Esima 27 - Tege Kiwoyeti (teg) NT Portions

Poole atumi ka Rome

¹ Ntini ye le kuri ojugu ndi bizi leje kasi ka Itali ma vaari, bo ampi Poole ŋa engeneŋe ekima eke ma mfumu aworo wo acwoli Juliyuse. Nde kiigi nca aRome ba baacwolo ma «njiimi le mfumu woonini.»

² Ŋaa bizi lekumi yila vaari omon wo fi kangundu ka Aderamyte, ŋa wo kiigi je kacu ka ambwu ma opaani wo lemere le bungu le Azi. Ŋa bizi leyeni, Arisetareke wo fi Tesalonike nca bungu le Masedoyine, kiigi bila bizi.

³ Enyuzuga, bizi letoyi Sidone. Juliyuse mvyeri otuma nde woove ŋa Poole, nde nyini nde ma kaje mpila andigi a nde ma kabaga biibi eli nde kiigi ŋa kaama.

⁴ Amana bizi le vurugi yila lemere, bizi le yiri ma kacu ka kajeneŋe ka Cypre, ma kayiziga njuru ma pyebi le leki wula ma bizi.

⁵ Amana bizi le buuli lemere tuga ŋa bungu le Silisi ŋa Pamfili ŋa bizi letoyi Mira, ka Lisi.

⁶ Kaŋa, mfumu aworo bagi vaari omon ye mbwu ye Alesanderi wo aje Itali. Ŋa nde si bizi kakuma.

⁷ Ŋaa ma ecugu ekukuna, bizi le ciini oke oke, ŋa bizi letoyi bila mpasi yeenini ka levuzu le kangundu ka Kenide. Ŋaa pyebi eligi bizi ma kaciina nca kacu kia, ŋaa ma kayira ma Salemone, bizi le yiri ma kacu ka eyizigi ka kajeneŋe ka Kerete.

⁸ Bizi leyiri ma opani wo kajeneŋe bila mpasi yeenini, ŋa letoyi biri mon ye ba acwolo ma aMbuu-Maave, tuga ŋa kangundu ka Lase.

⁹ Antini kuna ayira ŋa kiigi yiga ŋa obi ma kaje opinga ma vaari. Okorogo, cugu le ba ampa akolokolo ma amaami maabi kiigi yiga lemi mana yira. Ma bwa Poole yiezi bo:

¹⁰ Ŋa nde alyele ndi: «Andigi a mi, mi emono ni opinga wu aje kaka obi. Vaari ŋa biibi beeli ka kari beebia, ŋa bizi ankulu aya le kaami se omwon.»

¹¹ Ŋaa mfumu aworo ki yuga mbari a Poole ŋi. Nde yugi balaga le lejuta, bila ngaa vaari otu.

¹² Biri ye sugu bizi kiigi ove ma kajila ni ntini ye mpebe eyira. Ŋaa kuna le baari ba akiigi nca vaari akani ma kacyege kaŋa. Bo kiigi ka saga ni ave bo atoyi Fenise, ka mbwu kima ye Kerete, keeli tele ma kacu ka eva muyi, ma kajila ni antini ma mpebe ayira.

Pyebi yila lemere

¹³ Pyebi le kwogo le onkari le kawula oke oke, ŋa baari ba vaari amoni ni jaa le kuri bo kiigi levye. Bo ayeni ŋa ayeligi ma kaciina opani kajeneŋe ka Kerete.

¹⁴ Ŋaa yiga tuga, pyebi le nkeri, le acwoli ma «Erakilo» Le surugi ma ekuru ba kajeneŋe.

¹⁵ Pyebi le jiimi vaari, bizi kiigi buna suga vaari ma pyebi ŋi ŋa bizi le nyini lo le biri bizi.

¹⁶ Bizi leyiri ma kacu ka onkari ka kajeneŋe ka enkyege ka cwoli Koda. Bizi le bwuni kayaga bila mpasi yeenini ambuugu ba ama kura ngula vaari.

¹⁷ Ajanji a vaari asi nde kakuma, ŋa bo akuri esia ba eyamba ncina vaari ma ka kwara nde ngingi. Bo kiigi ŋa bwogo ni vaari le je va kayila okama seyi wo ma acwuga yila kakulu ka Libi. Bo atuni kalogo nca lemere. Ŋa anyini pyebi le biri bo.

¹⁸ Enyuzuga, kakuru kiigi ka selege kanyiziga bizi bila nkeri, bo atuni kabari ka biibi ma lemere.

¹⁹ Ŋa cugu le otari bo ancuni biibi e bo e janja ba vaari ma njiala e bo ankulu.

²⁰ Ŋaa ecugu kuna bizi leki mamono muyi, ŋa anyari ŋi. Ŋa kakuru ka seligi si se mpari. Bizi le kaami tari ni bizi leka ma buna kavwuga ŋi.

²¹ Kiigi emabiga eli ba akiigi nca vaari aki ja kalogo ni. Ŋaa Poole temiŋi ka miizi a bo, ŋa nde dugi bo ndi: «Andigi a mi, be ma ka yuga kadugi mi be ma kabira cyege Kerete. Biibi e bizi a be eki bya ŋi, ŋa eki nyuŋo ŋi.

