Esima 26 - Tege Kiwoyeti (teg) NT Portions

Poole acwula njuru ka miizi ma Angiripa

¹ Angiripa dugi ŋa Poole ndi: «We abuna kalyele ma kacwula njuru a we.» Ŋaa Poole sati kwogo ma kacwula njuru a nde ndi:

² «Mfumu Angiripa, lubu mi ŋa kase ma kacwula njuru a mi ka levuzu le we ma maami ma kata aZife mi aso.

³ Okorogo we yayi angiri aso yemiŋi ŋa ewobi ba aZife. Ma bwa mi elyele we mini we yuga mi oke oke.

⁴ «AZife aso ayayi omwon o mi ka kiigi mi onkere, ka ebaani e mi encomi kanca baari a mi ŋa ka Zerizaleme.

⁵ Kiigi emabiga bo ayayi mi, ŋa ba abuna mpa otemi ma mi aka bo ajii. Mi ki nca oju aFarizi, wo tele kanca baari a bizi.

⁶ Ŋaa yiga ba pama mi, ma mi wo legi tari ma ndagi a Njyami ye ka si ma ankaaga a bizi a be.

⁷ Akaga ma kuumu ŋa bwele ba baari a bizi a be ŋa tari ma ka mono eyi e ndagi yia ŋa ma kajanja ma Njyami bila mpari ma cugu ŋa lempiibi. Ŋa ma tari lia, mfumu Angiripa, ni aZife ba akata mi!

⁸ Meema be le pama mini ŋa mpasi ni Njyami aka nyusa ba akpakpa ŋi?

⁹ Miankulu, mi cimiŋi ni mi kiigi esa eso ma kajuana bila nkuumu a Zezi o Nazarete.

¹⁰ Ŋaa mi si bwa ka Zerizaleme. Mi legi bege le ayaligi ma ongeneŋe. Okorogo amfumu ba ampi ambwoŋi ampi nde njila. Ŋa ntini ye apami bo ma kabuma, mi yaligi.

¹¹ Nca anjo ma ba baabwono aso mi baani ma kampa ayaligi mpasi ma katuma bo ma katuga nkuumu a Zezi. Mi kiigi ŋa kala yeebi ma bo. Ŋa ma kabiniŋa bo tii nca engundu elala.»

Poole alyele ecwoli e Mfumu ma mfumu Angiripa

¹² «Ma bwa mi yeni Damase bila njila ŋa mpari ye mpi amfumu ba ampi ambwoŋi mi.

¹³ Mi kiigi ma njila tari lemi kalaga ngulu ocu, mfumu Angiripa, mi moni kafii kafi yulu. Kafi kia kiigi kavuli ka muyi, ŋa ko ka ekyeme ma njuru a mi, ŋa ma abuga baakiigi yila mi ma opinga.

¹⁴ Bizi aso levi ma ncie, ŋa mi yugi jui le dugi mi ma jui le eberayike: “Soole, Soole, we meema ampa mi mpasi? Ŋa ngori we abiza, mva nyama ka abiza komoŋo mfumu a nde.”

¹⁵ Mi pizi mini: “We na Mfumu?” Mfumu kaali ndi: “Mi Zezi, o we wo ampa mpasi.

¹⁶ Ŋaa temeŋe, ka ma otele. Okorogo ma bwa mi yi mueze we njuru a mi. Mi ma aswolo we ma kaka ojanji a mi ŋa otemi o mi ma kalyele lemigi le moni we mi lubu, ŋa kalyele se a mi ka e mvyere we kalakala.

¹⁷ Mi e vuzuga we nca njiala ba aZife ŋa ma baali ka aZife ŋi. Kabila mi etuma we mpila bo.

¹⁸ Ŋaa we anaana bo miizi, ma buni bo akalaga nca lempiibi ma kafii ŋa ma otori o Satan mpila Njyami. Aka bo ba ayalaga mi, bo ba abaga akolokolo ma maami maabi a bo ŋa bo ba abaga bugu lemon le wanda bila baari a Njyami.”»

Poole alyele ma janja le nde

¹⁹ «Mfumu Angiripa, ŋaa mi ki bira kanyima ma moni mi bila maakiigi wa yulu ŋi.

²⁰ Mi baani mpi ncia yeemve ma baari ba Damase, ŋa ba Zerizaleme, ŋa nca bungu le Zude leso, ŋa baali ka aZife ŋi. Mi cwoli bo ma ka kaala eku, ŋa ma ka kalaga mpila Njyami, ŋa ma kamvyere ekaali bia ma amaami maave.

²¹ Ma kabila kia aZife akuari mi, ŋi mi kiigi ka Njo Njyami ŋa asagi mi kabuma.

²² Ŋaa Njyami akyele mi tii lubu. Ŋa mi kini ŋaa ma kampa otemi o mi ma aso, ŋa enkere bila ankwuru. Mi e kalyele kalogo ka kima ŋi kangula antuma Njyami bila Moyize ba adugi kiigi maaya:

²³ ma kalyele ni Masiya aje kamono mpasi, nde aje kanyuzuga ncomi nca baari ba akpa kpa, nde kiigi ampa kafi ka evuzuga, ŋa baari a bizi bila baali ka aZife ŋi.»

Poole acwolo Angiripa ma kayalaga

²⁴ Ŋaa Poole amvyere lemigi le acwula njuru a nde, Fesetise tii jui: «We ŋa lari, Poole! Eyayi e we emitasa we!»

²⁵ Poole kaali ŋa nde ndi: «Mi lari kali, mbuuru a mi Fesetise. Mbari ye lyele mi ye jaajaa ŋa tele.

²⁶ Mfumu Angiripa yayi maami ma ŋa mi e buna lyele bila tari ka ovuzu o nde. Mi ecimiŋa ni nde yayi maami ma aso. Kabila mon aki yira ma ayizigi nca osugu ŋi.

²⁷ Mfumu Angiripa, we ayalaga ma dugi antuma Njyami? Mi yayi ni we ayalaga!»

²⁸ Ŋa Angiripa dugi ŋa Poole ndi: «We yiga akaala ecimiŋi e mi mini mi kiriga okiricye ma antini nceti?»

²⁹ Poole kaali nde ndi: «Se antini nceti sikali antini kuna, mi ebwono Njyami ni ki ka we otu ŋi, ŋaa evura ka be aso ba leyuzuga mi lubu, be lekiriga mva ka eli mi, kangula esia ba ankozo ma!»

³⁰ Ŋaa mfumu Angiripa, nguverenere, Berenise ŋa aso baakiigi bila bo atemiŋi.

³¹ Bo acuugi ŋa ba kalyele kanca mpanaŋa bo ndi: «Balaga li jaa ye kasi eli abuma nde onyaŋa sikali esia ba ankozo.»

³² Ŋa Angiripa dugi ŋa Fesetise ndi: «Le buna cuzuga nde, aka nde kiigi ma abiza kacwolo Sezar.»