampa Njyami leve.

⁹ Baari aso yiga amoni kayira nde, ŋaa nde mpi Njyami leve.

¹⁰ Ka evuri yaa bo ndi, lo kiigi balaga le kiigi manci Kadubugu Keeve ka Njo Njyami ma kalaa apara, ŋaa bo abagi akimi maanini bila oliliŋi ma maami ma ayiri ma nde.

Pyere ayiziga nca lebugu le Njo Njyami

¹¹ Ŋaa nde kiigi yiga njala kanyina Pyere bila Zan kali. Baari nca akimi abiri nciini ayeni mpila bo, ma kacu ka ba acwolo ma olebe Salomon.

¹² Pyere, kamono bwa, ŋa baari ndi: «Ye asi Ezerayele, be jaa ye lekima ma mama yira maa? Be bia ekesi yiga ba lekese bizi yiga ema, yiga ni ma mpari a bizi ankulu sikali ma bizi ba lenyima Njyami lesa balaga li kaje?

¹³ Njyami Abarayame, wo Izake bila wo Zakobe, Njyami ankaaga a bizi a be, nde ma akusa ojanji a nde Zezi, wo be wo letege bila wo biza be ka miizi a Pilate wo okunji, wo dugi ndi, apisa Zezi.

¹⁴ Be lebizi nde wo cece bila tele, ŋaa be le laayi ni apisa be obuma baari.

¹⁵ Be lema abuma mfumu omwon, wo Njyami we kanyusa nca baari baakpa kpa, bizi a be atemi a lo.

¹⁶ Ŋaa be lemono balaga lia ŋaa be leyayi nde: ma nkuumu a Zezi nde ma wuuma kabila bizi a be le ma ayalaga ma nde. Ŋa ma lila le Zezi lempi nde kawuuma, ka miizi a be aso.

¹⁷ «Ŋaa andumu a mi, mi yayi ni be bila amfumu a be lesa bwa ma andimiŋa.

¹⁸ Ŋaa Njyami maasa amaami a nde ma kadugi kalakala ma enyua ba antuma Njyami a ncye aso, ndi Kirisite aje kamono mpasi.

¹⁹ Ŋaa lenyina maami maabi, ŋaa lekaala eku e be, ma buni aciezi maami a be maabi.

²⁰ Ŋaa Mfumu aje kampa antini ma kawuuma bila nde aje katuma Kirisite wo nde wo kasa swolo ma be, Zezi.

²¹ Ma ntini ye leli yi, nde kini asa abaana ka, ka yulu tii keeya cugu eli Njyami avuta maami aso ma anyarigi, mva kadugi Njyami ma enyua ba antuma a nde a ncie akalakala.

²² Moyize alyele ndi: ''Mfumu wo Njyami a be aje katuma nca andumu a be ntuma nde mva mi. Be le eje kayuzuga aso ma alyele nde be.

²³ Ŋaa mpini mbuuru we abiza yuga ntuma Njyami wua ba acyeze nde nca baari a Njyami, ŋaa ba abuma nde.''

²⁴ Antuma aso ba awobi omon ŋa omon ka asa baana ma Samyele, ama alyele se ma ecugu bi.

²⁵ Be baana ba antuma Njyami bila obuga baasa Njyami bila ankaaga a be, nde alyele ŋa Abarayame ndi: “Ankwono aso ancye ba abaga puga ma katagi ka we.”

²⁶ Njyami baani sa kakusa ojanji a nde ma be, nde ma atuma nde ma kampa be puga, ma kacieze mbuuru ŋa mbuuru nca maami maabi.»