Esima 23 - Tege Kiwoyeti (teg) NT Portions

¹ Poole selege kesi oju wo amfumu ba ankani ŋa nde dugi ndi: «Adumu a mi, mi kiigi yemiŋi bila otuma woove ka miizi a Njyami tii lubu.»

² Ŋaa ompi ambwoŋi Ananyase dugi ŋa ba akiigi kapaana Poole ma kabere nde yila onyua.

³ Ŋaa Poole ma nde ndi: «Ŋa Njyami abere we, balaga li ŋa kura! We ka manci ŋa ma kampama mi mva kadugi angiri, ŋa we aka nyima aNgiri ŋi, we alyele ni abere mi?»

⁴ Baakiigi kapaana Poole ba alyele nde ndi: «We atuga ompi ambwoŋi woonini wo Njyami!»

⁵ Poole kaali ndi: «Adumu a mi, mi kiigi ya ni nde ompi ambwoŋi woonini ŋi. Okorogo, amaateende ndi: “We ki lyele maami maabi ma mfumu wo kasi ka we ŋi!”»

⁶ Poole yayi ndi Oju wo amfumu kiigi ake aSadiseye ŋa baamon aFarizi. Ŋa meema nde kata nya ka levuzu le bo ndi: «Adumu a mi, mi oFarizi, mwana aFarizi. Mi ŋa tari ma enyuzugi ba baakpakpa ma bwa ba pama mi.»

⁷ Ma ntini ye dugi Poole bwa, aFarizi bila aSadiseye lesugu levi kanca mpanaŋa bo, ŋa baari ba amaakuga abayi

⁸ Okorogo, aSadiseye akiigi lyele ndi ŋa enyuzigi ŋa antuma a yulu ŋa epundu onyaŋa. Ŋaa aFarizi ayaligi ndi maami maa aso ali.

⁹ Osarigi selegi kumi. Amfumu ake ba ayizigi angiri ba oju wo aFarizi atemiŋi ŋa adugi bila mpari: «Bizi lemono ni balaga li ki sa jaa leebi ŋi. Kapundu kamon sikali ntuma-yulu asoke ma alyele bila nde.»

¹⁰ Lesugu le seligi rumi bila mpari komanda bagi obwogo ŋini acagi Poole ma abugu. Nde dugi ŋa aworo ma kasuruga nca lembuuru ma ka cuzuga Poole kaŋa, ŋa abiri nde nca njo aworo.

¹¹ Lempiibi le cugu lia, Mfumu yi cwuga ŋa Poole ŋa dugi nde ndi: «Sa mpari! We mi mpa otemi ma mi ka Zerizaleme, ave ka aRome se we yi mpa otemi ma mi.»

Oyeri omon wo akuri ma Poole

¹² Enyuzuga ka ecyere, aZife ake akugi ma ocwogo ma kalyele: bo alabi ndi bo baaka ja kalogo ŋi, bo ba aka nyua kalogo ŋi eli bo akini buma Poole ŋi.

¹³ Baari ba akuru jaa lia kiigi amaavula enkuumu ena (40).

¹⁴ Bo ayeni bazaga ampi ambwoŋi baanini ŋa ankwuru ŋa adugi bo ndi: «Bizi le maalaba; bizi le ka buna kaja biila eli bizi lekini buma Poole ŋi.

¹⁵ Ŋaa yiga, be bila oju wo amfumu ba ankani le je piza komanda ma ka cuzuga Poole ka miizi a be, mva aka be le sanaŋa kaya jaa le nde tiitii. Ŋaa ma bizi, bizi le puta ma ka njila nde ma buni bizi lebuma nde ka abaana to nde kuni.»

¹⁶ Ŋaa mwana nkeri a Poole wo balaga, yugi kalyele bo ma jaa le akuru. Nde ki je njo aworo, nyunuŋi ŋa yiezi Poole.

