Esima 25 - Tege Kiwoyeti (teg) NT Portions

Poole si kacwolo Sezar

¹ Amana ecugu etari ba eyi nde nca bungu, Fesetise yeni Sezare ŋa kumi Zerizaleme.

² Amfumu ba ampi ambwoŋi ŋa ankani ba aZife ayi wazaga ka miizi a nde ŋa bo asosi Poole.

³ Bo aselegi pizi nde ma kasa bo leve, ma kavuta Poole Zerizaleme, ma bo ba kuri kiimi ma kabuma le nde ma njila.

⁴ Ŋaa Fesetise kaali bo ndi: «Poole li ka ongeneŋe ka Sezare. Ŋa miankulu, mi e vuraga tuga tuga.

⁵ Ndi amfumu a be ayila mi ka Sezare ŋa bo akati balaga lia, aka nde maasa kalogo keebi.»

⁶ Fesetise ki ecugu mpuomon sikali nkuumu ka Zerizaleme. Amana, nde vurugi Sezare. Enyuzuga, nde vi ncina yila biri ye ba apama, ŋa dugi ma ka ya bila Poole ka miizi a nde.

⁷ Ŋaa wua kato, aZife ba afi Zerizaleme ajeniŋi nde. Bo akati Poole ma bege le amaami maabi, ŋaa bo aki buna mueze ni syele ŋi.

⁸ Ŋaa Poole cwuli njuru ma kalyele ndi: «Mi ki sa jaa leebi ŋi, se ma ngiri aZife, se ma Njo Njyami, se ma Sezar, mfumu woonini wo aRome.»

⁹ Ŋaa Fesetise jii ni aZife amono ove ma nde, ŋaa pizi Poole: «We ayalaga kaje Zerizaleme ba apama we ka miizi a mi ma jaa lia?»

¹⁰ Poole kaali ndi: «Yiga mi ka ka levuzu le biri le Sezar ŋa kaŋa ba apama mi. Mi ki sa kalogo keebi ma aZife ŋi, mva ka e yayi weankulu taataa.

¹¹ Aka mi ŋa ncozo obi ŋa mi maasa jaa leebi le lebira mi lekpu, mi eka bira lekpu ŋi. Ŋaa aka jaa le syele nca ososo o baari baakata ma mi, mbuuru ki buna mpa mi nca njiala e bo ŋi. Mi ecwolo Sezar.»

¹² Ŋaa Fesetise kamana lyele bila angaa andwo a nde, kaali ndi: «We ma acwolo Sezar, we aje ka ka miizi a Sezar.»

Poole ka miizi ma Angiripa ŋa Berenise

¹³ Ecugu eyira, mfumu Angiripa ŋa Berenise nkeri a nde atoyi Sezare ma ka biga Fesetise.

¹⁴ Ŋaa ka esi bo ecugu kuna kaŋa, Fesetise wobi jaa le Poole ŋa Angiripa. Ŋa nde dugi ndi: «Ŋa balaga lemon ka kunu, eli Felise ma anyina ma ongeneŋe.

¹⁵ Ŋaa mi je Zerizaleme, ampi ambwoŋi baanini ŋa ankwuru ba aZife ayi kata nde jaa, bo apizi mi ma kampama nde.

¹⁶ Ŋaa mi kaali bo ni aRome ba ka baana pama mbuuru ma yi osubu ŋi. Ave wo akati baani vunuŋi bila ba akati nde, ŋa nde bagi antini a nde ma kacwula njuru.

¹⁷ Ŋaa bo ayi kunu bila mi. Ŋa eki biga ŋi, enyuzuga, mi vi ncina ka biri ye baapama, mi dugi ma kaya bila balaga lia.

¹⁸ Baakati nde ayi mueze njuru, ŋaa bo aki kata nde se ma jaa le nkeri le kiigi cimiŋa mi ni.

¹⁹ Bo atogi bila nde yila eyaligi ba Njyami a bo, ŋa yila balaga lemon nkuumu Zezi. Balaga lia le ma akpa, ŋaa Poole alyele ni nde li mwon.

²⁰ Ŋaa ma mi, mi kiigi ki ya lemigi le kasa ma yia sila jaa ŋi, ma bwa, mi pizi Poole aka nde yalaga ma kaje Zerizaleme ma buni apama nde ma jaa lia.

²¹ Ŋaa Poole si kacwolo: nde pizi ni jaa le nde wo akura lo mfumu woonini. Mi ma atuma ni akyele nde ka ongeneŋe tii ntini ye tuma mi nde mpila Sezar.»

²² Angiripa dugi ma Fesetise ndi: «Mi se ŋa njala kayuga balaga li.» Fesetise kaali nde ndi: «Mbari, we ayuga nde.»

²³ Enyuzuga, Angiripa ŋa Berenise atoyi bila bege le baari a bo ŋa anyunuŋi nca katini ka baalyele amaami bila amfumu ba aworo ŋa ankani ba kangundu. Yila etumi e Fesetise ayi ŋa Poole.

²⁴ Ŋaa Fesetise dugi ndi: «Mfumu Angiripa, ŋa be aso ba leeli bila bizi, be lemono balaga li. Baari ba aZife aso ayi lyele ma nde bila mi, ka Zerizaleme ŋa kunu, ati nya ni nde kiigi ki buna kaka mwon ŋi.

²⁵ Ŋaa mi, mi ki mono jaa leebi lesa nde eli nde ka kpa ŋi. Ŋaa nde-ankulu ma acwolo mfumu woonini, mi mi kana katuma nde Rome.

²⁶ Mi kalogo kancinci ka eteende mfumu woonini ma nde kali, ma bwa, mi ya bila nde ka miizi a be, ŋa vulu vulu ka miizi a we mfumu Angiripa, ma buni ka emana piza we nde, mi ŋa kalogo ma kateende.

²⁷ Kabila ka miizi a mi, ka yemiŋi ma katuma ongeneŋe eli akini mueze maami ma makata nde ove ove ŋi.»