²² Ŋaa yiga, mi elyele be, lesa kawasi. Mbuuru kanca bizi a be aka ma kama o mwon ŋi, ŋaa wo akama vaari otu.

²³ Okorogo lempiibi lo ankulu li, Njyami a mi ŋa wo mi ka esala ma nde ma tuma Ntuma-yulu.

²⁴ Ŋa ma alyele mi ndi: “Poole, kandaga bwogo kamono! Ave we toyi ka miizi a Sezar. Ŋa yuga! Njyami ampa we puga ma kavuzuga baari aso ba baaje opinga bila we.”

²⁵ Ma bwa, andigi a mi lesa kawasi, kabila mi e yalaga ni aso ma dugi Njyami ma ayira.

²⁶ Ŋaa ave vaari le bizi a be le kezigi kayila kajeneŋe kamon.»

²⁷ Kiigi lempiibi le enkuumu ŋa ena le kakuru ka kabiri bizi yila lemere le acwoli Aderiyatike. Kanca lempiibi ba aki janja nca vaari abaga acimiŋi ni bizi a be yiga le nciini ma ncye mon.

²⁸ Bo akuri kele ma osya omon, ŋa atuni nca lemere ma kayaga onini ŋa owunu wo nde. Bo amoni ndi kari yeesa enkuumu etari ŋa ncaami ma olaa (37). Le nciini vuzu nceti, bo avuri tuni osya. Ŋaa bo amoni ndi kiigi ŋa owunu ba enkuumu jyele ŋa mpwomon ma olaa (28).

²⁹ Bo ŋa obwogo ni vaari le kezigi ma akele ka opaani lemere, ma bwa, bo acuni ka lebiza le vaari anjuunu ana ma olemi ni nde kasuga. Ŋa bo kiigi kasaga ni cugu oca.

³⁰ Ŋaa baari ba kiigi njuga vaari asagi kaduma. Bo asi kasuruga mbuugu nca lemere, ma kalyele ni bo kiigi ba aswuza anjwunu ma olemi ka levuzu le vaari.

³¹ Ŋaa Poole dugi ŋa mfumu aworo ŋa aworo: «Aka abalaga ba abiza kaka nca vaari, be le ka buna kavuuga ŋi.»

³² Ŋaa aworo acagi esia ba ekuara mbuugu, ŋa bo anyini lo levi ma anja, ŋa le yeni.

³³ Ma ntini eli cugu kiigi leca, Poole cigi bo aso ma kaja, ma kalyele ni: «Lemono lubu cugu le nkuumu ŋa ena le ebigi obwogo o be ŋa be leka ja se kalogo ŋi.

³⁴ Ŋaa mi eciga be ma kaja biila, kabila be ŋa kama ma kavuuga. Ŋa se omon nca be akakama se lemfu lemon le ocu a nde ŋi.»

³⁵ Amana kalyele bwa, Poole yagi lempeembe, nde mpi Njyami leve ka miizi a baari aso, ŋa nde cagi lempeembe, ŋa nde se ji.

³⁶ Ŋaa aso avuru bagi kawasi, ŋa bo se aji.

³⁷ Bizi aso ba le kiigi nca vaari enkuumu e baari ena ŋa enkuumu ncaami (276).

³⁸ Ŋaa bo ayuruga, bo acuni mburu nca lemere ma buni vaari ki ma baga olemi ŋi.

Baari ba opinga aso avwugi

³⁹ Ntini ye cugu ka eci, baari ba akiigi juta vaari aki maya biri ye ncie ŋi. Ŋaa bo amoni biri mon eli kiigi yiga ncie ema jeneŋe anja, bila seyi kapaana anja. Ŋaa bo akuri ojugu ni, aka ba abuna, kajuta vaari ma kakuma yila seyi.

⁴⁰ Bo anaani esia ba anjwunu ŋa anyini nca lemere. Bo se anaani esia ba epanja jwele beenini ma kakalaga vaari ma kacu ka jii nde. Ŋa bo asati kalembe ka levuzu le vaari ma buni pyebi le ciniŋa nde, ŋa bo ayeni ma kacu seyi mpaana anja.

⁴¹ Ŋaa vaari vi yila okama seyi ka akabakari ma anja, ŋa nde ki ma buna nyiga ŋi. Levuzu lenyuniŋi nca seyi ntini ye epwugi e nkeri ka ebuli lembiza.

⁴² Aworo kiigi ajii ma kabuma engeneŋe, mini nca bo se omon ki buna kabara ma oncoŋi ŋi.

⁴³ Ŋaa mfumu aworo jii kavuzuga Poole, ŋa nde ligi aworo ma kabiza kasa ma kuri bo. Nde dugi ma ba ayayi oncoŋi ma kaciga ncomi nca anja ma kato yila ncie.

⁴⁴ Abuga alwoni yila epanja sikali yila ba esiili ba vaari. Ma lemigi lia, bo atoyi ncie aso avwugi, ŋa se ampura kali.