¹⁷ Ŋaa Poole cwoli mfumu aworo omon ŋa dugi nde ndi: «Bira onkere balaga wu mpila komanda, kabila nde ŋa kalogo ma kalyele nde.»

¹⁸ Ŋa mfumu aworo biri onkere balaga, nde yeni bila nde mpila komanda ŋa dugi ndi: «Oyiga Poole ma acwolo mi ŋa pizi mi ma ka ya bila we onkere balaga wu eli nde ŋa jaa ma kalyele we.»

¹⁹ Komanda yagi onkere balaga ma kwogo, yeni bila nde katege ŋa pizi nde ndi: «We ema aŋana lyele mi?»

²⁰ Onkere balaga kaali ndi: «AZife amaakura ma ka piza we ma kaya ŋa Poole oswuga ka miizi ma oju wo amfumu ba ankani. Bo ba alyele ndi bo ba asaga kamono jaa le nde ma lemigi le taataa.

²¹ Ŋaa we mbizi bo kayuga, kabila abalaga baa ama avula enkuumu ena nca bo ba amaakura nde oyeri. Bo amaalaba ndi bo ba aja kalogo ŋi bo ba anyua kalogo ŋi eli bo akini buma Poole ŋi. Bo yiga ba anjila jaa lekuru we.»

²² Ŋaa komanda dugi ŋa onkere balaga ndi: «Nyina kalyele se mbuuru ma dugi we mi maa.» Ŋa nde nyini nde yeni.

Poole ka miizi a nguverenere Felise

²³ Komanda cwoli amfumu ba aworo a nde bwele ŋa nde dugi bo ndi: «Lekuzuga enkuumu ba aworo enkuumu jwele (200), ŋa aworo ba ba akuma yila akabela enkuumu ncaami (70) ŋa enkuumu ba aworo enkuumu jwele (200) baali ŋa ayuo, ŋa leka tele ma kaje Sezare ma tari le owua kekinkolo.

²⁴ Lekozo se akabela ma kabira Poole taataa ka miizi a nguverenere Felise.»

²⁵ Nde teendi kasangumu ndi:

²⁶ «Kelode Lisiyase atuma ambulu a nde ma mbuuru woonini, nguverenere Felise.

²⁷ AZife ayagi balaga le tumi mi we lia ŋa bo asagi buma nde, ŋaa mi yi bila aworo a mi ma kavuzuga nde. Okorogo mi kiigi ma ayuga ni nde mbuuru aRome.

²⁸ Mi sagi ya jaa ye akata aZife nde, ŋaa mi yeni bila nde ka miizi ma Oju wo amfumu ba ankani a bo.

²⁹ Mi moni ni bo ba akata nde ma angiri a bo, ŋaa nde ki sa jaa eli abuma nde ma lo ŋi sikali ongeneŋe.

³⁰ Ŋa ayiezi mi ni aZife ama akura nde oyeri. Mi kancinci ŋaa kuri ncwumu ma katuma we nde ŋa mi pizi ŋa baba kata nde ma ka ya soso ka miizi a we.»

³¹ Aworo asi ma dugi komanda bo. Bo ayi yaga Poole ŋa kanca lempiibi, bo abiri nde tii Antipatirise.

³² Enyuzuga, aworo ba akiigi ma ncie avurugi njo aworo, ŋa bo anyini aworo ba akiigi yila akabela ma ka lwono njila bila nde.

³³ Ŋaa aworo ba akiigi yila akabela ato Sezare, bo ampi kasangumu ma nguverenere, ŋa ayi ŋa nde Poole.

³⁴ Nguverenere liri kasangumu ŋa pizi ŋa Poole ndi: «Bungu le we lema?» Poole kaali: « Silisi.»

³⁵ Nde dugi ŋa Poole ndi: «Mi ka piza we amaami ntini ye baari ba akati we ato kaŋaa.» Ŋa nde dugi ni bo akyele Poole nca kanini ka njo ka Erode.